କେନ୍ଦୁଝର,୧୩/୦୪: କେନ୍ଦୁଝର ବନଖଣ୍ଡର ଅଟେଇ ସଂରକ୍ଷିତ ଜଙ୍ଗଲରେ ଶିମିଳିପାଳରୁ ଏକ ମହାବଳ ଆସି ଅବସ୍ଥାନ କରୁଥିଲା । ଗତବର୍ଷ ଫେବୃଆରୀ ମାସରେ ମହାବଳ କେନ୍ଦୁଝରରେ ରହିଥିବା ସ୍ପଷ୍ଟ ହେବା ପରେ ବନବିଭାଗ ପକ୍ଷରୁ ସ୍ୱତନ୍ତ୍ର ଟିମ୍ ଗଠନ କରାଯାଇ ମହାବଳର ସୁରକ୍ଷାକୁ କଡ଼ାକଡ଼ି କରିଥିଲା । ହେଲେ ଗତ ଡିସେମ୍ବର ୪ ତାରିଖ ପରଠାରୁ ମହାବଳ କେଉଁଆଡ଼େ ଗଲା ତାହା ବନବିଭାଗକୁ ଜଣାନାହିଁ । ଜଙ୍ଗଲରେ ଲଗା ଯାଇଥିବା କ୍ୟାମେରାରେ ମହାବଳ ଧରାପଡୁନଥିବାରୁ ସାଧାରଣରେ ସନ୍ଦେହ ସୃଷ୍ଟି ହୋଇଛି । ମହାବଳ ପୁଣି ଶିମିଳିପାଳକୁ ଫେରି ଯାଇଥିବା ବନବିଭାଗ ଅନୁମାନ କରିଛି ।
କେନ୍ଦୁଝର ବନଖଣ୍ଡରେ ଗତବର୍ଷ ଫେବୃଆରୀ ମାସଠାରୁ ଏକ ମହାବଳ ବାଘ ଯା’ଆସ କରୁଥିବା ସୂଚନା ରହିଥିଲା । ଶିମିଳିପାଳ ଜାତୀୟ ଉଦ୍ୟାନରୁ ଏହି ବାଘଟି ନିୟମିତ ବ୍ୟବଧାନରେ କେନ୍ଦୁଝର ବନଖଣ୍ଡ ଦେଇ ଆନନ୍ଦପୁର ବନଖଣ୍ଡରେ ପ୍ରବେଶ କରୁଥିଲା । ଶିମିଳିପାଳରେ ଏହି ମହାବଳର ନମ୍ବର ୩୩ ରହିଥିଲା । ଶିମିଳିପାଳ, ସାତକୋଶିଆ, ଅଟେଇ, ରେବଣା ପଳାଶପାଳ ଦେଇ ଏହି ବାଘ ଚଳପ୍ରଚଳ କରୁଛି । ବାଘ ପାଇଁ ଏହି ଅଞ୍ଚଳରେ ଭରପୂର ଖାଦ୍ୟ ରହିଥିବାରୁ ସେ ଆକୃଷ୍ଟ ହୋଇ ଆସୁଛି ବୋଲି ବନବିଭାଗ ପକ୍ଷରୁ କୁହାଯାଇଥିଲା । ପ୍ରତ୍ୟେକ ବାଘ ୪୦ କିଲୋମିଟର ବ୍ୟାସାର୍ଦ୍ଧରେ ରହିବାକୁ ଆଗ୍ରହ ଦେଖାଇଥାଏ ।
