ନୂଆଦିଲ୍ଲୀ ୧୦/୦୫: ମଧ୍ୟପ୍ରଦେଶର ଜଣେ ଯୁବକଙ୍କ ପ୍ରେମକାହାଣୀ ଏବେ ଚର୍ଚ୍ଚାର ବିଷୟ ପାଲଟିଛି। ଖଜୁରାହୋରେ ରହୁଥିବା ସଚିନ ସିଂ ଗୌର ଏବଂ ପେରୁର ବାସିନ୍ଦା ବ୍ରିଏଟ ଏନ୍‌ ସେଲମାଙ୍କ ଲଭ୍‌ଷ୍ଟୋରୀ ସୋସିଆଲ ମିଡିଆରେ ବେଶ୍‌ ଭାଇରାଲ ହୋଇଛି । ଏପରିକି ସଚିନଙ୍କୁ ବିବାହ କରିବାକୁ ସେଲମା ପେରୁରୁ ମଧ୍ୟପ୍ରଦେଶ ଆସିଛନ୍ତି । ସୋସିଆଲ ମିଡିଆରେ ଉଭୟେ ପରସ୍ପରକୁ ଜାଣିଥିଲେ । ଉଭୟଙ୍କ ମଧ୍ୟରେ ପ୍ରଥମେ ବନ୍ଧୁତା ଏବଂ ପରେ ପ୍ରେମ ସମ୍ପର୍କ ଗଢ଼ି ଉଠିଥିଲା । 

ସେଲମା କହିଛନ୍ତି, ସଚିନ ଜଣେ ବହୁତ ଭଲ ମଣିଷ । ୨ ସପ୍ତାହ ହେଲାଣି ସେ ଖଜୁରାହୋରେ ଅଛନ୍ତି । ସେ ସଚିନଙ୍କୁ ବିବାହ କରିବାକୁ ନିଷ୍ପତ୍ତି ନେଇଛନ୍ତି । ତାଙ୍କୁ ଭାରତୀୟଙ୍କ ବର୍ଣ୍ଣ ବେଶ୍‌ ପସନ୍ଦ ବୋଲି ସେଲମା କହିଛନ୍ତି । ସଚିନ କହିଛନ୍ତି, ସେଲମାଙ୍କୁ ସେ ତାଙ୍କ ଘର ଲୋକଙ୍କ ସହ ଭେଟ କରାଇଛନ୍ତି । ଘରଲୋକେ ମଧ୍ୟ ସେଲମାଙ୍କୁ ପସନ୍ଦ କରିଛନ୍ତି । ତେଣୁ ଉଭୟେ ଛତରପୁର କୋର୍ଟରେ ବିବାହ ପାଇଁ ଆବେଦନ କରିଛନ୍ତି । ବିଦେଶୀ ଯୁବତୀଙ୍କୁ ବିବାହ ଲାଗି ଥିବା ସ୍ୱତନ୍ତ୍ର ଆଇନ ଅନୁଯାୟୀ ଉଭୟେ କୋର୍ଟରେ ଆବେଦନ କରିଛନ୍ତି । ଆବେଦନ ସ୍ୱୀକାର ହେବା ପରେ ଉଭୟେ ବିବାହ କରିପାରିବେ । ତେବେ ବିବାହ ପରେ ସେଲମା ପେରୁରେ ରହିବେ ଏବଂ ମଝିରେ ମଝିରେ ଭାରତ ଆସିବେ ବୋଲି ସଚିନ କହିଛନ୍ତି ।