ନୂଆଦିଲ୍ଲୀ,୦୭/୦୫: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କର୍ଣ୍ଣାଟକ ସରକାରଙ୍କ ଉପରେ ବର୍ଷିଛନ୍ତି। ସେ କହିଛନ୍ତି ଯେ ପ୍ରଜ୍ଜ୍ବଳ ରେବନ୍ନାଙ୍କ ପରି କାହାକୁ ଆଦୌ ବରଦାସ୍ତ କରାଯିବା ଉଚିତ ନୁହେଁ। ସେ କର୍ଣ୍ଣାଟକରେ ଜେଡିଏସ୍ ସାଂସଦଙ୍କୁ ଦେଶ ଛାଡିବାକୁ ଅନୁମତି ଦେଇଥିବା କଂଗ୍ରେସ ସରକାର ଏବଂ ଆପତ୍ତିଜନକ ଯୌନ ଭିଡିଓ ଜାରିକୁ ନେଇ ଅଭିଯୋଗ କରିଛନ୍ତି। ମୋଦୀ କହିଛନ୍ତି ଯେ ଏହି ପ୍ରସଙ୍ଗରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ରାଜ୍ୟ ସରକାରଙ୍କ ଦାୟିତ୍ବ ଅଟେ କାରଣ ଏହା ଏକ ଆଇନଗତ ପ୍ରସଙ୍ଗ ଅଟେ।

ଏକ ଗଣମାଧ୍ୟମକୁ ସାକ୍ଷାତକାର ଦେଇ ମୋଦୀ କହିଛନ୍ତି ଯେ ହଜାର ହଜାର ଭିଡିଓର ଉପସ୍ଥିତି ଦର୍ଶାଉଛି ଯେ ଏହା ସେହି ସମୟର ଯେତେବେଳେ କି ଜେଡିଏସ୍ ଏବଂ କଂଗ୍ରେସ ମଧ୍ୟରେ ଏକ ମେଣ୍ଟ ହୋଇଥିଲା। କ୍ଷମତାରେ ଥିବାବେଳେ ଏହି ଭିଡିଓଗୁଡିକ ସଂଗ୍ରହ କରାଯାଇଥିଲା। କିନ୍ତୁ, ଭୋକ୍କାଲିଗା ପ୍ରାଧାନ୍ୟ ଅଞ୍ଚଳରେ ଭୋଟ୍ ଶେଷ ହେବା ପରେ ଏଗୁଡିକ ଜାରି କରାଯାଇଥିଲା। ଘଟଣାକ୍ରମକୁ ଅତ୍ୟନ୍ତ ସନ୍ଦେହଜନକ ବୋଲି ବର୍ଣ୍ଣନା କରି ପ୍ରଧାନମନ୍ତ୍ରୀ କହିଛନ୍ତି ଯେ,' ପ୍ରଜ୍ଜ୍ବଳ ରେବନ୍ନା ଦେଶ ଛାଡ଼ିବା ପରେ ଭିଡିଓଗୁଡ଼ିକ ରିଲିଜ କରାଯାଇଛି। ଯଦି ରାଜ୍ୟ ସରକାରଙ୍କ ପାଖରେ ଏହି ସୂଚନା ଥିଲା, ତେବେ ସେ ଏହା ଉପରେ ନଜର ରଖିବାର ଥିଲା। ବିମାନ ବନ୍ଦର ଉପରେ ମଧ୍ୟ ନଜର ରଖାଯିବାର ଥିଲା।

କେନ୍ଦ୍ର ସରକାରଙ୍କୁ ଏ ସମ୍ପର୍କରେ କୌଣସି ସୂଚନା ଦିଆଯାଇନାହିଁ:

ପ୍ରଧାନମନ୍ତ୍ରୀ ମୋଦୀ ଏହି ମନ୍ତବ୍ୟ ଏମିତି ଏକ ସମୟରେ ଦେଇଛନ୍ତି, ଯେତେବେଳେ କଂଗ୍ରେସ ଏହି ପ୍ରସଙ୍ଗରେ ତାଙ୍କ ନିରବତା ଉପରେ କ୍ରମାଗତ ପ୍ରଶ୍ନ ଉଠାଇଆସୁଥିଲା। ମୋଦୀ କହିଛନ୍ତି, 'ଆପଣ କିଛି କରିନାହାନ୍ତି। ଭାରତ ସରକାରଙ୍କୁ ସୂଚନା ଦିଆଯାଇ ନାହିଁ। ଏହାର ଅର୍ଥ ଏହା ଏକ ରାଜନୈତିକ ଖେଳ ଥିଲା। ତଥାପି, ଏହା ମୋର ପ୍ରସଙ୍ଗ ନୁହେଁ। ମୋର କଥା ହେଉଛି କୌଣସି ଅପରାଧୀକୁ ରକ୍ଷା କରାଯିବା ଉଚିତ୍ ନୁହେଁ। ଏହି ପ୍ରକାର ଖେଳ ଆମ ଦେଶରେ ବନ୍ଦ ହେବା ଉଚିତ୍।' 

ନିର୍ବାଚନକୁ ପ୍ରଭାବିତ କରିବାକୁ ଅଙ୍କୁଶ ଆଣୁଛି ଦୁନିଆ: 

ଭାରତର ଲୋକସଭା ନିର୍ବାଚନରେ ବିଦେଶୀ ଶକ୍ତି ପ୍ରଭାବ ପକାଉଛି ବୋଲି ସ୍ୱୀକାର କରି ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ବିଶ୍ୱ କେବଳ ମତାମତ ଦେବା ଅପେକ୍ଷା ଅଧିକ କରିବାକୁ ଚେଷ୍ଟା କରୁଛି। ତେବେ ଏଭଳି ଉଦ୍ୟମ ଶେଷରେ ବିଫଳ ହେବ ବୋଲି ସେ କହିଛନ୍ତି। ପ୍ରଧାନମନ୍ତ୍ରୀ କହିଛନ୍ତି, 'ମୁଁ ଭାବୁଛି ଏହି ବିରୋଧ କେବଳ ଜୁନ୍ ୪ ପର୍ଯ୍ୟନ୍ତ ଚାଲିବ। ଏହା ପରେ ଏହି ଲୋକମାନଙ୍କର ଶକ୍ତି କିମ୍ବା ଅସ୍ତିତ୍ୱ ରହିବ ନାହିଁ। କେବଳ ମୋ ଦେଶର ଶକ୍ତି ଏବଂ ଆମର ଉଜ୍ଜ୍ୱଳ ଗଣତନ୍ତ୍ର ବଞ୍ଚିବ। ଭାରତ ଗଣତନ୍ତ୍ରକୁ ଏକ ନୂଆ ଦୃଷ୍ଟିକୋଣରୁ ଦେଖିବ ଦୁନିଆ।'