ନୂଆଦିଲ୍ଲୀ,୩୧/୦୫: ଚଳିତ ନରୱେ ଚେସ୍ ଟୁର୍ଣ୍ଣାମେଣ୍ଟରେ ଭାରତର ଚେସ୍ ବିସ୍ମୟ ଆର୍ ପ୍ରଜ୍ଞାନନ୍ଦା ଐତିହାସକ ବିଜୟ ହାସଲ କରିଛନ୍ତି । ତୃତୀୟ ରାଉଣ୍ଡ୍ରେ ସେ କ୍ଲାସିକାଲ୍ ଗେମ୍ରେ ବିଶ୍ୱର ୧ନଂ ଖେଳାଳି ତଥା ଆୟୋଜକ ନରେୱର ମାଗନସ୍ କାର୍ଲସେନଙ୍କୁ ହରାଇ ପଏଣ୍ଟ ତାଲିକାରେ ଶୀର୍ଷ ସ୍ଥାନକୁ ଉନ୍ନୀତ ହୋଇଛନ୍ତି । ଏହି ବିଜୟ ସହ ତାଙ୍କ ନାମରେ ଏକ ରେକର୍ଡ଼ ଯୋଡ଼ି ହୋଇଯାଇଛି । ପ୍ରଜ୍ଞାନନ୍ଦା ଚତୁର୍ଥ ଭାରତୀୟ ଭାବେ କ୍ଲାସିକାଲ ଗେମ୍ରେ କାର୍ଲସେନଙ୍କୁ ହରାଇବାରେ ସଫଳ ହୋଇଛନ୍ତି । ପୂର୍ବରୁ ପି. ହରିକ୍ରିଷ୍ଣା (୨୦୦୫), ବିଶ୍ୱନାଥନ ଆନନ୍ଦ (୨୦୧୭), କାର୍ତ୍ତିକେୟ ମୂରଲୀ (୨୦୨୩) କ୍ଲାସିକାଲ୍ ଗେମ୍ରେ ନରୱେ ତାରକାଙ୍କୁ ପରାଜିତ କରିଥିଲେ।
ଓପନ ବର୍ଗର ତୃତୀୟ ରାଉଣ୍ଡ୍ରେ ୧୮ବର୍ଷୀୟ ପ୍ରଜ୍ଞାନନ୍ଦା ଓ କାର୍ଲସେନ ସାମ୍ନାସାମ୍ନି ହୋଇଥିଲେ । କ୍ଲାସିକାଲ୍ ଗେମ୍ରେ ୧୩ତମ ଗୋଟି ଚାଳନାରେ କାର୍ଲସେନ ତ୍ରୁଟି କରିଥିଲେ । ପ୍ରଜ୍ଞାନନ୍ଦା ଏହାର ଫାଇଦା ଉଠାଇଥିଲେ । ଏହାପରେ ସେ କାର୍ଲସେନଙ୍କୁ ଆଉ ପ୍ରତ୍ୟାବର୍ତ୍ତନ ସୁଯୋଗ ଦେଇ ନଥିଲେ । କ୍ଲାସିକାଲ ଗେମ୍ରେ କାର୍ଲସେନଙ୍କ ବିପକ୍ଷରେ ଏହା ପ୍ରଜ୍ଞାନନ୍ଦାଙ୍କ ପ୍ରଥମ ବିଜୟ ରହିଥିଲା । ଏହି ବିଜୟ ସହ ସେ ମୋଟ ୩ପଏଣ୍ଟ ହାସଲ କରିଥିଲେ । ତୃତୀୟ ରାଉଣ୍ଡ୍ ଶେଷ ସୁଦ୍ଧା ସେ ମୋଟ ୫.୫ ପଏଣ୍ଟ ସହ ଏକକ ଅଗ୍ରଣୀ ଲାଭ କରିଛନ୍ତି । ପୂର୍ବରୁ ଉଭୟଙ୍କ ମଧ୍ୟରେ ଖେଳାଯାଇଥିବା ଶେଷ ୪ଟି କ୍ଲାସିକେଲ ଗେମ୍ ମ୍ୟାଚ୍ରେ ୩ଟି ଡ୍ର’ ହୋଇଥିବାବେଳେ କାର୍ଲସେନ ଗୋଟିଏ ଜିତିଥିଲେ । ଅନ୍ୟ ପଟରେ ଆମେରିକାର ଫାବିଆନୋ କାରୁଆନା ବିଶ୍ୱ ଚାମ୍ପିଅନ୍ ଚୀନର ଡିଙ୍ଗ୍ ଲିରେନଙ୍କୁ (କ୍ଲାସିକାଲ ଗେମ୍)ଙ୍କୁ ହରାଇଥିଲେ । ସେ ୫ପଏଣ୍ଟ ସହ ତାଲିକାରେ ଦ୍ୱିତୀୟ ସ୍ଥାନରେ ରହିଛନ୍ତି ।
ମହିଳା ବର୍ଗରେ ପ୍ରଜ୍ଞାନନ୍ଦାଙ୍କ ଭଉଣୀ ଆର୍ ବୈଶାଳୀ ତୃତୀୟ ରାଉଣ୍ଡ୍ରେ ୟୁକ୍ରେନର ଆନ୍ନା ମୁଜିଚୁକଙ୍କୁ ହରାଇ ପଏଣ୍ଟ ତାଲିକାରେ ଏକକ ଅଗ୍ରଣୀ ହାସଲ କରିଛନ୍ତି । ସେ ମୋଟ ୫.୫ ପଏଣ୍ଟ ପାଇଛନ୍ତି । ଅନ୍ୟ ଏକ ମ୍ୟାଚ୍ରେ କୁନେରୁ ହମ୍ପି ଚୀନର ଲି ଟିଙ୍ଗ୍ଜୀଙ୍କୁ ପରାଜିତ କରିଥିଲେ । ସେ ୩ପଏଣ୍ଟ ସହ ପଞ୍ଚମ ସ୍ଥାନରେ ରହିଛନ୍ତି ।
