ନୂଆଦିଲ୍ଲୀ,୦୫/୦୯: ପାଖେଇ ଆସୁଛି ହରିଆଣା ବିଧାନସଭା ନିର୍ବାଚନ। ଆଉ ଦିନ କେଇଟା ପରେ ପଡିବ ଭୋଟ୍। ଏଭଳି ସମୟରେ ସମସ୍ତ ଦଳ ନିଜ ନିଜ ପ୍ରସ୍ତୁତିରେ ବ୍ୟସ୍ତ ଅଛନ୍ତି। ଏନେଇ ବିଜେପି ବୁଧବାର ହରିଆଣା ବିଧାନସଭା ନିର୍ବାଚନ ପାଇଁ ୬୭ ପ୍ରାର୍ଥୀଙ୍କ ତାଲିକା ପ୍ରକାଶ କରିଛି। ତେବେ ଏହି ତାଲିକା ପ୍ରକାଶ ପାଇବା ମାତ୍ରେ ଦଳରେ  ବିରୋଧ ଆରମ୍ଭ ହୋଇଥିବା ବେଳେ  ଟିକେଟ୍‌ କଟି ଯିବାରୁ ରାଗି ଯାଇ ଦଳ ଛାଡିଛନ୍ତି ବିଧାୟକ।

ତେବେ ରତିଆ ଆସନରୁ ବିଜେପି ବିଧାୟକ ଲକ୍ଷ୍ମଣ ନାପା ଦଳ ଛାଡ଼ିଛନ୍ତି। ସେ ବିଜେପିର ପ୍ରାଥମିକ ସଦସ୍ୟତାରୁ ଇସ୍ତଫା ଦେଇ ସେ ହରିଆଣା ବିଜେପି ସଭାପତି ମୋହନ ଲାଲ ବାଡୌଲିଙ୍କୁ ନିଜ ଇସ୍ତଫା ପତ୍ର ପଠାଇଛନ୍ତି। ସେପଟେ ଲକ୍ଷ୍ମଣ ନାପା ଆଜି କଂଗ୍ରେସରେ ଯୋଗ ଦେଇପାରିନ୍ତି ବୋଲି ସୂଚନା ରହିଛି। ତେବେ ବାସ୍ତବରେ, ହରିଆଣାରେ ଭାରତୀୟ ଜନତା ପାର୍ଟି ଦ୍ୱାରା ପ୍ରକାଶିତ ପ୍ରଥମ ତାଲିକାରେ ରତିଆ ବିଧାୟକ ଲକ୍ଷ୍ମଣ ନାପାଙ୍କୁ ଟିକେଟ୍ ଦିଆଯାଇ ନାହିଁ। ଆଗାମୀ ହରିଆଣା ବିଧାନସଭା ନିର୍ବାଚନ ପାଇଁ ବିଜେପି ରତିଆ ବିଧାନସଭା ନିର୍ବାଚନମଣ୍ଡଳୀରୁ ପୂର୍ବତନ ସାଂସଦ ସୁନୀତା ଦୁଗ୍ଗଲଙ୍କୁ ମୈଦାନକୁ ଓହ୍ଲାଇଛି। ଏହା ପରେ ଲକ୍ଷ୍ମଣ ନାପା ବିଜେପିରୁ ଇସ୍ତଫା ଦେବାକୁ ନିଷ୍ପତ୍ତି ନେଇଥିଲେ।ପ୍ରକାଶ ଥାଉକି, ଆସନ୍ତା ଅକ୍ଟୋବର ୫ ତାରିଖରେ ହରିଆଣାର ୯୦ଟି ବିଧାନସଭା ଆସନରେ ନିର୍ବାଚନ ହେବାକୁ ଥିବା ବେଳେ  ଅକ୍ଟୋବର ୮ରେ ଏହାର ଫଳାଫଳ ଆସିବ ।