ପୁରୀ, ୧୪/୦୮ : ରଥଯାତ୍ରା ସରିଛି । ରଥ ଖୋଲା ହେବା ପ୍ରକ୍ରିୟା ମଧ୍ୟ ଆରମ୍ଭ ହୋଇସାରିଛି । ଦେବୀ ସୁଭଦ୍ରାଙ୍କ ରଥ ଖୋଲା ଆପାତଃ ସରିଥିବା ବେଳେ ଆଗକୁ ବଳଭଦ୍ର ଓ ଶେଷରେ ମହାପ୍ରଭୁ ଶ୍ରୀଜଗନ୍ନାଥ ରଥ ଖୋଲାଯିବ । ମହାପ୍ରଭୁଙ୍କ ଦିବ୍ୟ ସ୍ପର୍ଶ ପାଇ ଏହି ରଥ ଦିବ୍ୟତା ପାଇଛି । ପ୍ରତିବର୍ଷ ପରି ଚଳିତ ବର୍ଷ ଶ୍ରୀଜଗନ୍ନାଥ ମନ୍ଦିର ପ୍ରଶାସନ ପକ୍ଷରୁ ରଥ ଅଂଶଗୁଡ଼ିକୁ ବିକ୍ରି କରି କିଛି ରାଜସ୍ୱ ଆଦାୟ ନିମନ୍ତେ ପଦକ୍ଷେପ ନିଆଯାଇଛି । ଏଥିନିମନ୍ତେ ରଥର ଚକ, ପ୍ରଭା, ଗୁଜ, ଅଂଶୁଆରୀ ବିକ୍ରି ନିମନ୍ତେ ସଂଶୋଧିତ ଏସ୍‌ଓପି ସହ ଦର ପ୍ରକାଶ ପାଇଛି । ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥ ପ୍ରତି ଚକା ମୂଲ୍ୟ ୧ ଲକ୍ଷ ଟଙ୍କା ରଖାଯାଇଛି । ଯେତେବେଳେ କି ବଡ଼ଠାକୁରଙ୍କ ତାଳଧ୍ୱଜ ରଥ ପ୍ରତି ଚକ ମୂଲ୍ୟ ୬୦ ହଜାର ଓ ଦେବୀ ସୁଭଦ୍ରାଙ୍କ ଦର୍ପଦଳନ ରଥର ପ୍ରତି ଚକ ଦର ୫୦ ହଜାର ଟଙ୍କା ରଖାଯାଇଛି । 

ପ୍ରତି ରଥର ଗୁଜ ଓ ଅନଶୁଆରୀ ଦର ୧୦ ହଜାର ଟଙ୍କା ଲେଖାଏଁ ରହିଥିବା ବେଳେ ପ୍ରଭାଦର ୨୫ ହଜାର ଟଙ୍କା ରହିଛି । ପ୍ରତି ରଥର ଗୋଟିଏ ଲେଖାଏଁ ଚକା ନେବାକୁ ଚାହୁଁଥିବା ବ୍ୟକ୍ତି ୨ ଲକ୍ଷ ଟଙ୍କା ଜମା କରି ଏସବୁ ପାଇପାରିବେ । ଏହି ରଥ ଉପକରଣଗୁଡ଼ିକ ନେବା ନିମନ୍ତେ ଆଶୟୀ ବ୍ୟକ୍ତି ଓ ସଂସ୍ଥାମାନେ ଶ୍ରୀମନ୍ଦିର ପ୍ରଶାସନ ପାଖରେ ଏକ ନିର୍ଦ୍ଧାରିତ ଫର୍ମରେ ଆବଦେନ କରିବେ ସହ ୧ ହଜାର ଟଙ୍କାର ରସିଦ୍‌ ଦାଖଲ କରିବେ । ଚଳିତ ବର୍ଷ ସେପ୍ଟେମ୍ବର ୧୫ ତାରିଖ ଆବେଦନର ଶେଷ ସମୟ ନିର୍ଘଣ୍ଟ ହୋଇଛି ।