ଭୁବନେଶ୍ୱର,୨୪/୦୮: ଟଙ୍କା ଅଳ୍ପ  ପାଇଁ ୟା ତା ଘର ପିଣ୍ଡାରେ ବସିବାକୁ ପଡୁଥିଲା ।  ପେଟକୁ ଭଲକରି ଗଣ୍ଡେ ଖାଇବାକୁ ବି ମିଳୁନଥିଲା । ଏମିତିକି ପିଲାମାନଙ୍କୁ ପାଠ ପଢ଼ାଇବାର ସ୍ୱପ୍ନ  ବି ଅଧାରେ ଅଟକି ଯାଇଥିଲା । ହେଲେ ଏବେ  ପରିସ୍ଥିତି ବଦଳିଯାଇଛି । ମାଣ୍ଡିଆ ବଦଳାଇ ଦେଇଛି  ଜୀବନର ଗତିପଥ । ଏବେ ମାଣ୍ଡିଆ ଚାଷ କରି ୫  ପ୍ରାଣୀ କୁଟୁମ୍ବକୁ ପୋଷିବା ସହ ଦୁଇ ପୁଅକୁ ପଢ଼ାଇ  ପାରୁଛି । କୋରାପୁଟ ଜିଲ୍ଲା ବୋରିଗୁମ୍ମା ବ୍ଲକସ୍ଥିତ  ମୁଦୁଲିଗୁଡ଼ା ଗାଁର ରଇବାରୀ ମୁଦୁଲିଙ୍କ ଏ କାହାଣୀ । 

ରଇବାରୀ କହନ୍ତି, ଦୀର୍ଘ ୨୦ ବର୍ଷରୁ  ଅଧିକ ସମୟ ହେଲାଣି ମୁଁ ମାଣ୍ଡିଆ  ଚାଷ କରୁଛି । ହେଲେ କେବେ ସଫଳ  ହେବି ଭାବିନଥିଲି । ରାଜ୍ୟ ସରକାରଙ୍କ  ‘ଶ୍ରୀଅନ୍ନ’ ଅଭିଯାନ ମାଧ୍ୟମରେ ପୁଷ୍ଟିଶସ୍ୟ  ଚାଷ ପାଇଁ ପ୍ରୋତ୍ସାହନ ଦିଆଗଲା ପରେ ମୁଁ  ଅତ୍ୟାଧୁନିକ ପଦ୍ଧତିରେ ପୁଷ୍ଟିଶସ୍ୟ ଚାଷ କରିବା  ଆରମ୍ଭ କଲି । ପରେ ଅଭିଯାନ ତରଫରୁ ହୋଇଥିବା  ବିଭିନ୍ନ ସଚେତନତା କାର୍ଯ୍ୟକ୍ରମରେ ଯୋଗଦେଇ  ମାଣ୍ଡିଆ ଚାଷକୁ ଆଗକୁ ନେଲି । ଏବେ ମୁଁ ୨  ଏକରରୁ ଅଧିକ ଜମିରେ ମାଣ୍ଡିଆ ଚାଷ କରୁଛି । ପାଇଥିବା ପ୍ରଶିକ୍ଷଣରୁ ଜୈବିକ ଖତ ପ୍ରସ୍ତୁତି, ବିହନ ବୁଣିବା ପ୍ରଣାଳୀ, ଘାସ ବଛା କାମ ଆଦି ବିଷୟରେ  ଅବଗତ ହେଲି । ପୂର୍ବରୁ ଏତେ ମାତ୍ରାରେ ଲାଭ  ହୋଇ ପାରୁନ ଥିବାରୁ ଦୁଃଖକଷ୍ଟରେ ପରିବାର ପ୍ରତିପୋଷଣ କରୁଥିଲି । 

