ନୂଆଦିଲ୍ଲୀ,୧୫/୧୧ : ଭାରତୀୟ ରେଲଓ୍ବେର ପିଛା ଛାଡ଼ୁନି ଦୁର୍ଘଟଣା । ବାରମ୍ବାର ଦେଖିବାକୁ ଘଟୁଛି ଅଘଟଣ । କେତେବେଳେ ଟ୍ରାକରୁ ଟ୍ରେନ ଖସିପଡ଼ୁଛି ତ କେବେ ବଗିକୁ ବଗି ମାଡ଼ ହେଉଛି। ବୁଧବାର ନୂଆଦିଲ୍ଲୀ- ଦରଭଙ୍ଗା ଏକ୍ସପ୍ରେସରେ ଅଗ୍ନିକାଣ୍ଡ ଘଟିଛି ।
ନୂଆଦିଲ୍ଲୀ- ଦରଭଙ୍ଗା(୦୨୫୭୦)ଏକ୍ସପ୍ରେସର ବଗିରେ ଭୀଷଣ ନିଆଁ ଲାଗିଥିବା ଜଣାପଡ଼ିଛି । ଏହି ଘଟଣା ଇଟାବାରୁ ସରାୟ ଭୂପତ ରେଲଓ୍ବେ ଷ୍ଟେଶନ ନିକଟରେ ହୋଇଛି । ଘଟଣାସ୍ଥଳରେ ଦମକଳ ବାହିନୀ ପହଞ୍ଚି ନିଆଁ ଲିଭା ଜାରି ରଖିଛି । ଛଟ କାରଣରୁ ଟ୍ରେନରେ ବହୁତ ଭିଡ଼ ଥିଲା । ଉତ୍ତର ମଧ୍ୟ ରେଲଓ୍ବେ ଅଧିକାରୀଙ୍କ କହିବା ଅନୁଯାୟୀ ଦରଭଙ୍ଗା କ୍ଲୋନ ସ୍ପେଶାଲ ୦୨୫୭୦ଉତ୍ତରପ୍ରଦେଶର ସରୟ ଭୂପତ ରେଲଓ୍ବେ ଷ୍ଟେଶନ ଦେଇ ପାସ୍ କରୁଥିଲା । ଏହି ସମୟରେ ଏସ ୧ କୋଚରେ ଧୂଆଁ ଦେଖି ଷ୍ଟେଶନ ମାଷ୍ଟର ତୁରନ୍ତ ଟ୍ରେନକୁ ଅଟକାଇ ଦେଇଥିଲେ । ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ଓହ୍ଲାଇ ଦିଆଯାଇଛି । ୩ଟି କୋଚକୁ ଟ୍ରେନରୁ ଅଲଗା କରି ଦିଆଯାଇଛି । ଟ୍ରେନ ଖୁବଶୀର୍ଘ ଛାଡ଼ିବାରେ ଅଛି ।