ନୂଆଦିଲ୍ଲୀ,୨୧/୦୫: ସାଇବର ଅପରାଧ ଏବଂ ଠକେଇକୁ ନିୟନ୍ତ୍ରଣ କରିବା ପାଇଁ ତତ୍ପର ହୋଇଛନ୍ତି କେନ୍ଦ୍ର ସରକାର । ଏହି କ୍ରମରେ ଟେଲିକମ୍ ଅପରେଟରମାନେ ଏକାଥରକେ ପ୍ରାୟ ୧୮ ଲକ୍ଷ ମୋବାଇଲ ସଂଯୋଗ କାଟିବା ପାଇଁ ଯାଉଥିବା ସରକାରୀ ସୂତ୍ରରୁ ଜଣାପଡ଼ିଛି । ବିଭିନ୍ନ ଆଇନ ପ୍ରବରତ୍ତନ ଏଜେନ୍ସିଗୁଡ଼ିକର ଯାଞ୍ଚରୁ ଜଣାପଡ଼ିଛି ଯେ, ହଜାର ହଜାର ମୋବାଇଲ କନେକ୍ସନ ପାଇଁ ଗୋଟିଏ ହ୍ୟାଣ୍ଡ୍ସେଟ୍ ବ୍ୟବହାର କରି ସାଇବର ଅପରାଧୀମାନେ ଲୋକମାନଙ୍କୁ ଫସାଉଛନ୍ତି ।
ମେ’ ୯ରେ ଟେଲିକମ୍ ବିଭାଗ(ଡଟ୍) ସାଇବର ଅପରାଧ ଲାଗି ବ୍ୟବହାର ହୋଇଥିବା ୨୮,୨୦୦ ମୋବାଇଲ ହ୍ୟାଣ୍ଡ୍ସେଟ୍କୁ ବ୍ଲକ୍ କରିବା ପାଇଁ ଟେଲିକମ୍ ଅପରେଟରମାନଙ୍କୁ ନିର୍ଦ୍ଦେଶ ଦେଇଥିଲା । ଏହି ହ୍ୟାଣ୍ଡ୍ସେଟ୍ଗୁଡ଼ିକ ସହ ଜଡ଼ିତ ୨୦ ଲକ୍ଷ ମୋବାଇଲ ନମ୍ବରକୁ ପୁନଃ ଯାଞ୍ଚ କରିବା ପାଇଁ ସରକାର ନିର୍ଦ୍ଦେଶ ଦେଇଥିଲେ । ଯଦି ନମ୍ବରଗୁଡ଼ିକର ରିଭେରିଫିକେଶନ୍ ବିଫଳ ହୁଏ ତେବେ ଏଗୁଡ଼ିକୁ ବ୍ଲକ୍ କରିବା ପାଇଁ କୁହାଯାଇଥିଲା।
ପ୍ରକାଶଯୋଗ୍ୟ, ସାଇବର ଅପରାଧ ନିୟନ୍ତ୍ରଣ ପାଇଁ ଟେଲିକମ୍ ମନ୍ତ୍ରାଳୟ ଏପ୍ରିଲ ୩୦ ସୁଦ୍ଧା ୧.୬୬ କୋଟି ସିମ୍ କାର୍ଡ ବ୍ଲକ୍ କରିଛି । ମୋବାଇଲ ଫୋନ୍ଭିତ୍ତିକ ସାଇବର ଅପରାଧ ଦିନକୁ ଦିନ ବୃଦ୍ଧି ପାଉଥିବାବେଳେ ଏହାକୁ ନିୟନ୍ତ୍ରଣ କରିବା ପାଇଁ ସରକାର ତତ୍ପର ହୋଇଛନ୍ତି । ନ୍ୟାସ୍ନାଲ ସାଇବର କ୍ରାଇମ୍ ରିପୋର୍ଟିଂ ପୋର୍ଟାଲ(ଏନ୍ସିଆର୍ପି) ଅନୁସାରେ, ଡିଜିଟାଲ ଆର୍ଥିକ ଠକେଇର ଶିକାର ହୋଇଥିବା ବ୍ୟକ୍ତିମାନେ ୨୦୨୩ରେ ପ୍ରାୟ ୧୦,୩୧୯ କୋଟି ଟଙ୍କା ହରାଇଛନ୍ତି । ଆଲୋଚ୍ୟ ବର୍ଷରେ ୬୯୪,୦୦୦ ଅଭିଯୋଗ ଆସିଥିଲା ।
ଅଧିକାରୀମାନଙ୍କ କହିବାନୁସାରେ, ଅପରାଧୀମାନେ ଭିନ୍ନ ଭିନ୍ନ ଟେଲିକମ ସର୍କଲରୁ ସିମ୍ କାର୍ଡ ବ୍ୟବହାର କରିଥାନ୍ତି । ଆଇନ ପ୍ରବର୍ତ୍ତନ ଏଜେନ୍ସି ଏବଂ ଟେଲିକମ୍ ଅପରେଟରଙ୍କ ଦ୍ୱାରା ଧରା ନ ପଡ଼ିବା ପାଇଁ ଏମାନେ ନିୟମିତ ଭାବେ ସିମ୍ ଏବଂ ହ୍ୟାଣ୍ଡ୍ସେଟ୍ କମ୍ବିନେଶନ୍କୁ ବଦଳାଇଥାନ୍ତି । ଉଦାହରଣସ୍ୱରୂପ, ଏକ ଓଡ଼ିଶା କିମ୍ବା ଆସାମ ସର୍କଲ ସିମ୍ ଦିଲ୍ଲୀ ଏନ୍ସିଆର୍ରେ ବ୍ୟବହାର ହୋଇଥାଏ । ଧରା ନ ପଡ଼ିବା ପାଇଁ ଅପରାଧୀମାନେ ମାତ୍ର କେତୋଟି ଆଉଟ୍ଗୋଇଙ୍ଗ୍ କଲ୍ କରିବା ପରେ ସିମ୍ ବଦଳାନ୍ତି । କାରଣ ଗୋଟିଏ ନମ୍ବରରୁ ଏକାଧିକ କଲ୍ ଯିବା ଦ୍ୱାରା ଟେଲିକମ୍ ସିଷ୍ଟମ୍ ଏହାକୁ ସହଜରେ ଧରିପାରେ ।
ପୂର୍ବ ତଦନ୍ତ ଆଧାରରେ ଟେଲିକମ୍ କମ୍ପାନିଗୁଡ଼ିକ ଗତବର୍ଷ ସାଇବର ଅପରାଧରେ ଜଡ଼ିତ ପ୍ରାୟ ୨ ଲକ୍ଷ ସିମ୍ କାର୍ଡ ବ୍ଲକ୍ କରିଥିଲେ।