ରଇବାରୀ ଚଳିତ ଥର ଚାଷ  କ୍ଷେତରେ ପରିଶ୍ରମ କରି ବର୍ଷକୁ ୧୫  କୁଇଣ୍ଟାଲ ମାଣ୍ଡିଆ ଅମଳ କରିଛନ୍ତି । ଯାହାକୁ  ସେ ରାଜ୍ୟ ସରକାରଙ୍କ ଦ୍ୱାରା ପରିଚାଳିତ  ମଣ୍ଡି ବ୍ୟବସ୍ଥାରେ ୧୪.୨ କୁଇଣ୍ଟାଲ ବିକ୍ରି କରି  ପାରିଛନ୍ତି । ଯେଉଁଥିରୁ ସେ ପ୍ରତି କୁଇଣ୍ଟାଲ ପିଛା  ୩ ହଜାର ୮୪୬ ଟଙ୍କା ହିସାବରେ ୫୪ ହଜାର  ୬୧୩ ଟଙ୍କା ପାଇଛନ୍ତି । ବଳକା ମାଣ୍ଡିଆକୁ ସେ  ଘରେ ଖାଇବା ପାଇଁ ରଖିଥଲେ । ଚଳିତ ବର୍ଷ  କୋରାପୁଟ ଜିଲ୍ଲାର ୧୨ଟି ବ୍ଲକରେ ୪୮ଟି ମଣ୍ଡି  କରାଯାଇ ‘ଶ୍ରୀଅନ୍ନ’ ଅଭିଯାନ ଅଧୀନରେ ୩୦  ହଜାରରୁ ଅଧିକ ଚାଷୀ ମାଣ୍ଡିଆ ଚାଷୀ କରିଥିବା  ବେଳେ ତା ଭିତରୁ ୯୦ ପ୍ରତିଶତ କେବଳ ମହିଳା । 

ଆଦିବାସୀ ଜିଲ୍ଲାଗୁଡ଼ିକରେ ମିଲେଟ କିଣାବିକା  ପ୍ରକ୍ରିୟାରେ ମହିଳା ସ୍ୱୟଂ ସହାୟକ ଗୋଷ୍ଠୀର  ଭାଗିଦାରିତା କେବଳ ମହିଳା ଚାଷୀଙ୍କୁ ସଶକ୍ତ  କରିନି ବରଂ ଟଙ୍କା ନେଣଦେଶକୁ ନେଇ  ରହିଥିବା ସେମାନଙ୍କର ନିଷ୍ପତ୍ତି ପ୍ରକ୍ରିୟାକୁ ବି  ଶାଣିତ କରିଛି । ସରକାର ମିଲେଟ ପାଇଁ ସର୍ବନିମ୍ନ ସହାୟକ ମୂଲ୍ୟ ଘୋଷଣା କରିବା  ମହିଳା ଚାଷୀଙ୍କୁ ଅଥନୈତିକ ସ୍ୱାଧୀନତା  ପ୍ରଦାନ ଦିଗରେ ଆଉ ଏକ ବାଟ ଦେଖାଇଛି । 

କୃଷି ଓ କୃଷକ ସଶକ୍ତୀକରଣ ବିଭାଗ ୨୦୧୭  ମସିହାରେ ଫ୍ଲାଗ୍‌ସିପ୍‌ କାର୍ଯ୍ୟକ୍ରମ ଅଧୀନରେ ଓଡ଼ିଶା  ମିଲେଟ ଆରମ୍ଭ କରିଥିବା ବେଳେ ଏବେ ତାହା  ‘ଶ୍ରୀଅନ୍ନ’ ଯୋଜନା ଭାବେ ପରିଗଣିତ ହୋଇଛି । 

