ପୁରୀ,୨୮/୦୩: ଦୋଳପୂର୍ଣ୍ଣମୀରେ ଦୋଳବେଦିରେ ପଢ଼ା ହୋଇଛି ପାଞ୍ଜି । ଚଳିତ ବର୍ଷ ଦେଶ ଓ ରାଜ୍ୟ ନିମନ୍ତେ କେତେ ଶୁଭାଶୁଭ ତାହା ପାଞ୍ଜି ପଢ଼ି ଶୁଣାଇଛନ୍ତି ପଞ୍ଜିକାର ବା ଜ୍ୟୋତିଷ । ଗଜପତି ଦିବ୍ୟସିଂହ ଦେବଙ୍କ ରାଜନଅର ଜ୍ୟୋତିଷ ତଥା ରାଜପଣ୍ଡିତ ଶିବନାରାୟଣ ମହାପାତ୍ର ଚଳିତ ବର୍ଷର ଶୁଭଅଶୁଭ ଫଳାଫଳ ଘୋଷଣା କରିଛନ୍ତି । ତାଙ୍କ ଆକଳନ ଅନୁସାରେ ଦେଶକୁ ଚଳିତ ବର୍ଷ ଖୁବ୍ ଶୁଭଫଳ ମିଳିବ, ଯେତେବେଳେ କି ରାଜ୍ୟ ନିମନ୍ତେ ବିଶେଷ ଶୁଭଫଳ ମିଳିବନି ।
ସେ କହିଛନ୍ତି, ଏବର୍ଷ ରାଜା ଚନ୍ଦ୍ର ଓ ମନ୍ତ୍ରୀ ରବି ରହିଛନ୍ତି । ଏଭଳି ଯୋଗ ରହିଥିବାରୁ ପ୍ରଜାମାନେ ସାମାନ୍ୟ ପୀଡ଼ିତ ରହିବେ । ଆମ ଦେଶର ମକର ରାଶି ହୋଇଥିବାରୁ ଶନି, ବୃହସ୍ପତିଙ୍କ ସମେତ ଅନ୍ୟ ରାଶିଙ୍କ ଶୁଭ ଦୃଷ୍ଟି ରହିଛି । ତେଣୁ କେନ୍ଦ୍ରସ୍ଥଳରେ ବିଶେଷ କିଛି ଅସୁବିଧା ନାହିଁ । କଥାରେ ଅଛି ୫୦ ମରୁଡ଼ି, ୧୦୦ରେ ଧୋଇ, ୮୦/୯୬ କ୍ଷେତ ଦଳେଇ । ଅର୍ଥାତ୍ ୫୦ ଦିନରୁ କମ୍ ବର୍ଷା ହେଲେ ମରୁଡ଼ି, ୧୦୦ ଦିନରୁ ଅଧିକ ବର୍ଷା ହେଲେ ବଢ଼ି ଓ ୮୦ରୁ ୯୬ ଦିନ ବର୍ଷା ହେଲେ ଭଲ ଶସ୍ୟ ଅମଳ ହୋଇଥାଏ । ଏବର୍ଷ ୯୬ଦିନ ବର୍ଷା ପାଳକ ରହିଛି । ଏଥିଯୋଗୁ ଭଲ କୃଷି ଉତ୍ପାଦନ ହେବା କଥା । ଯେହେତୁ ମେଘର ଅବସ୍ଥା ବାଳକ, ତେଣୁ ସମସ୍ତ ସ୍ଥାନରେ ବୃଷ୍ଟି ଠିକ୍ ଭାବେ ହେବନି । କେଉଁଠି ଅଧିକ ବୃଷ୍ଟି ହେବ ତ କେଉଁଠି କମ୍ ହେବ । ସେହିପରି ଜ୍ୟୋତିଷ ଗଣନାରେ ଗଣ୍ଡା’ ହିସାବ ଲାଗିଲେ ଶସ୍ୟ ଆୟ ଭଲ ହୁଏ । ଚଳିତ ବର୍ଷ ଶସ୍ୟ ଆୟ ୪ ବିଶ୍ୱା ୪ ଗଣ୍ଡା ରହିଛି । ଶସ୍ୟ, ସୁନା, ରୁପାର ମାଲିକ ଚଳିତ ବର୍ଷ ଗୋପାଳୁନି ରହିଛନ୍ତି । ଗୋପାଳୁନିଙ୍କ ହାତରେ ଏସବୁ ରହିଲେ ସବୁକିଛି ସୁରୁଖୁରୁରେ ଚଳେଇ ନେଇପାରନ୍ତି ।
ଆମ ରାଜ୍ୟର ରାଶି ବୃଷ । ଦୁଇଟି ଗ୍ରହର ଖରାପ ପ୍ରଭାବ ରାଜ୍ୟ ଉପରେ ପଡ଼ିବ । ପଞ୍ଚଗ୍ରହ କୁଟ ଯୋଗ ଓଡ଼ିଶା ଉପରେ ରହିଛି । ଏଥିସହ ବୃହସ୍ପତି ଜନ୍ମ ରାଶିକୁ ଆସୁଛନ୍ତି । ଏହା ପ୍ରଜା ଓ ରାଜ୍ୟ ପାଇଁ ବିଶେଷ ଭଲ ନୁହେଁ । ରାଜ୍ୟ ଉପରେ ବାତ୍ୟା ପ୍ରଭାବ ପଡ଼ିବା ଆଶଙ୍କା ରହିଛି । ପ୍ରଜାମାନେ ପୀଡ଼ିତ ରହିବେ । ଶନି ଗ୍ରହ କୁମ୍ଭ ରାଶିରେ ଥିବା ବେଳେ ପ୍ରାୟ ୧୦ ମାସ ପରେ ଅର୍ଥାତ୍ ଆସନ୍ତା ବର୍ଷ ମୀନ ରାଶିକୁ ଗମନ କରିବେ । ଏହି ସମୟ ଭିତରେ ଅର୍ଥ, ଆସ୍ଥାନ, ଧନ ପ୍ରଭୃତି ୫ ସ୍ଥାନରେ ଶନି ଅଧିପତି ରହିଛନ୍ତି । ତେଣୁ ଏହା ଶୁଭଦାୟକ ହୋଇନଥିବାରୁ ବିଭିନ୍ନ ପ୍ରକାର ଦ୍ୱନ୍ଦ୍ୱ, ଗଣ୍ଡଗୋଳ ପରିସ୍ଥିତି ଉପୁଯିବ । ପ୍ରଜାମାନେ ବିଭିନ୍ନ ପ୍ରକାର କଷ୍ଟ ପାଇବେ ।
ରାଜନୈତିକ ଦୃଷ୍ଟିକୋଣରୁ ଭାରତ ସରକାରରେ ଥିବା ଦଳ ପାଇଁ ବିଶେଷ ଶୁଭଙ୍କର ସ୍ଥିତି ଆସିବ । ମକର, କନ୍ୟା, ମିଥୁନ, ସିଂହକୁ ବିଶେଷ ଭଲ ରହିଛି । ବୃଷ, କୁମ୍ଭ, ମୀନ ରାଶିକୁ ବିଶେଷ ଅଶୁଭ ଫଳ ରହିଛି । ରାଜ୍ୟ ପାଇଁ ଚଳିତ ବର୍ଷ ଅଗ୍ନି ହନୁମାନଙ୍କ ଲାଙ୍ଗୁଡ଼ରେ ରହିଛି । ତେଣୁ ଅଗ୍ନିକାଣ୍ଡର ଅନେକ ଘଟଣା ସାମ୍ନାକୁ ଆସିବା ସମ୍ଭାବନା ରହିଛି ।
ବୃହସ୍ପତି ଯେତେବେଳେ ବୃଷ ରାଶିକୁ ପ୍ରବେଶ କରିବେ ପଞ୍ଚଗ୍ରହ କୁଟ ସ୍ଥିତି ଉତ୍ପନ୍ନ ହେବ । ତେଣୁ ଏହି ସ୍ଥିତିରେ ପଞ୍ଚଗ୍ରହ ବା ରବି, ଚନ୍ଦ୍ର, ବୁଧ, ବୃହସ୍ପତି ଓ ରାହୁଙ୍କୁ ଶାନ୍ତ ରଖିବା ନିମନ୍ତେ ବିଶେଷ ପୂଜାପାଠର ଆୟୋଜନ କରିବା ଉଚିତ୍ । ଶିବାଳୟରେ ଥିବା ଗ୍ରହମାନଙ୍କୁ ଶ୍ରଦ୍ଧାଳୁମାନେ ପୂଜାପାଠ କରି ବିଘ୍ନ ଦୂର କରିପାରିବେ । ଶ୍ରୀମନ୍ଦିର ଯେକୌଣସି ଦ୍ୱାରରେ ବୃହସ୍ପତିଙ୍କ ନିମନ୍ତେ ଯଜ୍ଞ ଓ ଦାନ କରି ଶ୍ରଦ୍ଧାଳୁମାନେ ମଧ୍ୟ ଶୁଭ ଫଳ ପାଇପାରିବେ ।
ଜ୍ୟୋତିଷ ଶାସ୍ତ୍ର ଅନୁଯାୟୀ ଗଣନା କରି ପାଞ୍ଜିରେ ଚଳିତ ବର୍ଷ ପାଇଁ ଫଳାଫଳ ଲିଖିତ ହୋଇଛି । ସରସ୍ୱତୀ ପୂଜା ଦିନ ମହାପ୍ରଭୁଙ୍କ ପାଖରେ ଗୁପ୍ତରେ ପୂଜା କରାଯାଏ । ଫାଲଗୁନ ଶୁକ୍ଳ ପୂର୍ଣ୍ଣମୀ ଦିନ ମହାପ୍ରଭୁଙ୍କ ଚଳନ୍ତି ପ୍ରତିମା ଦୋଳଗୋବିନ୍ଦ ଦୋଳବେଦୀରେ ବିଜେ କରିଥିବା ବେଳେ ପାଞ୍ଜି ପାଠ ହୋଇଥାଏ । ସତ୍ୟଯୁଗରେ ବୃହସ୍ପତି ପଞ୍ଜିକାର ଭାବେ ନାରାୟଣ ଓ ମହାଦେବଙ୍କୁ ବର୍ଷକର ତିଥି, ଲଗ୍ନ, ଶୁଭ, ଅଶୁଭ, ହାନି, ଲାଭ ପ୍ରଭୃତି ଫଳାଫଳ ବିଷୟରେ ପଢ଼ି ଶୁଣାଉଥିଲେ । ଏହାକୁ ଅନୁକରଣ କରି ଜ୍ୟୋତିଷମାନେ ପରେ ମୃତ୍ୟୁଲୋକବାସୀଙ୍କୁ ଦିବ୍ୟଜ୍ଞାନ ଲାଭ ନିମନ୍ତେ ପାଞ୍ଜି ପଢ଼ି ଶୁଣାଉଛନ୍ତି ବୋଲି ଶ୍ରୀ ମହାପାତ୍ର କହିଛନ୍ତି।
