ଭୁବନେଶ୍ୱର, ୨୦।୩: ଚଳିତ ନିର୍ବାଚନରେ ମହିଳାମାନଙ୍କ ପାଇଁ ସ୍ୱତନ୍ତ୍ର ସଖୀ ବୁଥ୍ ଖୋଲିବ । ଏଥିରେ ଭୋଟରଙ୍କ ଠାରୁ ଆରମ୍ଭ କରି କର୍ମଚାରୀ ସବୁ ମହିଳା ରହିବେ । "ନିର୍ବାଚନର ପର୍ବ, ଆମ ଦେଶର ଗର୍ବ'-ଭାରତ ନିର୍ବାଚନ କମିଶନ ଏହି ଥିମ୍କୁ ଗ୍ରହଣ କରି ସାଧାରଣ ନିର୍ବାଚନ-୨୦୨୪ରେ ଦେଶର ସମସ୍ତ ବର୍ଗର ଅଂଶଗ୍ରହଣକୁ ବଢ଼ାଇବା ପାଇଁ ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରିଛନ୍ତି । ସେହି ମଧ୍ୟରେ ଏକ ଅନନ୍ୟ ଚେଷ୍ଟା ହେଉଛି "ସମ୍ପୂର୍ଣ୍ଣ ରୂପେ ମହିଳାଙ୍କ ଦ୍ୱାରା ପରିଚାଳିତ ବୁଥ୍-‘ସଖୀ ବୁଥ୍' । ସଖୀ ବୁଥ୍ ହେଉଛି ଏକ ମଡେଲ ବୁଥ୍ ଯାହା ମହିଳାମାନଙ୍କ ଦ୍ୱାରା ପରିଚାଳିତ । ଯେଉଁ ଅଞ୍ଚଳରେ ମହିଳାମାନଙ୍କ ମତଦାନ ହାର କମ୍ ରହୁଥିବାର ଲକ୍ଷ୍ୟ କରାଯାଉଛି, ସେଠି "ସଖୀ ବୁଥ୍' କରାଯାଇ ମହିଳା ମତଦାନ ହାର ବୃଦ୍ଧି ପାଇଁ ଲକ୍ଷ୍ୟ ରଖାଯାଇଛି । ଏହି ବୁଥ୍ରେ ପ୍ରିଜାଇଡିଂ ଅଫିସର, ପୋଲିଂ ଅଫିସର, ସୁରକ୍ଷା କର୍ମୀ ଓ ଅନ୍ୟ କର୍ମଚାରୀ ସମସ୍ତେ ମହିଳା ।
ବୁଥ୍ରେ ପୋଲିଂ ଏଜେଣ୍ଟ ଭାବରେ ମହିଳାମାନଙ୍କୁ ନିୟୋଜିତ କରିବା ପାଇଁ ରାଜନୈତିକ ଦଳ ଓ ପ୍ରାର୍ଥୀମାନଙ୍କୁ ମଧ୍ୟ ଅନୁରୋଧ କରାଯାଇଛି । ଏଠାରେ ନିୟୋଜିତ ହେବାକୁ ଥିବା ମହିଳା କର୍ମଚାରୀମାନେ କୌଣସି ମଧ୍ୟ ରଙ୍ଗର ପୋଷାକ ଓ ଶାଢ଼ୀ ପିନ୍ଧି ପାରିବେ । ମାତ୍ର ସେମାନେ ଓଡ଼ିଶାର ହସ୍ତତନ୍ତର ଯେକୌଣସି ପୋଷାକ ବା ଶାଢ଼ୀ ପିନ୍ଧିବା ପାଇଁ ଉତ୍ସାହିତ କରାଯାଉଛି । "ସଖୀ ବୁଥ୍'ଗୁଡ଼ିକରେ ମଧ୍ୟ ଅନ୍ୟ ମଡେଲ୍ ବୁଥ୍ଗୁଡ଼ିକ ପରି ଆନୁଷଙ୍ଗିକ ବ୍ୟବସ୍ଥା କରାଯିବ । ରାଜ୍ୟର ପ୍ରତିଟି ଜିଲ୍ଲାରେ ଏହି ବୁଥ୍ କାର୍ଯ୍ୟ କରିବ । ଭାରତୀୟ ଗଣତନ୍ତ୍ରର ମହାପର୍ବରେ ନାରୀଶକ୍ତି ଦ୍ୱାରା ପରିଚାଳିତ "ସଖୀ ବୁଥ୍'ଗୁଡ଼ିକ ସମଗ୍ର ବିଶ୍ୱ ପାଇଁ ଉଦାହରଣ ବୋଲି ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହାରୀ ଧଳ ମତବ୍ୟକ୍ତ କରିଛନ୍ତି ।
