ରାଇକିଆ, ୩୦।୪: କନ୍ଧମାଳ ଜିଲ୍ଲା ରାଇକିଆ ଥାନା ଅନ୍ତର୍ଗତ ସତସଙ୍ଗ ବିହାର ନିକଟରେ ଏକ ସ୍କର୍ପିଓ ଗାଡ଼ି ଦୁର୍ଘଟଣାଗ୍ରସ୍ତ ହୋଇଥିବା ସୂଚନା । ଦୁର୍ଘଟଣା ଫଳରେ ଏକ ଦମ୍ପତି ଗୁରୁତର ହୋଇଥିବା ଜଣାପଡ଼ିଛି । ଆହତମାନେ ରାଇକିଆ ଟିଚର କଲୋନୀର   ସୁବାଷ ସିଂ ଓ ତାଙ୍କ ପତ୍ନୀ ନଳିନୀ ସିଂ । 

ସୂଚନା ଅନୁଯାୟୀ, ଏହି ଦମ୍ପତି ବ୍ରହ୍ମପୁରରେ ପଢ଼ୁଥିବା ତାଙ୍କ ଝିଅକୁ ଛାଡ଼ିବା ପାଇଁ ଯାଇଥିଲେ । ଆଜି ସେଠାରୁ ଫେରୁଥିବା ବେଳେ ରାଇକିଆ ସତସଙ୍ଗ ବିହାର ନିକଟରେ ଗାଡ଼ି ଭାରସାମ୍ୟ ହରାଇ ରାସ୍ତା କଡ଼ରେ ଥିବା ଏକ ଗଛରେ ଧକ୍କା ଦେଇଥିଲା । ଫଳରେ ଉଭୟେ ଗୁରୁତର ହୋଇଥିଲେ । ଖବର ପାଇ ରାଇକିଆ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଉଦ୍ଧାର କରିବା ପରେ ରାଇକିଆ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ଘଟଣାସ୍ଥଳରେ ରାଇକିଆ ପୋଲିସ ପହଞ୍ଚି ଘଟଣାର ତଦନ୍ତ ଜାରି ରଖିଛି ।