ଭୁବନେଶ୍ଵର, ୨୦/୦୯ : ପରିବର୍ତ୍ତନ ହେବ ରିଲିଫ୍ କୋଡ୍ ନାଁ। ଏବେ ସହାନୁଭୂତି ରାଶି କୁହାଯାଉଛି, ଏହାକୁ ବିପର୍ଯ୍ୟୟ ଅଧିକାର ରାଶି କୁହାଯିବ। ଏନେଇ ସୂଚନା ଦେଇଛନ୍ତି ରାଜସ୍ଵ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ।

ବନ୍ୟା ସ୍ଥିତି ନେଇ ସୁରେଶ ପୂଜାରୀ କହିଛନ୍ତି ଯେ, ଦୁଇଟି ପର୍ଯ୍ୟାୟ ଲଘୁଚାପ ବର୍ଷାରେ ୨୦ ଜିଲ୍ଲାରେ କ୍ଷୟକ୍ଷତି ହେଇଛି। ପ୍ରଥମ ପର୍ଯ୍ୟାୟରେ ମାଲକାନଗିରି ଓ କୋରାପୁଟରେ କ୍ଷତି ହେଲା। ଦ୍ଵିତୀୟ ପର୍ଯ୍ୟାୟରେ ମୟୁରଭଞ୍ଜ, ବାଲେଶ୍ଵର ଓ କିଛିକାଂଶରେ ଭଦ୍ରକରେ କ୍ଷତି ହୋଇଛି। ଅଧିକ କ୍ଷତିଗ୍ରସ୍ତ ବାଲେଶ୍ଵର ଜିଲ୍ଲାରେ ହୋଇଛି। ଝାରଖଣ୍ଡରୁ ପାଣି ଆସିବା ଫଳରେ ମୟୁରଭଞ୍ଜ ଓ ବାଲେଶ୍ଵରକୁ କ୍ଷତିଗ୍ରସ୍ତ କରୁଛି। ଝାରଖଣ୍ଡ ବନ୍ଧର ମୂଳ ସମସ୍ୟା ହେଉଛି ତାହା ଏବେବି ସଂପୂର୍ଣ୍ଣ ହୋଇନାହିଁ। ବନ୍ଧର ଉପରମୁଣ୍ଡରେ ଲୋକେ ବସବାସ କରୁଥିବାରୁ ବନ୍ଧ କାନ୍ଥର ଉଚ୍ଚତା ବଢ଼ିପାରୁ ନାହିଁ। ଏଣୁ ବଳକା ପାଣି ସବୁ ମୟୁରଭଞ୍ଜ ଓ ବାଲେଶ୍ଵରରେ ପଶି କ୍ଷତି କରୁଛି। ପୂର୍ଣ୍ଣମୀ ଯୋଗୁଁ ପାଣି ଖସିବାରେ ବିଳମ୍ବ ହେଲା। ଏବେ ପାଣି ଖସୁଛି। କୌଣସି ସ୍ଥାନରେ ବ୍ୟାପକ କ୍ଷୟକ୍ଷତି ହୋଇନାହିଁ। କିଛି ଘର ଆଂଶିକ ଭାଙ୍ଗିଛି କିଛି ପୁରା ଭାଙ୍ଗିଛି। ଚାଷ ଜମି କ୍ଷତିଗ୍ରସ୍ତ ହୋଇଛି । ସେ ସବୁର କ୍ଷୟକ୍ଷତି ଆକଳନ ହୋଇନାହିଁ। ଆମେ ସବୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛି। ୭ ଦିନ ଭିତରେ ସେମାନେ ରିପୋର୍ଟ ଦେବେ। ରିପୋର୍ଟ ପାଇଲା ମାତ୍ରେ କ୍ଷୟକ୍ଷତି ଦିଆଯିବ। କେହି ଜଣେ ଯେମିତି ବାଦ୍ ନପଡନ୍ତି ସେଥିପ୍ରତି ଧ୍ୟାନ ଦିଆଯାଇଛି। ଆକଳନ ସମୟରେ କେହି ଜଣେ ହିତାଧିକାରୀ ଯଦି ବାଦ୍ ପଡ଼ିବେ ଦାୟିତ୍ୱରେ ଥିବା ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ହେବ। 

,