ଭୁବନେଶ୍ୱର,୨୪/୦୩: ତାପମାତ୍ରା ବଢ଼ୁଥିବାରୁ ହସ୍ପିଟାଲ ଅଗ୍ନିକାଣ୍ଡ ରୋକିବା ପାଇଁ ପଦକ୍ଷେପ ଦିଅ । ଏନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଏବଂ ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏନ୍ଡିଏମ୍ଏ) ରାଜ୍ୟମାନଙ୍କୁ ମିଳିତ ୧୩ ସୂତ୍ର ନେଇ ମାର୍ଗଦର୍ଶିକା ଜାରି କରିଛି । ସ୍ୱୀକୃତିପ୍ରାପ୍ତ ଡାକ୍ତରଖାନାଗୁଡ଼ିକୁ ସମ୍ପୂର୍ଣ୍ଣ ଯାଞ୍ଚ, ବିଦ୍ୟୁତ୍ ଲୋଡ୍ କ୍ଷମତାର ଅସଙ୍ଗତି ଦୂର, ସମ୍ପୃକ୍ତ ରାଜ୍ୟ ଅଗ୍ନିଶମ ବିଭାଗଠାରୁ ବୈଧ ଅଗ୍ନିଶମ ଏନ୍ଓସି ହାସଲ ସୁନିଶ୍ଚିତ କରିବାକୁ ନିର୍ଦ୍ଦେଶ ଦିଆଯାଇଛି । ଗୁରୁତ୍ୱପୂର୍ଣ୍ଣ ନିରାପତ୍ତା ବ୍ୟବସ୍ଥା କାର୍ଯ୍ୟକାରିତା ସୁନିଶ୍ଚିତ ପାଇଁ ପରବର୍ତ୍ତୀ ପଦକ୍ଷେପ ସମୀକ୍ଷା କରାଯିବ ବୋଲି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ କର୍ତ୍ତୃପକ୍ଷଙ୍କୁ କେନ୍ଦ୍ର ସରକାର ଅନୁରୋଧ କରିଛନ୍ତି ।
ଡାକ୍ତରଖାନାରେ ଅଗ୍ନି ନିର୍ବାପକ ଯନ୍ତ୍ର, ଅଗ୍ନି ନିର୍ବାପକ ଡିଟେକ୍ଟର, ଅଗ୍ନି ନିର୍ବାପକ ଯନ୍ତ୍ର, ଫାୟାର ହାଇଡ୍ରାଣ୍ଟ ଏବଂ ଫାୟାର ଲିଫ୍ଟ ବ୍ୟବସ୍ଥା ସମ୍ପୂର୍ଣ୍ଣ କାର୍ଯ୍ୟକ୍ଷମ ଅଛି କି ନାହିଁ ତାହା ନିଶ୍ଚିତ କରିବା ଲାଗି କୁହାଯାଇଛି । ବିଶେଷକରି ନୂଆ ଯନ୍ତ୍ରପାତି ଯୋଡ଼ିବା କିମ୍ବା କୌଣସି ସ୍ଥାନକୁ ଆଇସିୟୁରେ ପରିଣତ ସମୟରେ ଇଲେକ୍ଟ୍ରିକାଲ୍ ଲୋଡ୍ ଅଡିଟ୍ କରାଯିବ । ଡାକ୍ତରଖାନାଗୁଡ଼ିକ ରାଜ୍ୟ ଅଗ୍ନିଶମ ବିଭାଗଠାରୁ ବୈଧ ଅଗ୍ନି ଆପତ୍ତି ବିହୀନ ପ୍ରମାଣପତ୍ର ହାସଲ କରିବା ଆବଶ୍ୟକ । ପୁରୁଣା କୋଠାଗୁଡ଼ିକର ଇଲେକ୍ଟ୍ରେିକାଲ୍ ଲୋଡ୍ ତଦାରଖ କର । ସେହିଭଳି ଡାକ୍ତରଖାନା ମଧ୍ୟରେ ସୂଚନା ପ୍ରସାରଣ କରିବାକୁ ସୁପାରିସ କରାଯାଇଛି ।
ଏହାବ୍ୟତୀତ ଅଗ୍ନି ନିର୍ବାପକ ଯନ୍ତ୍ରପାତିର ନିୟମିତ ଯାଞ୍ଚ କରି ରକ୍ଷଣାବେକ୍ଷଣ ଏବଂ ପରୀକ୍ଷଣ କରାଯିବ । ନିୟମିତ ଇଲେକ୍ଟ୍ରେିକାଲ୍ ଲୋଡ୍ ଅଡିଟ୍ ଅକ୍ସିଜେନ୍ ନିରାପତ୍ତା ସହ ସ୍ମୋକ୍ ଡିଟେକ୍ଟର ଓ ଫାୟାର ଆଲାର୍ମ ସ୍ଥାପନ ହେବ । ଦହନଶୀଳ ସାମଗ୍ରୀ ନିୟନ୍ତ୍ରଣ କରାଯିବ। ଓଭରଲୋଡିଂ ବିଦ୍ୟୁତ ଉତ୍ସରୁ ଯନ୍ତ୍ରପାତିକୁ ଦୂରେଇ ରଖିବାକୁ ହେବ । ୱାଟର ସ୍ପ୍ରିଙ୍କଲର ଏବଂ ହୋସ୍ ପାଇପ୍ ରହିବ । ଜାତୀୟ ବିଲ୍ଡିଂ କୋଡ୍ର କଡ଼ାକଡ଼ି ଅନୁପାଳନ କରାଯିବାକୁ ପରାମର୍ଶ ଦିଆଯାଇଛି ।
