ନୂଆଦିଲ୍ଲୀ,୨୯।୩:  ମାଫିଆ ଡନ୍ ମୁଖତାର ଅନସାରୀର ହୃଦଘାତରେ ମୃତ୍ୟୁ ହୋଇଛି। ଗୁରୁବାର ସନ୍ଧ୍ୟାରେ ଦେହ ଖରାପ ହେବାପରେ ବାନ୍ଦା ଜେଲ୍‌ରୁ ରାଣୀ ଦୁର୍ଗାବତୀ ମେଡିକାଳ କଲେଜ ଅଣାଯାଇଥିଲା। ମୁଖତାର ଅନସାରୀର ମୃତ୍ୟୁ ପରେ ଏବେ ତା ପୁଅ ଉମର ଅନସାରୀ ପ୍ରଶାସନକୁ ଦାୟୀ କରିଛନ୍ତି। ସେ କହିଛନ୍ତି, ଜେଲ୍‌ ପ୍ରଶାସନ ତାଙ୍କ ବାପାଙ୍କୁ ସ୍ଲୋ ପଏଜନ୍ ଦେଉଥିଲେ।

ଉମର କହିଛନ୍ତି, ମୋ ବାପାଙ୍କୁ ଖାଦ୍ୟରେ ଧିମା ଜହର ଦିଆଯାଉଥିଲା। ସେ ନ୍ୟାୟପାଳିକାର ଦ୍ବାରସ୍ତ ହୋଇଥିଲେ। ଆମକୁ ପୁରା ଭରସା ରହିଛି। ମୋତେ ଜେଲ୍ ପ୍ରଶାସନ ପକ୍ଷରୁ କିଛି କୁହାଯାଇ ନଥିଲା। ଗଣମାଧ୍ୟମ ଜରିଆରେ  ଏ ବିଷୟରେ ଜାଣିଲି। ଏବେ ପୁରା ଦେଶ ସତ ଜାଣେ। ଦୁଇ ଦିନ ତ‌ଳେ ବାପାଙ୍କୁ ଦେଖା କରିବାକୁ ଆସିଥିଲି, ହେଲେ ଦେଖା କରିବାକୁ ଦେଲେନି।

ଉମର କହିଛନ୍ତି ସ୍ଲୋ ପଏଜନ୍ ଦିଆଯାଉଥିବାର ମୁଁ ବହୁବାର କହିଛି, ଏପରିକି ମରିବା ପୂର୍ବରୁ ଫୋନ୍‌ରେ ବାପା ପୂର୍ବରୁ କହୁଥିଲେ। ୧୯ ମାର୍ଚ୍ଚରେ ତାଙ୍କୁ ଡିନରରେ ବିଷ ଦେଇଥିଲେ। ଉମର ଅନସାରୀ କହିଥିଲେ, ଆଜି ତାଙ୍କର ପୋଷ୍ଟମର୍ଟମ ହେବ। ପୋଷ୍ଟମର୍ଟମ ପାଇଁ ପ୍ରାୟ ୫ ଜଣ ଡାକ୍ତରଙ୍କ ପ୍ୟାନେଲ କରାଯାଇଛି। ମୁଖତାର ଅନସାରୀଙ୍କ ମୃତଦେହକୁ ବାନ୍ଦା ମେଡିକାଲ କଲେଜ ହସ୍ପିଟାଲରେ ପୋଷ୍ଟମର୍ଟମ ପାଇଁ ପଠାଇ ଦିଆଯାଇଛି।