ପ୍ରମୂଖ ଖବର
  • ମାହାଙ୍ଗା: ଭାରସାମ୍ୟ ହରାଇ କେନାଲକୁ ଖସିଲା କାର୍, ଯୁବକଙ୍କ ମୃତ୍ୟୁ
  • ||
  • ମୋହନ ସରକାରଙ୍କ ପ୍ରଥମ ଅଧିବେଶନ, ୨୪ରେ ଉପବାଚସ୍ପତି ନିର୍ବାଚନ, ୨୫ରେ ପୂର୍ଣ୍ଣାଙ୍ଗ ବଜେଟ୍
  • ||
  • ପ୍ୟାରିସ୍‌ ଅଲିମ୍ପିକ ୨୦୨୪: ୨୫ରୁ ତୀରନ୍ଦାଜୀ ଇଭେଣ୍ଟ, ରିକର୍ଭ ଇଭେଣ୍ଟରେ ଭାଗ ନେବେ ୬ ଭାରତୀୟ
  • ||
  • ଆସନ୍ତା ୨୬ ସୁଦ୍ଧା ଆଉ ଏକ ଲଘୁଚାପ, ତିନିଦିନ ପ୍ରବଳ ବର୍ଷା ସମ୍ଭାବନା: ଏବେ ବି ନିଅଣ୍ଟିଆ ସ୍ଥିତିରୁ ବାହାରିନି ୧୬ ଜିଲ୍ଲା
  • ||
  • ମୋଦି ୩.୦ ସରକାରର ପ୍ରଥମ ବଜେଟ୍‌, ୭ମ ଥର ପାଇଁ ବଜେଟ୍‌ ଉପସ୍ଥାପନ କରିବେ ଅର୍ଥମନ୍ତ୍ରୀ ନିର୍ମଳା ସୀତାରମଣ
  • ||

୧୧ ଦିନର ସେବା ପରେ ସୁସ୍ଥ ହୋଇଛନ୍ତି ଶ୍ରୀଜିଉ, ପୁଣି ବଡ଼ଦେଉଳରେ ବାଜିଲା ବିଜେ କାହାଳୀ ଓ ଘଣ୍ଟ

ପୁରୀ, ୦୩/୦୭ : ୧୧ ଦିନର ନିରବିଛିନ୍ନ ତଥା ନିଷ୍ଠାପର ସେବା ପରେ ସୁସ୍ଥ ହୋଇଛନ୍ତି ଶ୍ରୀଜିଉ। ଫୁଲରି ତେଲ ଏବଂ ଓଷୁଅ ଲାଗି ପରେ ମଙ୍ଗଳବାର ଖଳି ଲାଗି ଏକାଦଶୀ ଅବସରରେ ଠାକୁରେ ପୂର୍ବାବସ୍ଥାକୁ ଫେରିଛନ୍ତି । ଦଶମୂଳ ମହୌଷଧି ଅର୍ପଣ ପରେ ଶ୍ରୀବିଗ୍ରହ ପୂରା ସୁସ୍ଥ ହୋଇଛନ୍ତି । ପୁନଃ ଆଗଭଳି କୋଳାହଳମୟ ହୋଇଛି ବଡ଼ଦେଉଳ । ଶୁକ୍ଳବସ୍ତ୍ର ପରିତ୍ୟାଗ କରି ଠାକୁରେ ରକ୍ତବର୍ଣ୍ଣ ବସ୍ତ୍ର ପରିଧାନ କରିଛନ୍ତି । ଶ୍ରୀବିଗ୍ରହ ଓ ଦଶଠାକୁରଙ୍କଠାରେ ଚନ୍ଦନଲାଗି ନୀତି ଅନୁଷ୍ଠିତ ହୋଇଛି । ଚନ୍ଦନ ସର୍ବାଙ୍ଗ ସମୟରେ ଘଣ୍ଟ ସହ ବାଜିଛି ବିଜେ କାହାଳୀ । ବାରଲାଗି ସଜ ପରିଧାନ କରିଛନ୍ତି ଠାକୁରେ । ଅନବସରରେ ପ୍ରଥମ ଥର ତୁଳସୀ ଲାଗି ହୋଇଛନ୍ତି । ଏଥିସହ ଚନ୍ଦ୍ରିକା, ବାରଲାଗି ଖଣ୍ଡୁଆ, ରଙ୍ଗିନ ସୁବାସିତ ପୁଷ୍ପାଦିରେ ବିଭୂଷିତ ହୋଇଛନ୍ତି ଶ୍ରୀବିଗ୍ରହ । 

