ନୂଆପଡ଼ା, ୪।୧୧ : ପୁଣି ମଣିଷକୁ ମାରି ଖାଇଲା ବାଘ। ନୂଆପଡ଼ା ରେଞ୍ଜ ଧରମବନ୍ଧା ବିଟ୍ ସିଲିଆରିବାହାରା ଗାଁରେ ଜଣେ ବୃଦ୍ଧାଙ୍କୁ ବାଘ ମାରି ଖାଇଛି । ମହିଳାଙ୍କ ନାଁ ରାମେଶ୍ବରୀ ମାଝି(୫୦ ବର୍ଷ) । ମଧ୍ୟାହ୍ନରେ ମହିଳାଙ୍କ ଖଣ୍ଡବିଖଣ୍ଡିତ ମୃତଦେହ ଗାଁ ଲୋକେ ଉଦ୍ଧାର କରିଛନ୍ତି ।

ସୂଚନାନୁଯାୟୀ, ଶୁକ୍ରବାର ସନ୍ଧ୍ୟାରେ ସିଲିଆରିବାହାରା ଗାଁର ରାମେଶ୍ବରୀ ଗାଁ ମୁଣ୍ଡକୁ ଶୌଚ ପାଇଁ ଯାଇଥିଲେ। ହେଲେ ଘରକୁ ଫେରି ନଥିଲେ। ରାତିରେ ପରିବାର ଲୋକେ ବହୁ ଖୋଜାଖୋଜି କରିଥିଲେ ବି ପତ୍ତା ମିଳିନଥିଲା । ଶନିବାର ସକାଳୁ ଗାଁ ମୁଣ୍ଡରେ ମହିଳାଙ୍କୁ କଲରା ପତାରିଆ ବାଘ ଖାଉଥିବା ଗାଁ ଲୋକେ ଦେଖିବାକୁ ପାଇଥିଲେ । ଏହି ସମୟରେ ଗାଁ ଲୋକେ ବାଘକୁ ଘଉଡାଇବାକୁ ଉଦ୍ୟମ କରିବାରୁ ବାଘ ଦୌଡାଇଥିଲା । ଫଳରେ ଦୀର୍ଘ ସମୟ ଧରି ବାଘ ଓ ଗାଁ ଲୋକଙ୍କ ମଧ୍ୟରେ ଛକାପଞ୍ଜା ଲାଗି ରହିଥିଲା। 

ମଧ୍ୟାହ୍ନରେ ଗାଁ ଲୋକେ ସଙ୍ଘବଦ୍ଧ ହୋଇ ଠେଙ୍ଗା ବାଡ଼ି ଧରି ବାଘକୁ ଘଉଡାଇଥିଲେ। ସେଠାରୁ ମହିଳାଙ୍କ ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର ହୋଇଛି। ମହିଳାଙ୍କ ମୁଣ୍ଡ ଓ ଗଣ୍ଡିକୁ ଅଲଗା କରିଥିବା ବେଳେ ଦେହର ମାଂସକୁ ଖାଇ ଯାଇଛି । ମୃତକ ମହିଳା ଜଣକ ପୂର୍ବତନ ୱାର୍ଡ ମେମ୍ବର ବୋଲି ଜଣା ପଡ଼ିଛି । ଏବେ ଗାଁରେ ଉତ୍ତେଜନା ଦେଖା ଦେଇଛି । ବାଘ ଭୟରେ ଅଞ୍ଚଳବାସୀ ଆତଙ୍କିତ ହୋଇ ପଡିଛନ୍ତି । ବର୍ତ୍ତମାନ ସୁଦ୍ଧା ବନ ବିଭାଗ ଟିମ୍ ଘଟଣା ସ୍ଥଳରେ ପହଞ୍ଚି ପାରିନଥିବା ଗାଁ ଲୋକେ କହିଛନ୍ତି।