ଭୁବନେଶ୍ୱର,୨୬/୦୯: ଦିନ କେଇଟା ପରେ ଶାରଦୀୟ ଦୁର୍ଗାପୂଜା । ଏଥିପାଇଁ କିଏ କେଉଁ ପ୍ରକାର ତୋରଣ କରିବେ ଚାଲିଛି ପ୍ରତିଯୋଗିତା। ଏଥିରୁ ବାଦ୍‌ପଡ଼ିନି ଆଇଗିଣିଆସ୍ଥିତ  ଦଧିବାମନଦେବ ଦୁର୍ଗାପୂଜା କମିଟି । ଚଳିତ ବର୍ଷ  ଏହି ପୂଜା କମିଟି ୩୫ ବର୍ଷରେ ପଦାର୍ପଣ କରିଛି । ଚଳିତ ବର୍ଷ ଏଠାରେ ଶୋଭାପାଇବ ଗଜପତି  ଜିଲ୍ଲାର ଜିରାଙ୍ଗ ମନ୍ଦିର ଭଳି ତୋରଣ, ଯାହାର  ଉଚ୍ଚତା ରହିବ ୮୦ ଫୁଟ। ଏଥିପାଇଁ କୋଲକାତାର  ୩୦ ଜଣ କାରିଗର କାମରେ ଲାଗିଛନ୍ତି । ତା’ସାଙ୍ଗକୁ  ମା’ ଦଶଭୁଜା ୪୦ କିଲୋ ରୁପା ଅଳଙ୍କାରରେ  ସଜେଇ ହୋଇ ଭକ୍ତଙ୍କୁ ଦର୍ଶନ ଦେବେ । ମା’ଙ୍କ  ମୂର୍ତ୍ତିର ଉଚ୍ଚତା ରହିବ ୧୫ଫୁଟ । ମୂର୍ତ୍ତି ଗଢ଼ିବା ପାଇଁ  ବାରଙ୍ଗର ୭ ଜଣ କାରିଗର ନିୟୋଜିତ ହୋଇଛନ୍ତି ।  

Durga Puja 2024: Get all updated News, Videos and Photos of Durga Puja

ବିଧି ଅନୁସାରେ ଷଷ୍ଠୀରୁ ପୂଜା ଆରମ୍ଭ ହେବ ।  ମା’ଦୁର୍ଗାଙ୍କ ପାଖରେ ବିଭିନ୍ନ ପ୍ରକାର ଭୋଗ ଲାଗିବା  ସହିତ ଭକ୍ତଙ୍କ ପ୍ରସାଦ ସେବନ ନିମନ୍ତେ ମଧ୍ୟ  ବ୍ୟବସ୍ଥା କରାଯିବ । ଦଶହରା ଦିନ ୪ରୁ ୫ ହଜାର  ଭକ୍ତଙ୍କ ନିମନ୍ତେ ଅନ୍ନପ୍ରସାଦ ହେବ । ସପ୍ତମୀରେ  ପାଲା, ଅଷ୍ଟମୀରେ ଭଜନ ସମାରୋହ, ନବମୀ ଓ  ଦଶମୀରେ ମେଲୋଡ଼ି ଭଳି ସାଂସ୍କୃତିକ କାର୍ଯ୍ୟକ୍ରମ  କରାଯିବ । ସୁରକ୍ଷା ବ୍ୟବସ୍ଥାକୁ ଦୃଷ୍ଟିରେ ରଖି ୫୦  ଜଣ ସ୍ୱେଚ୍ଛାସେବୀ ନିୟୋଜିତ ହେବେ । ଭସାଣି  ସମୟରେ ନୂଆପଲ୍ଲୀର  ଅନ୍ୟାନ୍ୟ ମେଢ଼ ସହିତ  ଏହି ମେଢ଼ ସାମିଲ ହୋଇ  ବେଶ୍‌ ଜାକଜମକରେ ଭସାଣି  ଯାତ୍ରା କରାଯିବ । ପୂଜା ପାଇଁ ୨୦  ଲକ୍ଷ ଟଙ୍କା ଖର୍ଚ୍ଚ ଆକଳନ କରାଯାଇଛି ।

Read More: ଦଶହରାରେ ଆସୁଛି ୫ ନୂଆ ଓଡ଼ିଆ ସିନେମା: ମୁକ୍ତିଲାଭକୁ ନେଇ ଦ୍ୱନ୍ଦ୍ୱ, ହଲ୍ ପାଇଁ ମୁଣ୍ଡ ବିନ୍ଧୁଛି, ଭାଗ ଛିଣ୍ଡୁନି...