ଭୁବନେଶ୍ୱର,୧୮/୦୩: ଜଟଣୀ ବ୍ଲକ ଅନ୍ତର୍ଗତ କୁଦିଆରୀ ଗ୍ରାମର ରକ୍ତହୀନତାରେ ପୀଡ଼ିତ ଜଣେ କୁନି ଝିଅ ଗତ ୫ତାରିଖରେ ଭୁବନେଶ୍ୱର ମହାନଗର ନିଗମ ହସ୍ପିଟାଲରେ ଭର୍ତ୍ତି ହୋଇଥିଲା । ଚିକିତ୍ସା ପାଇଁ ତାକୁ ରକ୍ତର ଆବଶ୍ୟକତା ହେଉଥିବା ବେଳେ ହସ୍ପିଟାଲର ରକ୍ତ ଭଣ୍ଡାରରେ ରକ୍ତ ନଥିଲା । ଯଦି ରକ୍ତ ଯୋଗାଡ଼ କରିବେ ତେବେ ରକ୍ତ ମିଳିବ ବୋଲି ସଫାସଫା କହିଥିଲେ ବ୍ଲଡ୍ ବ୍ୟାଙ୍କ କର୍ମଚାରୀ । କଣ କରିବେ, ଝିଅକୁ କେଉଁଠୁ ରକ୍ତ ଦେବେ ତାକୁ ନେଇ ଚିନ୍ତାରେ ପଡ଼ିଥିଲେ ଝିଅର ବାପା । ସମୟ ବିତୁଥାଏ । ହେଲେ ରକ୍ତ ମିଳୁନଥାଏ । ଏହି ସମୟରେ ଜଣେ ସ୍ୱେଚ୍ଛାସେବୀ ସେଠାରେ ପହଞ୍ଚି ରକ୍ତ ଦେଇଥିଲେ ।
ସେହିପରି ସପ୍ତାହକ ତଳେ ଏମ୍ସରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିଥିଲା । ପଶ୍ଚିମବଙ୍ଗର ଜଣେ କ୍ୟାନସର ରୋଗୀଙ୍କ ଅପରେସନ ପାଇଁ ତିନି ୟୁନିଟ୍ ‘ଓ ପଜିଟିଭ୍’ ରକ୍ତ ଆବଶ୍ୟକ ହୋଇଥିଲା । ହେଲେ ହସ୍ପିଟାଲରେ ରକ୍ତ ନ ଥିଲା । ଏଭଳି ସମୟରେ ଇନଷ୍ଟାବ୍ଲଡର ତିନିଜଣ ଡୋନର୍ ସେଠାରେ ପହଞ୍ଚି ରକ୍ତ ଦେଇଥିଲେ ।
ଏବେ କ୍ୟାପିଟାଲ ହସ୍ପିଟାଲରେ ମଧ୍ୟ ସ୍ଥିତି ସଙ୍ଗୀନ ହୋଇପଡ଼ିଛି । ଦୈନିକ ହସ୍ପିଟାଲରେ ଆବଶ୍ୟକ ହୋଇଥାଏ ୯୦ରୁ ୧୦୦ ୟୁନିଟ ରକ୍ତ । ହେଲେ ଏବେ ସେଠାରେ ମାତ୍ର ୧୦ରୁ ୨୦ ୟୁନିଟ ରହୁଛି । ସେହିପରି ପୁରୁଣା ଭୁବନେଶ୍ୱରବାସୀଙ୍କ ଏକମାତ୍ର ସାହାରା ବିଏମ୍ସି ହସ୍ପିଟାଲରେ ମଧ୍ୟ ରକ୍ତକୁ ନେଇ ଶୋଚନୀୟ ସ୍ଥିତି ଦେଖିବାକୁ ମିଳିଛି । ଦୈନିକ ସେଠାରେ ପାଖାପାଖି ୩୦ରୁ ୪୦ ୟୁନିଟ ରକ୍ତ ଦରକାର। ମାତ୍ର ୫ରୁ ୬ ୟୁନିଟ ରକ୍ତ ରହୁଛି । କିଛିଦିନ ତଳେ ରକ୍ତ ଦେବାକୁ ନେଇ ସେଠାରେ ଉତ୍ତେଜନା ଦେଖିବାକୁ ମିଳିଥିଲା। ଜଣେ ଯୁବକଙ୍କ ରକ୍ତ ଦରକାର ହେଉଥିବା ବେଳେ ରକ୍ତ ଭଣ୍ଡାରରେ ରକ୍ତ ନଥିଲା ଯାହାକୁ ନେଇ ସଂପୃକ୍ତ ଯୁବକ ଓ କର୍ମଚାରୀଙ୍କ ମଧ୍ୟରେ ଯୁକ୍ତିତର୍କ ହୋଇ ହାତାହାତି ପର୍ଯ୍ୟନ୍ତ କଥା ଯାଇଥିଲା । ତେବେ ରକ୍ତ ଭଣ୍ଡାର କର୍ତ୍ତୃପକ୍ଷଙ୍କ ହସ୍ତକ୍ଷେପ ପରେ ସ୍ଥିତି ଶାନ୍ତ ପଡ଼ିଥିଲା। କ୍ୟାପିଟାଲ ହସ୍ପିଟାଲ ଓ ବିଏମ୍ସି ହସ୍ପିଟାଲକୁ ଆସୁଥିବା ସିକିଲ୍ସେଲ୍ ଓ ଗର୍ଭବତୀ ରୋଗୀ ରକ୍ତାଭାବର ଶିକାର ହେଉଛନ୍ତି।
