କୋଲକାତା: ଆଇପିଏସ୍ ଅଧିକାରୀ ବିବେକ ସହାୟ ପଶ୍ଚିମବଙ୍ଗର ନୂଆ ପୋଲିସ ମୁଖ୍ୟ ଭାବେ ନିଯୁକ୍ତ ହୋଇଛନ୍ତି । ରାଜୀବ କୁମାରଙ୍କୁ ଡିଜିପି ପଦରୁ ହଟାଇ ଦିଆଯିବା ପରେ ଏବେ ବିବେକ ସହାୟ ସେଠାକାର ଡିଜିପି ହୋଇଛନ୍ତି । ଏହା ପୂର୍ବରୁ ନିର୍ବାଚନ ଆୟୋଗ ସୋମବାର (ମାର୍ଚ୍ଚ ୧୮) ରାଜୀବ କୁମାରଙ୍କୁ ଡିଜିପି ପଦରୁ ହଟାଇ ଦେଇଥିଲେ । ଏହାର କିଛି ସମୟ ପରେ ଆଇପିଏସ୍ ଅଧିକାରୀ ବିବେକ ସହାୟଙ୍କୁ ଏହି ଦାୟିତ୍ବ ଦିଆଯାଇଛି ।
ଆଜି ନିର୍ବାଚନ ଆୟୋଗ ଗୁଜରାଟ, ଉତ୍ତରପ୍ରଦେଶ, ବିହାର, ଝାଡ଼ଖଣ୍ଡ, ହିମାଚଳ ପ୍ରଦେଶ ଏବଂ ଉତ୍ତରାଖଣ୍ଡର ଗୃହ ସଚିବଙ୍କୁ ହଟାଇବାକୁ ନିର୍ଦ୍ଦେଶ ଦେଇଥିଲେ । ଏହା ସହ ମିଜୋରାମ ଏବଂ ହିମାଚଳ ପ୍ରଦେଶର ପ୍ରଶାସନିକ ବିଭାଗର ସଚିବଙ୍କୁ ବାହାର କରିଦେଇଥିଲେ । ଏହା ବ୍ୟତୀତ ଏହି ଦୁଇ ରାଜ୍ୟରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର କାର୍ଯ୍ୟ ସମ୍ଭାଳୁଥିବା ଦୁଇ ସଚିବଙ୍କୁ ବିଦା କରିଥିଲେ ନିର୍ବାଚନ ଆୟୋଗ ।
ଏହି ୭ଟି ରାଜ୍ୟରେ ଯେଉଁ ଅଧୀକାରୀଙ୍କୁ ବିଦା କରାଯାଇଛି ସେମାନେ ନିର୍ବାଚନ ପ୍ରକ୍ରିୟାକୁ ପ୍ରଭାବିତ କରିପାରନ୍ତି ବୋଲି ଇସି ଆଶଙ୍କା କରିଥିଲେ । ନିର୍ବାଚନ ଆୟୋଗ ପଶ୍ଚିମବଙ୍ଗରେ ୨୦୧୬ର ବିଧାନସଭା ନିର୍ବାଚନ ଏବଂ ୨୦୧୯ ଲୋକସଭା ନିର୍ବାଚନରେ ତତ୍କାଳୀନ ଡିଜିପିଙ୍କୁ ପଦରୁ ହଟାଇ ଦେଇଥିଲେ ।
