ନୂଆଦିଲ୍ଲୀ, ୨୪।୩: ସାଧାରଣତଃ କୌଣସି ବ୍ୟକ୍ତିଙ୍କର ମରଶରୀର ଦେଖିଲେ ଦୁଃଖ ଅନୁଭବ ହୁଏ । ତେଣୁ ଅନ୍ତିମ ସଂସ୍କାରରେ ସାମିଲ ହେବାକୁ ଲୋକେ ପସନ୍ଦ କରନ୍ତିନି । କାରଣ ସେଠିକାର ବାତାବରଣ ଅନ୍ୟ ଦିନ ଅପେକ୍ଷା ଭିନ୍ନ ଥାଏ । ଅନ୍ୟପକ୍ଷେ, ଇଂଲଣ୍ଡରେ ଜଣେ ଅଜବ ମହିଳା ଯାହାଙ୍କୁ ଅନ୍ତିମ ସଂସ୍କାରରେ ସାମିଲ ହେବାକୁ ଭଲଲାଗେ । ଆପଣ ଭାବୁଥିବେ ଅନ୍ତିମ ସଂସ୍କାର ଅବା କାହାକୁ କେବେ ଭଲ ଲାଗିପାରେ ? କିନ୍ତୁ, ଏହା ସତ । ଏହି ମହିଳା ଜଣକ ହେଲେ ଲଣ୍ଡନର ଇଜଲିଙ୍ଗଟନ୍‌ରେ ରହୁଥିବା ୫୫ ବର୍ଷୀୟା ମହିଳା ଜିନ୍ ଟ୍ରେଣ୍ଡ । ସେ ଜଣେ ଆକ୍ଚର ହୋଇଥିବା ବେଳେ ଫଟୋଗ୍ରାଫି କରିବା ତାଙ୍କ ସଉକ୍ । କିନ୍ତୁ, ତାଙ୍କର ଅନ୍ୟ କେତେକ ସଉକ୍ ଲୋକଙ୍କୁ ଆଶ୍ଚର୍ଯ୍ୟ କରେ । ଯେଉଁ କାରଣରୁ ସେ ସବୁବେଳେ ଚର୍ଚ୍ଚାରେ ଥାନ୍ତି । 

ତେବେ ଅଜଣା ଲୋକଙ୍କ ଅନ୍ତିମ ସଂସ୍କାରରେ ସାମିଲ ହେବା ତାଙ୍କୁ ପସନ୍ଦ । ଗତ ୧୦ ବର୍ଷ ମଧ୍ୟରେ ସେ ୨୦୦ରୁ ଅଧିକ ଲୋକଙ୍କ ଅନ୍ତିମ ସଂସ୍କାରରେ ଯୋଗ ଦେଇସାରିଛନ୍ତି । ଏମିତିକି ସେ ମାସେ ମଧ୍ୟରେ ୪ରୁ ୫ଟି ଅନ୍ତିମ ସଂସ୍କାରରେ ସାମିଲ ହୁଅନ୍ତି । ଖୁବ୍ କମ୍ ବୟସରେ ହିଁ ଉଭୟ ବାପାମାଆଙ୍କୁ ହରାଇଥିଲେ ଜିନ୍ । ଯେତେବେଳେ ସେ ୧୪ ବର୍ଷର ହୋଇଥିଲେ ୫୬ ବର୍ଷ ବୟସରେ ତାଙ୍କ ବାପାଙ୍କର ଫୁସଫୁସ୍ ସଂକ୍ରମଣରେ ଦେହାନ୍ତ ଘଟିଥିଲା । ବାପାଙ୍କ ମୃତ୍ୟୁର ୬ ବର୍ଷ ପରେ ଚାଲିଯାଇଥିଲେ ମା’ । ଯାହା ପରେ ଜିନ୍ ସମ୍ପୂର୍ଣ୍ଣ ରୂପେ ଭାଙ୍ଗିପଡ଼ିଥିଲେ । ବାପାଙ୍କ ଅନ୍ତିମ ସଂସ୍କାର କରାଇବା ପରେ ସେ ନିଜେ ହିଁ ମା’ଙ୍କ ଅନ୍ତିମ ସଂସ୍କାରର ସମସ୍ତ ପ୍ରସ୍ତୁତି କରିଥିଲେ । 

ଏହା ପରଠାରୁ ସେ ଲୋକଙ୍କ ଅନ୍ତିମ ସଂସ୍କାରରେ ସାମିଲ ହେବାକୁ ଆରମ୍ଭ କଲେ । ସେବେଠାରୁ ହିଁ ଲୋକେ ତାଙ୍କୁ ଅନ୍ତିମ ସଂସ୍କାରର ପ୍ରସ୍ତୁତି କରିବା ଲାଗି ଡାକନ୍ତି । ଜିନ୍ ତାଙ୍କର ସମସ୍ତ ସମୟ ମଶାଣିରେ ବିତାଇବା ଆରମ୍ଭ କଲେ । ମୃତ୍ୟୁ ପରେ ଯେଉଁ ବ୍ୟକ୍ତିଙ୍କର ସଂସ୍କାର କରିବା ଲାଗି କେହି ନଥାନ୍ତି, ଜିନ୍ ସେଠାକୁ ସଂସ୍କାର କରିବା ଲାଗି ଯାନ୍ତି । ଜିନ୍ ମଶାଣିରେ ମୃତ ଲୋକଙ୍କ ଫଟୋ ଉଠାଇ ତାଙ୍କ ଚିତ୍ର ଆଙ୍କନ୍ତି । ଜିନ୍ କୁହନ୍ତି ଯେତେବେଳେ ମଶାଣି ଯାନ୍ତି ସେ ବାପାମାଆଙ୍କ ପାଖରେ ଥିବା ଭଳି ଅନୁଭବ କରନ୍ତି । ମୃତ୍ୟୁ ପରେ ମଣିଷ ଅନ୍ୟ ଏକ ଦୁନିଆକୁ ଚାଲିଯାନ୍ତି ବୋଲି ସେ ବିଶ୍ୱାସ କରନ୍ତି । ତେବେ ବର୍ତ୍ତମାନ ଜିନ୍ ମଶାଣିର ଦେଖାଶୁଣା କରୁଛନ୍ତି ।