ଭୁବନେଶ୍ୱର,୨୪/୦୫: ନିର୍ବାଚନ ବୁଥ୍କୁ ଭୋଟ ଦେବାକୁ ଡାକୁଛି ‘ମାସ୍କଟ୍ ଓଲି’ । ଭୁବନେଶ୍ୱର ଆଇଟିଆଇ ପକ୍ଷରୁ ପ୍ରସ୍ତୁତ ଏହି ‘ଓଲି’ ମତଦାନ କରିବାକୁ ସଚେତନତାର ବାର୍ତ୍ତା ଦେଉଛି । ଏଥିସହ ଅଲିଭ୍ ରିଡ୍ଲେ କଇଁଛର ସୁରକ୍ଷାରବାର୍ତ୍ତା ମଧ୍ୟ ଦେଉଛି । ଏହାକୁ
ଆଇଟିଆଇର ଶିକ୍ଷାର୍ଥୀମାନେ ବର୍ଜ୍ୟବସ୍ତୁରୁ ନିର୍ମାଣ କରିଛନ୍ତି । ୟୁନିଟ୍-୩ ସ୍ଥିତ କ୍ୟାପିଟାଲ ହାଇସ୍କୁଲରେ ହୋଇଥିବା ପୁଲିଂ ବୁଥ୍ରେ ୨ଟି ‘ଓଲି’କୁ ରଖାଯାଇଛି । ଆଇଟିଆଇ ଭୁବନେଶ୍ୱରର ଫିଟର ଏବଂ ୱେଲ୍ଡର ଟ୍ରେଡ୍ର ଶିକ୍ଷାର୍ଥୀମାନେ ଓଲିକୁ ପ୍ରସ୍ତୁତ କରିଛନ୍ତି । ସେମାନଙ୍କ ପ୍ରାକ୍ଟିକାଲ ପାଇଁ ବ୍ୟବହୃତ ସାମଗ୍ରୀରୁ ବାହାରୁଥିବା ବର୍ଜ୍ୟବସ୍ତୁ ଏବଂ ପ୍ରାକ୍ଟିକାଲ ପରେ ବ୍ୟବହୃତ ଅନୁପଯୋଗୀ ପ୍ରକଳ୍ପକୁ ବ୍ୟବହାର କରି ଏହି ଓଲିକୁ ପ୍ରସ୍ତୁତ କରାଯାଇଛି । ଏହିର ଉପସ୍ଥାପନା ରହିଛି, ‘ମୁଁ ବି ଭୋଟ ଦେବାକୁ ଆସିଛି, ଆପଣ ମାନେ ବି ଭୋଟ୍ ଦିଅନ୍ତୁ’ । ବାମ ହାତରେ ଆଇଡି କାର୍ଡ ଧରିଛି । ଏଥିରେ ନାମ ମିଷ୍ଟର ଓଲି ବୋଲି ଉଲ୍ଲେଖ କରାଯାଇଛି । ଡାହାଣ ହାତରେ ମତଦାନ ଦେଇଥିବା କାଳି ଲାଗିଛି ।
ଆଇଟିଆଇ ଶିକ୍ଷକ ସୁବ୍ରତ କୁମାର ପଣ୍ଡାଙ୍କ କହିବା କଥା, ଏହି ଓଲିକୁ ବନାଇବା ପାଇଁ ୧୫ରୁ ୨୦ ଦିନ ସମୟ ଲାଗିଛି । ପ୍ରଥମେ କମ୍ପ୍ୟୁଟରରେ ଏହାର ଏକ ନକ୍ସାକୁ ପ୍ରସ୍ତୁତ କରାଯାଇଥିଲା । ଏହାପରେ ଲୁହା ଫ୍ରେମ୍ରେ ଆକୃତି ପ୍ରସ୍ତୁତ କରାଯାଇଥିଲା । ଏହା ଭିତରେ ବ୍ୟବହୃତ ସାମଗ୍ରୀ ମଧ୍ୟରୁ ୯୦ ପ୍ରତିଶତ ହେଉଛି ବର୍ଜ୍ୟବସ୍ତୁ । ବର୍ଜ୍ୟବସ୍ତୁକୁ କିପରି ପୁନଃ ବ୍ୟବହାର କରିପାରିବା ସେନେଇ ପିଲାମାନେ ବିଭିନ୍ନ ପ୍ରକଳ୍ପ ପ୍ରସ୍ତୁତ କରୁଛନ୍ତି । ସେହିପରି ଓଲି ପ୍ରସ୍ତୁତ ପାଇଁ ମଧ୍ୟ ଏହାକୁ ବ୍ୟବହାର କରାଯାଇଥିଲା । ୱେଲ୍ଡିଂ ଓ ଫିଟର ଟ୍ରେଡ୍ରେ ପିଲାମାନେ କରୁଥିବା ଜବ୍ (ପ୍ରାକ୍ଟିକାଲ୍) ର ମୂଲ୍ୟାୟନ ସରିବା ପରେ ଏହା ବ୍ୟବହାର ଅନୁପଯୋଗୀ ହୋଇଥାଏ । ଏହାକୁ ବ୍ୟବହାର କରି ଓଲି ତିଆରି କରାଯାଇଛି । ଉଭୟ ଟ୍ରେଡ୍ର ୧୫ ଜଣ ପିଲା ଏହାକୁ ତିଆରି କରିଛନ୍ତି । ଆଇଟିଆଇର ଅଧ୍ୟକ୍ଷା ଇଞ୍ଜିନିୟର ଜିତାମିତ୍ରା ଶତପଥୀଙ୍କ କହିବା କଥା, ଖୋର୍ଦ୍ଧା ଜିଲ୍ଲାପାଳ ଓ ଭୁବନେଶ୍ୱର ଅତିରିକ୍ତ ଜିଲ୍ଲାପାଳଙ୍କ ପରାମର୍ଶ କ୍ରମେ ଆଇଟିଆଇ ଛାତ୍ରଛାତ୍ରୀମାନେ ଏହାକୁ ପ୍ରସ୍ତୁତ କରିଛନ୍ତି । ଏହା ଭୋଟରଙ୍କୁ ସଚେତନ କରୁଛି ।
ସୂଚନାଯୋଗ୍ୟ, ପୁରୁଷ ହକି ବିଶ୍ୱକପ୍ ସମୟରେ ମାସ୍କଟ ଓଲି ସମସ୍ତଙ୍କର ଆକର୍ଷଣର କେନ୍ଦ୍ର ବିନ୍ଦୁ ପାଲଟିଥିଲା । ଏହା ସହ ସେଲ୍ଫି ନେବା ପାଇଁ ଯୁବପିଢ଼ିଙ୍କ ଭିଡ଼ ଜମୁଥିଲା ।