ଭୁବନେଶ୍ୱର,୨୯/୦୪: ବଢ଼ିଚାଲିଛି ପିଲାଙ୍କ ‘ମମ୍ପସ୍’ ବା ‘ଗାଲୁଆ’ ରୋଗ । ଗତ ୬ ମାସ ହେଲାଣି ‘ଗାଲୁଆ’ ସାଙ୍ଘାତିକ ରୂପ ନେଇଛି । ‘ମମ୍ପସ୍’ ଭାଇରସ ସଂକ୍ରମଣରେ ପିଲାମାନେ ଯନ୍ତ୍ରଣା ଭୋଗୁଛନ୍ତି । ପ୍ରତିଦିନ ଗାଲୁଆରେ ଆକ୍ରାନ୍ତ ହୋଇ ଭୁବନେଶ୍ୱର ଏମ୍ସକୁ ପ୍ରାୟ ୬ ଜଣ ଶିଶୁ ଚିକିତ୍ସା ପାଇଁ ଆସୁଥିଲା ବେଳ କ୍ୟାପିଟାଲ୍ ହସ୍ପିଟାଲ୍କୁ ଆସୁଥିବା ଶିଶୁଙ୍କ ସଂଖ୍ୟା ପ୍ରାୟ ୨୦ । ଏହା ଏକ ସଂକ୍ରାମକ ରୋଗ ହୋଇଥିବାରୁ ଅଭିଭାବକଙ୍କ ପାଇଁ ଚିନ୍ତାର କାରଣ ପାଲଟିଛି ।
ଏମ୍ସ୍ ଶିଶୁ ରୋଗ ବିଶେଷଜ୍ଞ ପ୍ରଫେସର ରଶ୍ମୀରଞ୍ଜନ ଦାସ କହନ୍ତି, ଗତ ୬ ମାସ ହେଲାଣି ମମ୍ପସ୍ ସଂକ୍ରମିତ ରୋଗୀଙ୍କ ସଂଖ୍ୟା ବଢ଼ିଛି । ଏହା ଭୂତାଣୁ ଜନିତ ସଂକ୍ରମଣ । ବିଶେଷ କରି ୩ରୁ ୭ ବର୍ଷ ପିଲାଙ୍କ କ୍ଷେତ୍ରରେ ଏହା ଅଧିକା ମାତ୍ରାରେ ଦେଖାଦେଉଛି । ସଂକ୍ରମଣ ହେଲେ ପିଲାଙ୍କ ଗାଲ ଫୁଲି ଯାଉଛି । ତେବେ ପିଲାମାନେ ୫ରୁ ୭ଦିନ ଭିତରେ ସୁସ୍ଥ ହୋଇଯାଉଛନ୍ତି । କିଶୋର କିଶୋରୀ ବି ଏଥିରେ ସଂକ୍ରମିତ ହେଉଛନ୍ତି । ହେଲେ ସେମାନଙ୍କ ସଂଖ୍ୟା କମ୍ । ଗାଲୁଆ ସଂକ୍ରମଣ ଭବିଷ୍ୟତରେ ସଂକ୍ରମିତଙ୍କ ପ୍ରଜନନ କ୍ଷମତା ଉପରେ ପ୍ରଭାବ ପକାଇଥାଏ ବୋଲି ସେ କହିଛନ୍ତି ।
ପ୍ରଫେସର ଦାସ କହିଛନ୍ତି, ମମ୍ପସ୍ ଟିକା ବଜାରରେ ଉପଲବ୍ଧ । ସରକାର ଏହାକୁ ଯୋଗାଇ ଦେଉନାହାନ୍ତି । ଇଣ୍ଡିଆନ୍ ଏକାଡେମୀ ଅଫ୍ ପେଡିଆଟ୍ରିକ୍ସ ପକ୍ଷରୁ କେନ୍ଦ୍ର ସରକାରଙ୍କୁ ଟିକା ଦେବା ପାଇଁ ଅନୁରୋଧ କରାଯାଇଛି । ମମ୍ପସ ସଂକ୍ରମଣ ହେଲେ ପିଲାଙ୍କୁ ଜ୍ୱର ହେବା ସହ ମୁଣ୍ଡବିନ୍ଧା ଓ ଶରୀରରେ ଯନ୍ତ୍ରଣା ହୋଇଥାଏ । ଯଦି କୌଣସି ଶିଶୁ ସଂକ୍ରମିତ ଅଛନ୍ତି, ତାଙ୍କ ପାଖକୁ ପିଲାଙ୍କୁ ମିଶିବା ପାଇଁ ବାରଣ କରନ୍ତୁ ବୋଲି ସେ କହିଛନ୍ତି ।