ବାଘର ଗତିବିଧିକୁ ଅନୁଧ୍ୟାନ କରିବାକୁ ୬୦ଟି କ୍ୟାମେରା ଲଗା ଯାଇଥିଲା । ଏହି ଉଚ୍ଚକ୍ଷମତା ସମ୍ପନ୍ନ କ୍ୟାମେରା ୧.୪ କିଲୋମିଟର ପର୍ଯ୍ୟନ୍ତ ଗତିବିଧିକୁ ଟ୍ରାକ୍ କରିବାର ଦକ୍ଷତା ରହିଛି। ଏହା ଏକ ଅଣ୍ଡିରା ମହାବଳ ବାଘ ବୋଲି ବନବିଭାଗ ସ୍ପଷ୍ଟ କରିଥିଲା । ୧୬ ହଜାର ହେକ୍ଟର ବିଶିଷ୍ଟ ଅଟେଇ ସଂରକ୍ଷିତ ଜଙ୍ଗଲରେ ମହାବଳ ବାଘ ରହୁଥିବାରୁ ଏହାର ସୁରକ୍ଷା ପାଇଁ ଏସ୍ଟିଏଫ୍, ପୁଲିସ, କ୍ରାଇମ୍ବ୍ରାଞ୍ଚ, ବନ ବିଭାଗ ସହିତ ଶିମିଳିପାଳ ବ୍ୟାଘ୍ର ସଂରକ୍ଷକ ନିର୍ଦ୍ଦେଶକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ନିୟନ୍ତ୍ରଣ ହେଉଥିଲା । କିଛିଦିନ ପୂର୍ବରୁ ଶିମିଳିପାଳରୁ ଏକ ବାଘୁଣୀ ଅଟେଇ ଜଙ୍ଗଲକୁ ଆସି ଫେରି ଯାଇଥିଲା । ଏହାପରେ ମହାବଳଟି ପ୍ରାୟ ଡିସେମ୍ବର ମାସ ପର୍ଯ୍ୟନ୍ତ ରହିଥିଲା ।
ଡିସେମ୍ବର ୪ ତାରିଖ କ୍ୟାମେରାରେ ବାଘର ଗତିବିଧି ଧରାପଡିଥିଲା । ମାତ୍ର ଏହା ପରଠାରୁ ମହାବଳ କେଉଁ ପଟକୁ ଯାଇଛି ବନବିଭାଗ ନିକଟରେ ଖବର ନାହିଁ । ଏ ସମ୍ପର୍କରେ ମହାବଳ ସୁରକ୍ଷା ଦାୟିତ୍ୱରେ ଥିବା ଘଟଗାଁ ଏସିଏଫ୍ ତଥା ଭାରପ୍ରାପ୍ତ ବନଅଧିକାରୀ ପ୍ରଭାତ କୁମାର କୁଅଁରଙ୍କୁ ପଚାରିବାରୁ ଏବେ ବାଘର ମିଳନ ସମୟ । ତେଣୁ ସେ ଶିମିଳିପାଳକୁ ଫେରି ଯାଇଥିବା ଅନୁମାନ କରାଯାଉଛି । ଡିସେମ୍ବର ୪ ତାରିଖ ପରଠାରୁ ମହାବଳ କେନ୍ଦୁଝର ବନଖଣ୍ଡରେ ଥିବା ସେ କହିଛନ୍ତି ।
ପ୍ରକାଶଥାଉକି ମହାବଳ ବାଘର ସୁରକ୍ଷା ପାଇଁ ଗଠନ ହୋଇଥିଲା ଜଏଣ୍ଟ ଟ୍ରାକ୍ ଫୋର୍ସ । ବାଘର ସୁରକ୍ଷା ଶିମିଳିପାଳ ବ୍ୟାଘ୍ର ସଂରକ୍ଷକ (ଏସ୍ଟିଏଫ୍)ଙ୍କ ଦ୍ୱାରା କରାଯିବ । ଏଥିନେଇ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା । ଅଟେଇ ସଂରକ୍ଷିତ ଜଙ୍ଗଲରେ ଥିବା ୪ଟି ରାସ୍ତାକୁ ଅସ୍ଥାୟୀ ଭାବରେ ଜନସାଧାରଣଙ୍କ ପାଇଁ ବନ୍ଦ ରଖାଯାଇଛି ।