ଭୁବନେଶ୍ୱରରେ ରେଡକ୍ରସର ଏକ ନୂଆ ରକ୍ତ ଭଣ୍ଡାର ଖୋଲାଯାଇଛି । ମାତ୍ର ବର୍ଷକ ମଧ୍ୟରେ ଏହା ପ୍ରାୟ ୧୦୦ଟି ଶିବିର କରିବା ସହ ୧୫ହଜାର ୟୁନିଟ ରକ୍ତ ସଂଗ୍ରହ କରିଛି । ହେଲେ ଏବେ ଶିବିର ନ ଥିବାରୁ ରକ୍ତ ପରିମାଣ କମିଛି । ତଥାପି ରେଡକ୍ରସ ବିଭିନ୍ନ ସଙ୍ଗଠନ ସହ ଆଲୋଚନା କରି ରକ୍ତଦାନ ପାଇଁ ସହଯୋଗ ଲୋଡୁଛି । ୨୦୧୫ରୁ ବିଜେଡିର ଜୀବନବିନ୍ଦୁ ରାଜ୍ୟସାରା ଆୟୋଜନ ହେଉଛି। ଜୀବନବିନ୍ଦୁରୁ ଆସୁଥିବା ପ୍ରାୟ ୮୦ରୁ ୯୦ ପ୍ରତିଶତ ରକ୍ତ ବିଭିନ୍ନ ସରକାରୀ ହସ୍ପିଟାଲକୁ ଯିବା ସହ ରକ୍ତାଭାବକୁ ଭରଣା କରେ । ଚଳିତବର୍ଷ ଫେବ୍ରୁଆରୀ ମାସରେ ଜୀବନବିନ୍ଦୁ ମାଧ୍ୟମରେ ସାରା ରାଜ୍ୟରୁ ୩ହଜାର ୫୬୩ ୟୁନିଟ ରକ୍ତ ସଂଗ୍ରହ ହୋଇଥିଲା । ସେଥିରୁ ୩୦ ପ୍ରତିଶତ ରକ୍ତ ରାଜଧାନୀର ବିଭିନ୍ନ ସରକାରୀ ହସ୍ପିଟାଲକୁ ଦିଆଯାଇଥିଲା । ହେଲେ ଏହାପରେ ଜୀବନବିନ୍ଦୁର ଆୟୋଜନ ଶିଥିଳ ପଡ଼ିଯାଇଛି । ସେହିପରି ରେଡକ୍ରସ ମଧ୍ୟ ଆଗ ଭଳି ରକ୍ତଦାନ ଶିବିର କରୁନାହିଁ । ତେଣୁ ରକ୍ତର ଅଭାବ ପରିଲକ୍ଷିତ ହେଉଛି ।
ଏସଂପର୍କରେ ସ୍ୱେଚ୍ଛାସେବୀ ଦିବ୍ୟରଞ୍ଜନ ଷଡ଼ଙ୍ଗୀ କହନ୍ତି, ଯଦି କାହାର ରକ୍ତ ଆବଶ୍ୟକ ହେଉଥାଏ, ଖବର ମିଳିଲେ ସ୍ୱେଚ୍ଛାସେବୀ ତତକ୍ଷଣାତ ପହଞ୍ଚି ରକ୍ତ ଦେଉଛନ୍ତି । ତେବେ ରେଡକ୍ରସର ଡାକ୍ତର ଲକ୍ଷ୍ମଣ ସ୍ୱାଇଁ କହନ୍ତି, ମାର୍ଚ୍ଚ ଅଧା ବେଳକୁ ରାଜଧାନୀର ତାପମାତ୍ରା ୩୦ରୁ ୩୫ଡିଗ୍ରୀ ଛୁଇଁଛି । ଗତ କିଛିମାସ ହେବ ଯେଉଁଭଳି ଭାବେ ରକ୍ତଦାନ ଶିବିର ହେବା କଥା ତାହା ହେଉନି । ଏହାର କାରଣ ସଚେତନତାର ଅଭାବ । କେତେକଙ୍କ ଧାରଣା ରହିଛି ଖରାଦିନେ ରକ୍ତ ଦେଲେ ଶରୀର ଅସୁସ୍ଥ ହେବ । ମୁଣ୍ଡ ବୁଲାଇବ । ସେହିପରି କଲେଜ ଓ ବିଶ୍ୱବିଦ୍ୟାଳୟ ଛୁଟି ଯୋଗୁଁ ଶିବିର ହୋଇପାରୁନି ବୋଲି ଡାକ୍ତର ସ୍ୱାଇଁ ମତ ରଖିଛନ୍ତି।
