ଇସ୍ଲାମାବାଦ: ନରେନ୍ଦ୍ର ମୋଦୀ ତୃତୀୟ ଲାଗି ପ୍ରଧାନମନ୍ତ୍ରୀ ଭାବରେ ଜୁନ୍ ୯ରେ ଶପଥ ନେବାକୁ ଯାଉଛନ୍ତି । ଏହା ପୂର୍ବରୁ ଋଷିଆ, ଆମେରିକା ଏବଂ ଇଟାଲି ଭଳି ଦେଶ ମୋଦୀଙ୍କୁ ଶୁଭେଚ୍ଛା ଜଣାଇସାରିଛନ୍ତି । ଭାରତର ପଡ଼ୋଶୀ ଦେଶ ମଧ୍ୟ ତାଙ୍କୁ ଅଭିନନ୍ଦନ ଜଣାଇଛନ୍ତି । କିନ୍ତୁ ପାକିସ୍ତାନ ଏବେ ଯାଏଁ ନରେନ୍ଦ୍ର ମୋଦୀଙ୍କୁ ଶୁଭେଚ୍ଛା ଜଣାଇ ନାହିଁ ।
ରବିବାର ମୋଦୀ ଶପଥ ନେବାକୁ ଯାଉଥିବା ବେଳେ ଆଜି (ଶୁକ୍ରବାର) ପାକିସ୍ତାନ ବୈଦେଶିକ ମନ୍ତ୍ରାଳୟ ପକ୍ଷରୁ ପ୍ରତିକ୍ରିୟା ମିଳିଛି । ପାକିସ୍ତାନ ନିଜର ସବୁ ପଡ଼ୋଷୀ ରାଷ୍ଟ୍ରଙ୍କ ସହ ‘ସହଯୋଗୀ ସମ୍ବନ୍ଧ’ ଆଶା କରିଛି । ଏହା ସହ ଆଲୋଚନା ମାଧ୍ୟମରେ ସମସ୍ୟାର ସମାଧାନ ଉପରେ ପାକିସ୍ତାନ ଗୁରୁତ୍ବ ଦେଇଛି । ସେପଟେ ପାକିସ୍ତାନ ବୈଦେଶିକ ମନ୍ତ୍ରାଳୟର ମୁଖପାତ୍ର ମୁମତାଜ ଜହରା ବଲୁଚଙ୍କୁ ପଚରାଯାଇଥିଲେ ଯେ, ଦେଶ କାହିଁକି ନରେନ୍ଦ୍ର ମୋଦୀଙ୍କୁ ଶୁଭେଚ୍ଛା ଜଣାଇନାହିଁ ? ପ୍ରଶ୍ନର ଜବାବ ଦେଇ ମୁମତାଜ କହିଛନ୍ତି, ନିଜ ନେତୃତ୍ବଙ୍କୁ ବାଛିବା ପାଇଁ ଭାରତୀୟଙ୍କ ପାଖରେ ଅଧୀକାର ରହିଛି ।
ସେ ଆହୁରି କହିଛନ୍ତି, ‘ଭାରତର ନିର୍ବାଚନୀ ପ୍ରକ୍ରିୟା ସଂପର୍କରେ ପାକିସ୍ତାନକୁ କୌଣସି ଟିପ୍ପଣୀ କରିବାର ନାହିଁ । ଯେହେତୁ ଭାରତରେ ସରକାର ଗଠନ ହେଉଛ, ଏଭଳି ସ୍ଥିତିରେ ତରବରିଆ ଭାବରେ ନରେନ୍ଦ୍ର ମୋଦୀଙ୍କୁ ଶୁଭେଚ୍ଛା ଜଣାଇବାର ଆବଶ୍ୟକତା ନାହିଁ ।’ ସେପଟେ ନିର୍ବାଚନୀ ପ୍ରଚାର ସମୟରେ ବିଜେପିର ଅନେକ ନେତା ପାକିସ୍ତାନକୁ ଥଟ୍ଟା କରିଥିଲେ । ଏହା ଉପରେ ମୁମତାଜ କହିଛନ୍ତି ଯେ, ‘ଭାରତରୁ ଆସୁଥିବା ବୟାନବାଜି’ ସତ୍ତ୍ବେ ପାକିସ୍ତାନ ଦାୟିତ୍ବର ସହ କାର୍ଯ୍ୟ ଜାରି ରଖିଛି ।
ଅନ୍ୟପଟେ ନରେନ୍ଦ୍ର ମୋଦୀଙ୍କ ଶପଥ ଗ୍ରହଣ ଉତ୍ସବରେ ଯୋଗ ଦେବାକୁ ବିଦେଶରୁ ଅନେକ ଅତିଥି ଭାରତ ଆସୁଛନ୍ତି । ବାଂଲାଦେଶର ପ୍ରଧାନମନ୍ତ୍ରୀ ଶେଖ ହସିନା ନୂଆ ଦିଲ୍ଲୀରେ ପହଞ୍ଚିସାରିଛନ୍ତି । ଆସନ୍ତାକାଲି ଶପଥ ଗ୍ରହଣ ସମାରୋହରେ ନେପାଳ ପ୍ରଧାନମନ୍ତ୍ରୀ ପୁଷ୍ପକୁମାର ଦହଲ ଏବଂ ଶ୍ରୀଲଙ୍କା ରାଷ୍ଟ୍ରପତି ରାନିଲ ବିକ୍ରମାସିଂହେ ମଧ୍ୟ ସାମିଲ ହୋଇପାରନ୍ତି ।