ଅଣସର ସମୟରେ ଠାକୁରେ ଅସୁସ୍ଥ ଥାଆନ୍ତି । ଏଣୁ ଶ୍ରୀମନ୍ଦିରରେ ଉଚ୍ଚ ଶଦ୍ଦ ମନା ଥାଏ । ମଙ୍ଗଳବାର ଚନ୍ଦନଲାଗି ସର୍ବାଙ୍ଗ ସମୟରେ ପ୍ରଥମ କରି ଘଣ୍ଟ ବାଜିଛି । ପୁଣି ବାଜିଛି ବିଜେ କାହାଳୀ । ଏକାଦଶୀ ତିଥିରେ ମହାପ୍ରଭୁଙ୍କ ଖଳି ଲାଗି ସହ ଦଶବତାର ଦିଅଁ ଓ ଶ୍ରୀବିଗ୍ରହଙ୍କ ଏକତ୍ର ସର୍ବାଙ୍ଗ ବଢ଼ିଥିଲା । ଚନ୍ଦନ, କର୍ପୂର, କସ୍ତୁରୀ ଓ କେଶର ଆଦି ସୁଗନ୍ଧିତ ଦ୍ରବ୍ୟକୁ ମିଶାଇ ଠାକୁରଙ୍କ ଶ୍ରୀଅଙ୍ଗରେ ଲାଗି କରାଗଲା । ପତିମହାପାତ୍ରେ ଚନ୍ଦନ ସଂସ୍କାର କରିବାରେ ପ୍ରଚଳିତ ବିଧି ଅନୁଯାଇ ଶ୍ରୀବଳଭଦ୍ର, ଶ୍ରୀଜଗନ୍ନାଥ ଓ ଦେବୀ ସୁଭଦ୍ରାଙ୍କ ଶ୍ରୀଅଙ୍ଗରେ ଲାଗି ହେଲା । 

ଅନବସରରେ ତୁଳସୀ ଲାଗି ବାରଣ ଥିଲା । ଠାକୁରଙ୍କୁ କେବଳ ଶୁଭ୍ର ବସ୍ତ୍ର ଓ ଶୁଭ୍ର ପୁଷ୍ପ ଲାଗି ହେଉଥିଲା । ବଡ଼ସିଂହାର ବେଶ ଭଳି ଶ୍ରୀବିଗ୍ରହମାନେ ପ୍ରଥମକରି ଅପୂର୍ବ ବେଶରେ ଉଭା ହୋଇଥିଲେ । ଏହାପରେ ଠାକୁରଙ୍କୁ ରାଜପ୍ରସାଦ ଭୋଗ ଲାଗି କରାଗଲା । ଏଥିରେ ସ୍ୱତନ୍ତ୍ର ଶୈଳୀରେ ତିଆରି ଖଇ ସହ ଖୁଆ, ସର, ଛେନା, ଆମ୍ବ, କଦଳୀ ଆଦି ବହୁ ପ୍ରକାର ଫଳମୂଳ ଠାକୁରଙ୍କୁ ଅର୍ପଣ କରାଯାଇଛି । ଦଶମୀ ତିଥିରେ ରାଜବୈଦ୍ୟମାନେ ଦେଇଥିବା ଦଶମୂଳ ମହୌଷଧି ଭୋଗ ସହିତ ଠାକୁରଙ୍କୁ ଅର୍ପଣ କରାଯାଇଥିଲା । ଏହାପରେ ଠାକୁରେ ସମ୍ପୂର୍ଣ୍ଣ ସୁସ୍ଥ ହୋଇଥିଲେ । ଦ୍ୱାଦଶୀରେ ଏହି ଶୁଭ ଖବର ଗଜପତି ମହାରାଜାଙ୍କ ନିକଟରେ ପହଞ୍ଚାଯିବ।

  • prameyanews
  • PrameyaOdia
  • prameya
  • News7 Is Now On WhatsApp Join And Get Latest News Updates Delivered To You Via WhatsApp

    Rath Yatra

    Copyright © 2024 - Summa Real Media Private Limited. All Rights Reserved.