କଟକ ୦୯/୦୯: ପୁଲିସ୍‌କୁ ସବୁ କାମରେ ସହଯୋଗ କରିଆସୁଛୁ ।  ଅପରାଧୀମାନଙ୍କ ବାବଦରେ ଗୋପନୀୟ ତଥ୍ୟ ପ୍ରଦାନଠାରୁ ଆରମ୍ଭ କରି  ୱାରେଣ୍ଟ ଧରପଗଡ଼ ଆଦି ବିଭିନ୍ନ କାର୍ଯ୍ୟ ପୁଲିସ ସହ ମିଶି କାମ କରୁଛୁ ।  ହେଲେ ସେହି ଅନୁସାରେ ପାରିଶ୍ରମିକ କିମ୍ବା ସରକାରୀ ସୁବିଧା ମିଳୁନାହିଁ ।  ଆନ୍ଧ୍ର, ଛତିଶଗଡ଼, ପଶ୍ଚିମବଙ୍ଗ, ଝଡ଼ଖଣ୍ଡ ରାଜ୍ୟ ସମେତ ଦେଶର ଅନ୍ୟ  ରାଜ୍ୟଗୁଡ଼ିକରେ ଗ୍ରାମରକ୍ଷୀମାନେ ମାସିକ ୧୫ ହଜାରରୁ ୧୮ ହଜାର ଟଙ୍କା  ଦରମା ପାଉଥିବା ବେଳେ ଓଡ଼ିଶାରେ ଗ୍ରାମରକ୍ଷୀମାନେ ମାତ୍ର ୧୮ ଶହ ଟଙ୍କା  ଭତ୍ତା ପାଉଛନ୍ତି । ଯାହାକି ଗ୍ରାମରକ୍ଷୀ ଓ ତାଙ୍କ ପରିବାର ପ୍ରତି ଉପହାସ ବୋଲି  ଓଡ଼ିଶା ନିଖିଳ ଉତ୍କଳ ଗ୍ରାମରକ୍ଷୀ ମହାସଂଘ ଅଭିଯୋଗ କରିଛି ।  

ମହାସଂଘ ସଭାପତି ରତ୍ନାକର ନାୟକଙ୍କ ଅଧ୍ୟକ୍ଷତାରେ କଟକରେ ଆୟୋଜିତ  ପ୍ରତିବାଦରେ ସଭାରେ ଗ୍ରାମରକ୍ଷୀମାନଙ୍କୁ ସରକାର ଅଣଦେଖା କରୁଥିବା ନେଇ ଅଭିଯୋଗ କରାଯାଇଥିଲା । ଗ୍ରାମରକ୍ଷୀମାନଙ୍କ ବିଭିନ୍ନ ସମସ୍ୟା ଦୂର ପାଇଁ ୧୦ଟି  ଦାବି ସମ୍ପର୍କରେ ସଦସ୍ୟମାନେ ଆଲୋଚନା କରିଥିଲେ। ତେବେ ସରକାର ଯଦି  ଏହି ଦାବି ପୂରଣ ନକରନ୍ତି ତେବେ ଆସନ୍ତା ୨୫ ତାରିଖରୁ ଗ୍ରାମରକ୍ଷୀମାନେ  ରାଜ୍ୟବ୍ୟାପୀ ଆନ୍ଦୋଳନକୁ ଓହ୍ଲାଇବେ ବୋଲି ସଭାପତି ଶ୍ରୀ ନାୟକ ଓ ସମ୍ପାଦକ  କିଶୋର ମଲ୍ଲିକ୍‌ ଚେତାବନୀ ଦେଇଛନ୍ତି। 

ମହାସଂଘର ସଦସ୍ୟମାନେ କହିଛନ୍ତି, ମାତ୍ର ୧୮ ଶହ ଟଙ୍କାରେ ପରିବାର  ଚଳେଇବା ତ ଦୂରର କଥା ନିଜେ ଚଳିବା ବି ସମ୍ଭବ ହେଉନି । ଦୀର୍ଘଦିନ ହେଲା  ଗ୍ରାମରକ୍ଷୀମାନେ ବିଭିନ୍ନ ସମସ୍ୟା ନେଇ ପୁଲିସ ଡିଜିଙ୍କଠାରୁ ଆରମ୍ଭ କରି ଅନ୍ୟ  ଉପରିସ୍ଥ ଅଧିକାରୀମାନଙ୍କୁ ଜଣାଇ ଆସୁଛନ୍ତି । ହେଲେ ଗ୍ରାମରକ୍ଷୀଙ୍କ ସମସ୍ୟା କଥା  କେହି ଶୁଣିବାକୁ ପ୍ରସ୍ତୁତ ନାହାନ୍ତି ବୋଲି ସଭାପତି ଶ୍ରୀ ନାୟକ ଅଭିଯୋଗ କରିଛନ୍ତି ।  ଗ୍ରାମରକ୍ଷୀମାନଙ୍କ ସମସ୍ୟାର ସମାଧାନ ଓ ଦାବି ପୂରଣ ଲାଗି ହାଇକୋର୍ଟ ନିର୍ଦ୍ଦେଶ  ଦେଇଥିଲେ ମଧ୍ୟ ସରକାର ଏଥିପ୍ରତି ଦୃଷ୍ଟି ଦେଉନାହାନ୍ତି । 

ନୂଆ ସରକାର ଆମ  ଦାବିଗୁଡ଼ିକ ପୂରଣ କରିବା ଦିଗରେ ପଦକ୍ଷେପ ନେବେ ବୋଲି ଆଶା କରୁଛି  ବୋଲି ସମ୍ପାଦକ ଶ୍ରୀ ମଲ୍ଲିକ୍‌ କହିଛନ୍ତି । ବିଶେଷକରି ଗ୍ରାମରକ୍ଷୀଙ୍କୁ ଚତୁର୍ଥ ଶ୍ରେଣୀ  କର୍ମଚାରୀ ମାନ୍ୟତା, ମାସିକ ଦରମା ୧୫ ହଜାର ଟଙ୍କା, ଥାନା ସ୍ତରରେ ଖାଲିଥିବା  ଗ୍ରାମରକ୍ଷୀ ପଦବି ପୂରଣ, ଅବସରଙ୍କୁ ପେନସନ୍‌, ୨୦ ଲକ୍ଷ ଟଙ୍କା ଜୀବନ ବୀମା,  ମାଓ ହିଂସାକାଣ୍ଡରେ ପ୍ରାଣ ହରାଉଥିବା ଗ୍ରାମରକ୍ଷୀଙ୍କ ପରିବାରକୁ ୫୦ ଲକ୍ଷ  ଟଙ୍କା କ୍ଷତିପୂରଣ ପ୍ରଦାନ କରିବା ଲାଗି ମହାସଂଘ ଦାବି କରିଛି । ତେବେ ଉକ୍ତ  ଦାବି ପୂରଣ ସରକାର ପଦକ୍ଷେପ ନନେଲେ ଥାନାସ୍ତରରେ ପୁଲିସ୍‌କୁ କର୍ଯ୍ୟରେ  ଅସହଯୋଗ କରିବା ସହ କାର୍ଯ୍ୟ ବନ୍ଦ କରିବୁ ବୋଲି ସଦସ୍ୟମାନେ କହିଛନ୍ତି ।