ନୂଆଦିଲ୍ଲୀ: ପ୍ୟାରିସ୍‌ ଅଲିମ୍ପିକ୍ସରେ ରେସଲର ଭିନେଶ ଫୋଗାଟଙ୍କୁ ଅଯୋଗ୍ୟ ଘୋଷଣା କରାଯିବା ପରେ କ୍ରୀଡ଼ାମନ୍ତ୍ରୀ ମନସୁଖ ମାଣ୍ଡଭିୟ ବୁଧବାର ସଂସଦରେ ଜବାବ ରଖିଛନ୍ତି । ସେ ଲୋକସଭାରେ କହିଛନ୍ତି ଯେ, ଫୋଗାଟଙ୍କୁ ଅଲିମ୍ପିକ୍ସରୁ ବାହାର କରିବା ବିରୋଧରେ ଜରୁରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଭାରତୀୟ ଅଲିମ୍ପିକ୍‌ ସଂଘ (ଆଇଓଏ)କୁ ପ୍ରଧାନମନ୍ତ୍ରୀ ମୋଦୀ ନିର୍ଦ୍ଦେଶ ଦେଇଛନ୍ତି । ଆଇଓଏ ଅଧ୍ୟକ୍ଷ ପିଟି ଓଷା ପ୍ୟାରିସରେ ଅଛନ୍ତି । ପ୍ରଧାନମନ୍ତ୍ରୀ ତାଙ୍କ ସହ କଥା ହୋଇଛନ୍ତି । ତେବେ ଭିନେଶ ଫୋଗାଟଙ୍କ ଓଜନ ୫୦ କେଜି ୧୦୦ ଗ୍ରାମ ଥିବାରୁ ତାଙ୍କୁ ଅଲିମ୍ପିକରେ ଅଯୋଗ୍ୟ ଘୋଷଣା କରାଯାଇଛି ।’ 

 ସେପଟେ ଆଇଓଏ ପକ୍ଷରୁ ୟୁନାଇଟେଡ୍‌ ଓ୍ବାର୍ଲଡ ରେସଲିଂ ନିକଟରେ ଏନେଇ ଅଭିଯୋଗ କରାଯାଇଛି ବୋଲି କ୍ରୀଡ଼ାମନ୍ତ୍ରୀ ସୂଚନା ଦେଇଛନ୍ତି । ଭିନେଶ ଫୋଗାଟ ମଙ୍ଗଳବାର ୫୦ କିଲୋଗ୍ରାମ ରେସିଲିଂ ବର୍ଗରେ କମାଲ ପ୍ରଦର୍ଶନ କରିଥିଲେ । ସେମିଫାଇନାଲରେ କ୍ୟୁବାର ରେସଲରଙ୍କୁ ହରାଇ ସେ ଫାଇନାଲରେ ପ୍ରବେଶ କରିଥିଲେ ।  ପ୍ରଥମ ଭାରତୀୟ ମହିଳା ରେସଲର ଭାବରେ ଫୋଗାଟ ଅଲିମ୍ପିକ ଫାଇନାଲରେ ପ୍ରବେଶ କରିବା ସହ ଇତିହାସ ରଚିଥିଲେ । ହେଲେ ଆଜି ତାଙ୍କ ଶରୀରର ଓଜନ ୫୦ କେଜିରୁ ଅଧିକ ଥିବା ଦର୍ଶାଇ ଅଲିମ୍ପିକରୁ ବାହାର କରିଦିଆଯାଇଛି । 

#WATCH | Union Sports Minister Mansukh Mandaviya speaks on the issue of disqualification of Indian wrestler Vinesh Phogat from #ParisOlympics2024

He says, "…Today her weight was found 50 kg 100 grams and she was disqualified. The Indian Olympic Association has lodged a strong… pic.twitter.com/7VkjoQQyIM

— ANI (@ANI) August 7, 2024

କ୍ରୀଡ଼ାମନ୍ତ୍ରୀ ମାଣ୍ଡଭିୟ କହିଛନ୍ତି, ସରକାର ଭିନେଶ ଫୋଗାଟଙ୍କୁ ସବୁ ପ୍ରକାର ଖେଳ ସୁବିଧା ଏବଂ ଟ୍ରେନିଂ ଲାଗି ସହାୟତା କରିଛନ୍ତି । ପ୍ୟାରିସ୍‌ ଅଲିମ୍ପିକରେ ଅଂଶଗ୍ରହଣ କରିବା ଲାଗି ତାଙ୍କୁ ୭୦ ଲକ୍ଷ ୪୫ ହଜାର ୭୭୫ ଟଙ୍କା ସହାୟତା ଦେଇଛନ୍ତି କେନ୍ଦ୍ର ସରକାର ।