ନୂଆଦିଲ୍ଲୀ : ଦିଲ୍ଲୀରେ ପୁଣି ଥରେ ଭୀଷଣ ଅଗ୍ନିକାଣ୍ଡ ଘଟିଛି। ଗୁରୁବାର ଦିଲ୍ଲୀର ବଜିରାବାଦ ସ୍ଥିତ ପୁଲିସ ଟ୍ରେନିଂ ସେଣ୍ଟରରେ ନିଆଁ ଲାଗିଛି। ନିଆଁ ଟ୍ରେନିଂ ସେଣ୍ଟରର ମାଲଖାନାରେ ଲାଗିଛି। ଅନେକ ଗାଡ଼ି ଜଳି ପାଉଁଶ ହୋଇ ଯାଇଛି। ଏହା ପୂର୍ବରୁ ଚଳିତ ବର୍ଷ ଜାନୁୟାରୀ ଶେଷରେ ମଧ୍ୟ ଏଠାରେ ଏମିତି ଘଟଣା ହୋଇଥିଲା। ସେତେବେଳେ ପାଖାପାଖି ୪୫୦ଟି ଗାଡ଼ି ନିଆଁରେ ଜଳି ଯାଇଥିଲା। 

ବର୍ତ୍ତମାନ ସୁଦ୍ଧା ଉକ୍ତ ଅଗ୍ନିକାଣ୍ଡରେ କାହାର ହତାହତ ହେବାର ସୂଚନା ଆସି ନାହିଁ। ପ୍ରାଥମିକ ଆକଳନ ମୁତାବିକ, ଅନେକ ଗାଡ଼ି ନିଆଁ ପ୍ରଭାବରେ ରହିଛି। ଏହା ପୂର୍ବରୁ ଜାନୁୟାରୀରେ ଯେବେ ଏଠାରେ ନିଆଁ ଲାଗି ଥିଲା, ସେତେବେଳେ ଶହ ଶହ ଦୁଇ ଚକିଆ ଗାଡ଼ି ଓ ଚାରି ଚକିଆ ଗାଡ଼ି ଜଳି ଯାଇଥିଲେ। ନିଆଁ କେମିତି ଲାଗିଲା ଏହାକୁ ନେଇ ଏବେ କୌଣସି ପ୍ରମୁଖ କାରଣ ସାମନାକୁ ଆସିନାହିଁ । 

କହି ରଖୁଛୁ କି , ଦିଲ୍ଲୀରେ ଚଳିତ ବର୍ଷ ନିଆଁ ଲାଗିବାର ଅନେକ ଘଟଣା ଘଟିଛି। ଏହି ବର୍ଷ ଏବେସୁଦ୍ଧା ରାଷ୍ଟ୍ରୀୟ ରାଜଧାନୀରେ ନିଆଁ ୫୫ ଲୋକଙ୍କ ଜୀବନ ନେଇଛି ଏବଂ ୩୦୦ରୁ ଅଧିକ ଲୋକ ଆହତ ହୋଇଛନ୍ତି। ଜାନୁୟାରୀରେ ଅଗ୍ନିକାଣ୍ଡ ସମ୍ୱନ୍ଧିତ ଘଟଣାରେ ୧୬ ଜଣ ଲୋକଙ୍କ ମୃତ୍ୟୁ ଘଟିଛି, ଫେବ୍ରୁଆରୀରେ ୧୬ , ମାର୍ଚ୍ଚରେ ୧୨ , ଅପ୍ରେଲରେ ୪ ଓ ୨୬ ମେ ଯାଏ ୭ଜଣ ଲୋକଙ୍କ ମୃତ୍ୟୁ ହୋଇଛି। 

ରବିବାର ୨୬ ମେ’ରେ , ପୂର୍ବ ଦିଲ୍ଲୀର ବିବେକ ବିହାର ଅଞ୍ଚଳରେ ବେବି କେୟାର ନ୍ୟୁ ବର୍ନ ହସ୍ପିଟାଲରେ ନିଆଁ ଲାଗିବାର ଘଟଣାରେ ୬ ଜଣ ଜନଜାତି ଶିଶୁଙ୍କ ଜୀବନ ଚାଲି ଯାଇଛି ଏବଂ ୫ଜଣ ଆହତ ହୋଇଛନ୍ତି। ନବଜାତ ଶିଶୁଙ୍କ ଏହି ହସ୍ପିଟାଲରେ ନିଆଁ ଲାଗିବାରେ ୫ଟି ଅକ୍ସିଜେନ ସିଲିଣ୍ଡର ଫାଟି ଯାଇଛି।