ଭୁବନେଶ୍ୱର,୨୪/୦୮: ୯୧  ହଜାରରୁ ଅଧିକ କଳାକାର ସରକାରଙ୍କ  ଭତ୍ତା ସହାୟତାକୁ ଅପେକ୍ଷା କରିଛନ୍ତି ।  ସରକାରୀ ତଥ୍ୟ ମୁତାବକ, ସମଗ୍ର  ରାଜ୍ୟରେ ୯୧ ହଜାର ୭୫୫ ଜଣ  କଳାକାର ‘ମୁଖ୍ୟମନ୍ତ୍ରୀ କଳାକାର  ସହାୟତା’ ଯୋଜନାରେ ସାମିଲ  ହେବା ନିମନ୍ତେ ଆବେଦନ କରିଛନ୍ତି ।  ଏଥିମଧ୍ୟରୁ ସୁନ୍ଦରଗଡ଼ ଜିଲ୍ଲାରୁ  ସର୍ବାଧିକ ୬୮୯୮ ଜଣ ଓ ରାୟଗଡ଼  ଜିଲ୍ଲାରୁ ସର୍ବନିମ୍ନ ୯୬୫ ଜଣ ଅଛନ୍ତି ।  ବିଧାନସଭାରେ ବରିଷ୍ଠ ବିଧାୟକ  ରଣେନ୍ଦ୍ର ପ୍ରତାପ ସ୍ୱାଇଁଙ୍କ ଏକ ପ୍ରଶ୍ନର  ଉତ୍ତରରେ ଓଡ଼ିଆ ଭାଷା, ସାହିତ୍ୟ  ଓ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ  ଏହି ସୂଚନା ଦେଇଛନ୍ତି । ମନ୍ତ୍ରୀ  କହିଛନ୍ତି, ‘ମୁଖ୍ୟମନ୍ତ୍ରୀ କଳାକାର  ସହାୟତା’ ଯୋଜନାରେ ଆବେଦନ  କରିଥିବା ହିତାଧିକାରୀମାନଙ୍କ ବୟସ  ଏବଂ କଳାକ୍ଷେତ୍ରରେ ଦକ୍ଷତାକୁ ଭିତ୍ତି  କରି ଚୟନ କରାଯାଇଥାଏ । ଏଥିପାଇଁ  ଜିଲ୍ଲାପାଳଙ୍କ ଅଧ୍ୟକ୍ଷତାରେ ଗଠିତ ଚୟନ  କମିଟିରେ ଅଧ୍ୟକ୍ଷ ଭାବେ ଜିଲ୍ଲାପାଳ,  ଉପାଧ୍ୟକ୍ଷ ଭାବେ ଅତିରିକ୍ତ ଜିଲ୍ଲାପାଳ  ଏବଂ ସଦସ୍ୟ ଭାବେ ଜିଲ୍ଲା ସୂଚନା ଓ  ଲୋକ ସମ୍ପର୍କ ଅଧିକାରୀ, ଜିଲ୍ଲା ସଂସ୍କୃତି  ଅଧିକାରୀ ଓ ବ୍ଲକ୍‌ ଉନ୍ନୟନ ଅଧିକାରୀ  କାର୍ଯ୍ୟ କରିଥାନ୍ତି । ଚଳିତ ବର୍ଷ ମାର୍ଚ୍ଚ  ୧୫ରେ ପ୍ରକାଶିତ ବିଜ୍ଞାପନ ଅନୁଯାୟୀ  ଆବେଦନ ପ୍ରକ୍ରିୟା ଜୁନ୍‌ ୩୦ ରେ  ଶେଷ ହୋଇଛି । ହିତାଧିକାରୀଙ୍କ ଚୟନ  ପ୍ରକ୍ରିୟା ସରିନଥିବାରୁ ଜିଲ୍ଲାୱାରୀ ତାଲିକା  ପ୍ରଦାନ କରିବା ସମ୍ଭବପର ହେଉନାହିଁ ।  ଚୟନ ପ୍ରକ୍ରିୟା ଶେଷ ହେବା ପରେ ନୂଆ  ହିତାଧିକାରୀଙ୍କୁ କଳାକାର ସହାୟତା  ପ୍ରଦାନ କରାଯିବ ବୋଲି ମନ୍ତ୍ରୀ କହିଛନ୍ତି ।  

ଏହାବାଦ୍‌ କେନ୍ଦ୍ର ସରକାର ମାସିକ  ୬ ହଜାର ଟଙ୍କା କଳାକାର ଭତ୍ତା  ପ୍ରଦାନ କରନ୍ତି । ରାଜ୍ୟ ସରକାର ୮୦  ବର୍ଷରୁ କମ୍‌ ବୟସର କଳାକାରମାନଙ୍କୁ  ‘ମୁଖ୍ୟମନ୍ତ୍ରୀ କଳାକାର ସହାୟତା’  ଯୋଜନାରେ ମାସିକ ୨ ହଜାର ଟଙ୍କା  ସହାୟତା ଦେଉଛନ୍ତି । ଏମାନଙ୍କୁ କେନ୍ଦ୍ର  ସରକାର ୪ ହଜାର ଟଙ୍କା ଭତ୍ତା ପ୍ରଦାନ  କରିଥାନ୍ତି । ସେହିପରି ଯେଉଁ କଳାକାରଙ୍କ  ବୟସ ୮୦ ବର୍ଷରୁ ଊଦ୍ଧ୍ୱର୍ ସେମାନଙ୍କୁ  ରାଜ୍ୟ ସରକାର ‘ମୁଖ୍ୟମନ୍ତ୍ରୀ କଳାକାର  ସହାୟତା’ ଯୋଜନାରେ ମାସିକ ୨୫୦୦  ଟଙ୍କା ଦେଉଛନ୍ତି । ସେମାନଙ୍କୁ ମଧ୍ୟ  କେନ୍ଦ୍ର ସରକାର ୩୫୦୦ ଟଙ୍କା ଭତ୍ତା  ପ୍ରଦାନ କରିଥାନ୍ତି । କେନ୍ଦ୍ର କଳାକାର  ଭତ୍ତା ଯୋଜନାଟି ସଂସ୍କୃତି ମନ୍ତ୍ରଣାଳୟ  ଦ୍ୱାରା ପରିଚାଳିତ । ଏଣୁ ଉପକୃତ  କଳାକାରଙ୍କ ତାଲିକା ଏବଂ ଭତ୍ତା ବନ୍ଦ  ହୋଇଥିବା କଳାକାରଙ୍କ ତାଲିକା ଓ  ଭତ୍ତା ବନ୍ଦ ହେବାର କାରଣ ରାଜ୍ୟ  ସରକାରଙ୍କ ସଂସ୍କୃତି ବିଭାଗରେ ଉପଲବ୍ଧ  ନାହିଁ । ଏଥିନିମନ୍ତେ କଳାକାରଙ୍କୁ  ସଂସ୍କୃତି ମନ୍ତ୍ରଣାଳୟ ସହ ଯୋଗାଯୋଗ  କରିବାକୁ ପଡିବ ବୋଲି ମନ୍ତ୍ରୀ କହିଛନ୍ତି ।