ମହିଳା ମିଲେଟ ଚାଷୀଙ୍କ ସାମଗ୍ରୀ କିପରି  ସହଜରେ ଓ ଶୀଘ୍ର ବିକ୍ରି ହେବ ଏଥିପାଇଁ ଶ୍ରୀ  ଅନ୍ନ ଯୋଜନାରେ "ସବୁଜିମା' ନାମକ ଏକ  କୃଷକ ଉତ୍ପାଦକ କମ୍ପାନୀ ସମସ୍ତ ଆଦିବାସୀ  ଗାଁଗୁଡ଼ିକରେ ମିଲେଟ କ୍ରୟ ପୂର୍ବରୁ ଏ ସଂକ୍ରାନ୍ତରେ  ଏକ ସଚେତନତା ରଥ ବୁଲାଉଛି । ଯାହାର ମୂଳ ଆଭିମୁଖ୍ୟ ହେଉଛି ଅଧିକରୁ ଅଧିକ ମହିଳା ଚାଷୀଙ୍କୁ  ମଣ୍ଡି ପ୍ରକ୍ରିୟାରେ ସାମିଲ କରିବା । କେବଳ ସେତିକି  ନୁହେଁ ମଣ୍ଡିକୁ ଆସୁଥିବା ମିଲେଟର ଗୁଣବତ୍ତା ଯାଞ୍ଚ  କରିବା ପାଇଁ ୩ରୁ ୪ଜଣ "ସବୁଜିମା'ର ଅଧିକାରୀ  ଉପସ୍ଥିତ ରହୁଛନ୍ତି । ଯାହାକି ଚାଷୀଙ୍କ ବିଶ୍ୱାସକୁ  ଜିଣିବାରେ ସାହାଯ୍ୟ କରୁଛି ବୋଲି ସବୁଜିମା  ବୋର୍ଡର ଅଧିକାରୀ ଆହ୍‌ଲାଦିନ ଖିଲ କହିଛନ୍ତି । ସେ ଆହୁରି କହିଛନ୍ତି, ୨୦୨୦-୨୩ ମଧ୍ୟରେ ମିଲେଟର  କ୍ରୟ ୧୧୭%କୁ ବୃଦ୍ଧି ପାଇଥିବା ବେଳେ ପାଖାପାଖି  ୨୭୦୦ କୃଷକ ଏଥରେ ସାମିଲ ହୋଇଥଲେ ।  ଯେଉଁମାନେ ସବୁଜିମା ମାଧ୍ୟମରେ ନିଜର ଉତ୍ପାଦ  ବିକ୍ରି କରିଥିଲାବେଳେ ସମୁଦାୟ ପ୍ରକ୍ରିୟାକରଣର  ୪୫% କେବଳ ମିଲେଟ ମାଧ୍ୟମରେ ହୋଇଥିଲା । 

ଦିବ୍ୟଜ୍ୟାତି ମହିଳା ସ୍ୱୟଂ ସହାୟକ  ଗୋଷ୍ଠୀ ୨୦୧୭ ମସିହାରେ ପ୍ରଥମ କରି ରାଜ୍ୟ  ସରକାରଙ୍କ ଶ୍ରୀ ଅନ୍ନ ଅଭିଯାନ ସହ ଅନୁବନ୍ଧିତ  ହୋଇ ଅଙ୍ଗନବାଡ଼ି ପିଲାଙ୍କୁ ମିଲେଟ ବିସ୍କୁଟ ସହ  ମିଲେଟ ସାମଗ୍ରୀ ପ୍ରଦାନ କରିବାକୁ ଚୁକ୍ତି କରିଛି ।  ୨୦୨୦-୨୧ରେ ଏହି ଗୋଷ୍ଠୀ ଅଧିକ ପରିମାଣରେ  ମିଲେଟ ବିସ୍କୁଟ ପ୍ରସ୍ତୁତ କରିବା ପାଇଁ ଯନ୍ତ୍ରପାତି  କିଣିବା ସହ ଏହି କାମରେ ମହିଳା ସଦସ୍ୟଙ୍କୁ  ସାମିଲ କରିଛନ୍ତି । ଯାହାକି ପରୋକ୍ଷ ଭାବେ  ଅଧିକ ମହିଳାଙ୍କୁ ରୋଜଗାରକ୍ଷମ କରାଇପାରିଛି ।