ନୂଆଦିଲ୍ଲୀ: ପଶ୍ଚିମୀ ଦେଶ ଗୁଡିକୁ ଆଜି (ଗୁରୁବାର) ଖୋଲାଖୋଲି ଚେତାବନୀ ଦେଇଛନ୍ତି ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ୍ । ପୁଟିନ ଆମେରିକା ଉପରେ ଗର୍ଜୁଥିବା ବେଳେ ୟୁରୋପକୁ ମଧ୍ୟ ଛାଡି ନାହାଁନ୍ତି। ପୁଟିନ ତାଙ୍କ ଅଭିଭାଷଣରେ ନାଟୋକୁ ମଧ୍ୟ ସମାଲୋଚନା କରିଛନ୍ତି । ସେ କହିଛନ୍ତି ଯେ ପଶ୍ଚିମୀ ଦେଶମାନେ ୟୁକ୍ରେନ ଏବଂ ଅନ୍ୟାନ୍ୟ ଦେଶ ପାଇଁ ଯାହା କରିଛନ୍ତି, ତାହା ଋଷ ସହିତ କରିବାକୁ ଚାହୁଁଛନ୍ତି। ସେମାନେ ଆମକୁ ଏକ ଅଧାମରା ଏବଂ ପରାଜିତ ରାଜ୍ୟରେ ପରିଣତ କରିବାକୁ ଚାହାଁନ୍ତି, ଯାହା କେବେ ହେବ ନାହିଁ । ପୁଟିନ ସ୍ପଷ୍ଟ ଭାବରେ କହିଛନ୍ତି ଯେ, ଯଦି ଋଷୀୟ ସଂଘରେ ପଶ୍ଚିମୀ ଦେଶର ହସ୍ତକ୍ଷେପ ଜାରି ରହେ, ତେବେ ସେମାନେ ଏପରି ପରିସ୍ଥିତିର ସମ୍ମୁଖୀନ ହେବେ ଯାହା ପୂର୍ବ ଯୁଗ ଅପେକ୍ଷା ଅଧିକ ଦୁଃଖଦ ହେବ। ଯଦି ଏପରି ପ୍ରୟାସ ବନ୍ଦ ନହୁଏ, ତେବେ ଋଷ ପରମାଣୁ ଅସ୍ତ୍ର ବ୍ୟବହାର କରିବାରେ ପଛାଇବ ନାହିଁ । 

ଋଷରେ ରାଷ୍ଟ୍ରପତି ନିର୍ବାଚନର ଦୁଇ ସପ୍ତାହ ପୂର୍ବରୁ ଫେଡେରାଲ ଆସେମ୍ବେଲିକୁ ବାର୍ଷିକ ଅଭିଭାଷଣରେ ଭ୍ଲାଦିମିର ପୁଟିନ କହିଛନ୍ତି ଯେ, ବିଶ୍ବକୁ ଉତ୍ତେଜିତ କରିବାର ଅଭ୍ୟାସ ପଶ୍ଚିମୀ ଦେଶ ଗୁଡିକର ରହିଛି ଏବଂ କ୍ରମାଗତ ଭାବରେ ବୈଶ୍ୱିକ ବିବାଦକୁ ବଢାଉଛନ୍ତି । ସେମାନଙ୍କର ଉଦ୍ଦେଶ୍ୟ ଆମର ବିକାଶକୁ ବନ୍ଦ କରିବା ଠାରୁ ବହୁତ ଆଗରେ ।  ସ୍ବିଡେନ ଏବଂ ଫିନଲ୍ୟାଣ୍ଡ ନାଟୋରେ ଯୋଗଦେବା ପରେ ପୁଟିନ ଘୋଷଣା କରିଛନ୍ତି ଯେ ଋଷର ସଶସ୍ତ୍ର ବାହିନୀକୁ ଆହୁରି ମଜବୁତ କରାଯିବ । ପୁଟିନ କହିଛନ୍ତି ଯେ ଋଷର ଶତ୍ରୁମାନେ ମନେ ରଖିବା ଉଚିତ ଯେ ସେମାନଙ୍କ ପାଖରେ ଅସ୍ତ୍ରଶସ୍ତ୍ର ଅଛି।

ଋଷ ୟୁରୋପ ଉପରେ ଆକ୍ରମଣ କରିପାରେ ବୋଲି ଆମେରିକାର ଦାବିକୁ ପୁଟିନ ପ୍ରତ୍ୟାଖ୍ୟାନ କରିଛନ୍ତି। ପୁଟିନ କହିଛନ୍ତି ଯେ ଆମେରିକା ଦେଶଗୁଡ଼ିକୁ ବିବାଦ ପାଇଁ ଉତ୍ସାହିତ କରେ, ଏହା ନିଜେ ୟୁକ୍ରେନ, ମଧ୍ୟ ପୂର୍ବ ଏବଂ ଅନ୍ୟାନ୍ୟ ଅଞ୍ଚଳରେ ବିବାଦକୁ ପ୍ରୋତ୍ସାହିତ କରିଥିଲା ଏବଂ ଏହାକୁ ମିଥ୍ୟା କହି ଲୁଚାଇ ରଖିଥିଲା ।