ତେନ୍ତୁଳିଖୁଣ୍ଟି, ୧୮/୧୧ : ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ସଦର ଥାନାରେ ନୂତନ ପାଚେରୀ କାର୍ଯ୍ୟ ଅତ୍ୟନ୍ତ ନିମ୍ନ ମାନର ହେଉଥିବା ଦେଖିବାକୁ ମିଳିଛି। ବିଭାଗୀୟ ଯନ୍ତ୍ରୀ ଏବଂ ଠିକାଦାରଙ୍କ କାର୍ଯ୍ୟ ସ୍ଥଳରେ ଦେଖା ମିଳୁନଥିବା ବେଳେ ନିୟୋଜିତ ମିସ୍ତ୍ରୀ ନିଜ ଇଛା ମୁତାବକ ନିମ୍ନମାନର କାର୍ଯ୍ୟ କରୁଥିବା ଦେଖିବାକୁ ମିଳିଛି। ଏହାକୁ ତେନ୍ତୁଳିଖୁଣ୍ଟି ଗ୍ରାମବାସୀ ବିରୋଧ କରିଛନ୍ତି। ବିଭାଗୀୟ ଯନ୍ତ୍ରୀଙ୍କ ଉପସ୍ଥିତରେ କାର୍ଯ୍ୟ କରିବା ପାଇଁ ଗ୍ରାମବାସୀ ଦାବି କରିଛନ୍ତି।

ସୂଚନା ଅନୁଯାୟୀ, ତେନ୍ତୁଳିଖୁଣ୍ଟି ସଦର ମହାକୁମ୍ମା ଠାରେ ନୂତନ ଥାନା କୋଠା ନିର୍ମାଣ ହୋଇଛି। ବର୍ତ୍ତମାନ ପୁରୁଣା ଥାନା ମଧ୍ୟ ନୂତନ କୋଠାକୁ ସ୍ଥାନାନ୍ତରିତ ହୋଇସାରିଛି। ହେଲେ ଇତି ମଧ୍ୟରେ ନୂତନ ଥାନା ପାଚେରୀ ପାଇଁ ହାଉସିଂ ବୋର୍ଡ ପକ୍ଷରୁ ଟଙ୍କା ମଂଜୁର ହୋଇଛି। କେତେ ବ୍ୟୟ ଅଟକଳରେ ପାଚେରୀ କାର୍ଯ୍ୟ ଚାଲିଛି ସେନେଇ କୌଣସି ସୂଚନା ଫଳକ ନଥିବା ଯୋଗୁଁ ତାହା ଜାଣିବା ସମ୍ଭବପର ହୋଇନି। ତେବେ ପାଚେରୀ କାର୍ଯ୍ୟ ଅତ୍ୟନ୍ତ ନିମ୍ନ ମାନର କରାଯାଉଥିବା ଦେଖିବାକୁ ମିଳିଛି। ପାଚେରୀ ଫାଉଣ୍ଡେସନରେ କଂକ୍ରିଟ ଯୋଡ଼େଇ କରାଯାଉନି। ଗୁଣ୍ଡ ଇଟା, ମାଟି, ପଥର ଦେଇ ଫାଉଣ୍ଡେସନ ସଜେଇ ଏହାର ଉପରେ ନାମକୁ ମାତ୍ର କିଛି ସିମେଣ୍ଟ ଦିଆଯାଉଛି। ଅଳ୍ପ ଦିନ ମଧ୍ୟରେ ପାଚେରୀ ନଷ୍ଟ ହେବାର ଆଶଙ୍କା ଦେଖାଦେଇଛି।

ବାଲି ଗୋଡି ସିମେଣ୍ଟ ମିଶ୍ରଣରେ ମଧ୍ୟ ଅତ୍ୟନ୍ତ ହାଲୁକା କରାଯାଉଛି। ଏହାକୁ ତେନ୍ତୁଳିଖୁଣ୍ଟି ଗ୍ରାମବାସୀ ସମ୍ପୂର୍ଣ୍ଣ ବିରୋଧ କରିଛନ୍ତି। ବିଭାଗୀୟ ଯନ୍ତ୍ରୀଙ୍କ ଉପସ୍ଥିତରେ ନିର୍ଦ୍ଧାରିତ ଏସ୍ଟିମେଟ ଅନୁଯାୟୀ ପାଚେରୀ ନିର୍ମାଣ କାର୍ଯ୍ୟ କରାଯାଉ ବୋଲି ସମାଜସେବୀ ଅଜୟ ହିଆଲ, ନୁଁନୁ ପାତ୍ର, ମୁନା ପାଣିଗ୍ରାହୀ ସମେତ ଗ୍ରାମବାସୀ ଦାବି କରିଛନ୍ତି। ବିଭାଗୀୟ ଯନ୍ତ୍ରୀଙ୍କ ସହ ଯୋଗାଯୋଗ ହୋଇ ପାରିନଥିବା ଯୋଗୁଁ ତାଙ୍କ ପ୍ରତିକ୍ରିୟା ନିଆଁ ଯାଇପାରିନି। ବର୍ତ୍ତମାନ ନିମ୍ନ ମାନର ହେଉଥିବା ପାଚେରୀ କାର୍ଯ୍ୟକୁ ଗ୍ରାମବାସୀ ସ୍ଥଗିତ ରଖିବାକୁ କହି ଯନ୍ତ୍ରୀଙ୍କ ଉପସ୍ଥିତରେ କାର୍ଯ୍ୟ କରିବା ପାଇଁ ଦାବି କରିଛନ୍ତି।