ଟିକାବାଲି,୬/୬ : ଫୁଲବାଣୀ -ବ୍ରହ୍ମପୁର ୧୫୭ ନଂ ରାଜପଥର କାବଲାଗାଁ ନିକଟରେ ଥିବା ବ୍ରିଜ ତଳକୁ ଏକ ବାଇକ୍ ଭାରସାମ୍ୟ ହରାଇ ଖସି ପଡ଼ିବା ଫଳରେ ଦୁଇ ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ହୋଇଥିବା ଜଣାପଡିଛି। ସୂଚନା ଅନୁସାରେ, ଟିକାବାଲି ଥାନା ଆରାବାକା ପଞ୍ଚାୟତ ଅନ୍ତର୍ଗତ ନେଡିଗୁଡା ଗ୍ରାମର କାର୍ତ୍ତିକ କହଁର, ପରମେଶ୍ବର କହଁର ଏବଂ ରାଇକିଆ ବ୍ଲକ ମାସେଡିକିଆ ଗ୍ରାମର ପତିତ ପ୍ରଧାନ ଏକ ବାଇକ ଯୋଗେ ଶଙ୍କରାଖୋଲ ଯାଇ ନେଡିଗୁଡାକୁ ଫେରୁଥିଲେ । ଏହି ସମୟରେ ଭାରସାମ୍ୟ ହରାଇ କାବଲାଗାଁ ବ୍ରିଜକୁ ବାଡ଼େଇ ହୋଇ ବାଇକ୍ ସହ ପୋଲ ତଳକୁ ଖସି ପଡ଼ିଥିଲେ ।
ଖବରପାଇ ଟିକାବାଲି ଅଗ୍ନିଶମ କର୍ମଚାରୀ ଓ ୧୦୮ ଆମ୍ବୁଲାନ୍ସ ପହଞ୍ଚି ୩ଆହତଙ୍କୁ ଉଦ୍ଧାର କରି ଟିକାବାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ତେବେ ଚିକିତ୍ସାଧନ ଅବସ୍ଥାରେ ପତିତ(୨୫)ଙ୍କ ମୃତ୍ୟୁ ଘଟିଥିବାବେଳେ ଅନ୍ୟ ଦୁଇ ଜଣଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ଥିବାରୁ ତାଙ୍କୁ ଫୁଲବାଣୀ ମୁଖ୍ୟ ଚିକିତ୍ସାଳୟକୁ ପଠାଯାଇଥିଲା। କିନ୍ତୁ ସେଠାରେ ପରମେଶ୍ଵରଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । କାର୍ତ୍ତିକଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବ୍ରହ୍ମପୁର ବଡ ମେଡ଼ିକାଲ ସ୍ଥାନାନ୍ତର କରାଯାଇଛି । ଘଟଣାସ୍ଥଳରେ ପୋଲିସ ଏସଆଇ, ଅବନ କୁମାର ପ୍ରଧାନ, ରବିନ୍ଦ୍ର କୁମାର ହେମ୍ବ୍ରମ, ପହଞ୍ଚି ତଦନ୍ତ ଚଳାଇଥିବା ଜଣାପଡ଼ିଛି ।
