ଭୁବନେଶ୍ୱର,୩୦/୦୪: ଲଗାତାର ୧୫ ଦିନ ଲାଗି ରହିଲାଣି ଅଗ୍ନିବର୍ଷା । ଆହୁରି ୧୦ ଦିନ ନିସ୍ତାର ନାହିଁ । ଆଗାମୀ ୩ ଦିନ ଅତି ପ୍ରଚଣ୍ଡ । ଆଉ ୨/୩ ଡିଗ୍ରୀ ବଢ଼ିଯିବ ଦିନ ତାପମାତ୍ରା ।
ମେଘର ଚିହ୍ନବର୍ଣ୍ଣ ନାହିଁ । କାଁ ଭାଁ କାଳବୈଶାଖୀକୁ ଛାଡ଼ିଦେଲେ ୧୦ ଦିନ ଯାଏ ବର୍ଷାର କାଣିଚାଏ ବି ଆଶା ନାହିଁ । ସ୍ଥିତି ଅତି ଗମ୍ଭୀର ହେବାକୁ ଯାଉଛି । ପାଣିପାଗ ବିଶେଷଜ୍ଞଙ୍କ ଏ ପୂର୍ବାନୁମାନ ସମସ୍ତଙ୍କ ହୋସ୍ ଉଡ଼ାଇ ଦେଲାଣି । ସବୁଠି ତ୍ରାହୀ ତ୍ରାହୀ ଡାକ ।
ସୋମବାର ବାରିପଦାରେ ତାତି ୪୫ ଡିଗ୍ରