ଲକ୍ଷ୍ନୌ,୧୯/୦୪: ଆଇପିଏଲ୍ ୨୦୨୪ର ତମ ମ୍ୟାଚ୍ରେ ମୁହାଁମୁହିଁ ଲକ୍ଷ୍ନୌ ଓ ଚେନ୍ନାଇ। ପ୍ରଥମେ ବ୍ୟାଟିଂ କରି ଚେନ୍ନାଇ ଦେଇଥିବା ୧୭୭ ରନ୍ର ବିଜୟ ଲକ୍ଷ୍ୟକୁ ମାତ୍ର ୧୯ ଓଭରରେ ହାସଲ କରିନେଇଛି ଲକ୍ଷ୍ନୌ ସୁପର ଜିଆଣ୍ଟସ୍। ଦଳ ପକ୍ଷରୁ କେ.ଏଲ୍. ରାହୁଲ ଏକ ଦର୍ଶନୀୟ ଅର୍ଦ୍ଧଶତକୀୟ ପାଳି ଖେଳିଥିବା ବେଳେ କ୍ବିଣ୍ଟନ୍ ଡି କକ୍ଙ୍କ ବ୍ୟାଟ୍ରୁ ମଧ୍ୟ ବାହାରିଥିଲା ଏକ ଅର୍ଦ୍ଧଶତକ। ଲକ୍ଷ୍ନୌ ମାତ୍ର ଦୁଇଟି ଓ୍ବିକେଟ ହରାଇ ବିଜୟ ଲକ୍ଷ୍ୟକୁ ହାସଲ କରିଥିଲା। ଦଳ ପକ୍ଷରୁ କେ.ଏଲ୍ ରାହୁଲ ୫୩ ବଲ୍ ଖେଳି ସର୍ବାଧିକ ୩ ଛକା ଓ ୯ ଚୌକା ସହାୟତାରେ ୮୨ ରନ୍ କରିଥିବା ବେଳେ କ୍ବିଣ୍ଟନ୍ ଡି କକ୍ ୪୩ ବଲ୍ ଖେଳି ଗୋଟିଏ ଛକା ଓ ୫ଟି ଚୌକା ସହାୟତାରେ ୫୪ ରନ୍ ସଂଗ୍ରହ କରିଥିଲେ।
ଆରମ୍ଭରୁ ୧୪ ଓଭର ପର୍ଯ୍ୟନ୍ତ ଏକ ଦର୍ଶନୀୟ ଇନିଂସକୁ ବଜାୟ ରଖିଥିଲେ ଅନୁଭବୀ କେ.ଏଲ୍ ରାହୁଲ ଓ କ୍ବିଣ୍ଟନ୍ ଡି କକ୍। କିନ୍ତୁ ୧୪.୬ ଓଭର ବେଳକୁ ଦଳକୁ ପ୍ରଥମ ଝଟ୍କା ଦେଇଥିଲେ ମୁସ୍ତାଫିଜୁର ରେହମାନ୍। ଡି ଡକ୍ଙ୍କୁ କ୍ୟାଚ୍ ଆଉଟ୍ କରି ପାଭିଲିୟନ ପଠାଇଥିଲେ ଧୋନୀ। ପରେ ମଇଦାନକୁ ଓହ୍ଲାଇଥିଲେ ନିକୋଲାସ ପୁରଣ।
କେ.ଏଲ୍ ରାହୁଲଙ୍କ ଠାରୁ ଏକ ଶତକୀୟ ଇନିଂସ ଆଶା କରାଯାଉଥିଲା, କିନ୍ତୁ ୧୭.୧ ଓଭରରେ ମାଥିସା ପାଥୀରଣାଙ୍କ ବଲ୍ରେ ରବିନ୍ଦ୍ର ଜାଡ଼େଜାଙ୍କ ଦ୍ବାରା କ୍ୟାଚ୍ ଆଉଟ୍ର ଶିକାର ହୋଇଥିଲେ କେ.ଏଲ୍ ରାହୁଲ। ରାହୁଲଙ୍କ ପରେ ମଇଦାନକୁ ଓହ୍ଲାଇଥିଲେ ମାର୍କସ୍ ଷ୍ଟୋଇନିସ୍। ତେବେ ଉଭୟ ଷ୍ଟୋଇନିସ୍ ଓ ପୁରଣ ମାତ୍ର ୧୯ ଓଭରରେ ଚେନ୍ନାଇ ହାତରୁ ମ୍ୟାଚ୍ ଛଡ଼ାଇ ଆଣିଥିଲେ। ମାର୍କସ୍ ଷ୍ଟୋଇନିସ୍ ୭ ବଲ୍ରେ ୮ ରନ୍ କରିଥିବା ବେଳେ ନିକୋଲାସ ପୁରଣ ୧୨ ବଲ୍ରେ ୨୩ ରନ୍ର କରି ଦଳକୁ ବିଜୟ ଭେଟିଦେଇଥିଲେ। ଆଜିର ମୁକାବିଲାରେ ଲକ୍ଷ୍ପୌ ୮ ଓ୍ବିକେଟରେ ବିଜୟ ହାସଲ କରିଛି।
