ଭୁବନେଶ୍ୱର,୧୨/୦୪: ଚଳିତ ବର୍ଷଠାରୁ କେନ୍ଦ୍ରୀୟ ବିଦ୍ୟାଳୟ ସଂଗଠନ ପ୍ରତି ଶ୍ରେଣୀରୁ ୮ଟି ଲେଖାଏଁ ସିଟ୍ କମାଇଛି । ତେଣୁ ଏଣିକି ପ୍ରତି ଶ୍ରେଣୀରେ ୩୨ଟି ଲେଖାଁ ସିଟ୍ରେ ହେବ ନାମଲେଖା । ଅନ୍ୟପକ୍ଷରେ ବଦଳି ନିୟମ ଘରୋଇ କ୍ଷେତ୍ର କର୍ମଚାରୀଙ୍କ ପାଇଁ ଲାଗୁ ହେବନି । ଏ ନେଇ କେନ୍ଦ୍ରୀୟ ବିଦ୍ୟାଳୟ ସଂଗଠନ ପକ୍ଷରୁ ଗାଇଡ୍ଲାଇନ୍ ଜାରି କରାଯାଇଛି ।
ଏହି ନିର୍ଦ୍ଦେଶାବଳୀ ଅନୁଯାୟୀ, କେନ୍ଦ୍ରୀୟ ବିଦ୍ୟାଳୟରେ ପ୍ରତି ଶ୍ରେଣୀରେ ୪୨ଟି ଲେଖାଁ ସିଟ୍ରେ ନାମଲେଖା ହେଉଥିଲା । ଏଥିରୁ ଦୁଇଟି ସିଟ୍ ଏକକ କନ୍ୟା ସନ୍ତାନ ପାଇଁ ସଂରକ୍ଷଣ ରହୁଥିଲା । ତେବେ ଏହି ସିଟ୍ କଟିଯିବା ପରେ ୪୦ଟି ସିଟ୍ ରହିଥିଲା । ଏବେ ସେଥିରୁ ୮ଟି ସିଟ୍ କଟିଯିବା ପରେ ଏଣିକି ପ୍ରତି ଶ୍ରେଣୀରେ ୩୨ଟି ସିଟ୍ରେ ହେବ ନାମଲେଖା ।
ସେହିପରି ବଦଳି ନୀତିରେ ମଧ୍ୟ ପରିବର୍ତ୍ତନ କରାଯାଇଛି । ଘରୋଇ କ୍ଷେତ୍ରରେ କାର୍ଯ୍ୟରତ କର୍ମଚାରୀ ଅନ୍ୟ ରାଜ୍ୟକୁ ବଦଳି ହେଲେ ସେମାନଙ୍କ ପିଲା ଅନ୍ୟ ରାଜ୍ୟର କେଭିରେ ନାମଲେଖା ସୁଯୋଗ ପାଇବେ ନାହିଁ । ମାତ୍ର ସରକାରୀ କର୍ମଚାରୀଙ୍କୁ ଏହି ସୁବିଧା ମିଳିବ । ସେମାନେ ଅନ୍ୟ ରାଜ୍ୟକୁ ବଦଳି ହୋଇଗଲେ ସେମାନଙ୍କ ପିଲାମାନେ ଅନ୍ୟ ରାଜ୍ୟର କେଭିରେ ନାମଲେଖାର ସୁଯୋଗ ପାଇବେ । ଏପରି ସ୍ଥିତିରେ ଆଞ୍ଚଳିକ ନିର୍ଦ୍ଦେଶକ ପ୍ରତି ବିଦ୍ୟାଳୟରେ ୪୦ରୁ ୪୫ ସିଟ୍ ପର୍ଯ୍ୟନ୍ତ ସେମାନଙ୍କୁ ନାମଲେଖାର ସୁଯୋଗ ଦେବେ ।
ରାଜ୍ୟରେ ୬୪ଟି କେନ୍ଦ୍ରୀୟ ବିଦ୍ୟାଳୟ ରହିଛି । ଯଦି ପ୍ରତି କେନ୍ଦ୍ରୀୟ ବିଦ୍ୟାଳୟର ପ୍ରତ୍ୟେକ ଶ୍ରେଣୀରୁ ୮ଟି ଲେଖାଏଁ ସିଟ୍ କମାଯାଏ ତେବେ ପ୍ରତି ସ୍କୁଲ୍ରେ ୯୬ଟି ସିଟ୍ କମିବ । ରାଜ୍ୟର ୬୪ଟି ସ୍କୁଲ୍ରୁ ୬ ହଜାର ୧୪୪ଟି ସିଟ୍ କମିବ । ଆଗରୁ ରାଜ୍ୟରେ ଥିବା କେନ୍ଦ୍ରୀୟ ବିଦ୍ୟାଳୟରେ ୨୫୬୦ ପିଲା ପ୍ରଥମ ଶ୍ରେଣୀରେ ନାମଲେଖାଉଥିବା ବେଳେ ଚଳିତ ବର୍ଷ ୨୦୪୮ ପିଲା ନାମ ଲେଖାଇବେ । ବାକି ୫୧୨ ପିଲା ନାମ ଲେଖାଇବାରୁ ବଞ୍ଚିତ ହେବେ । ସିଟ୍ କମିଥିବାରୁ ଅଭିଭାବକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।
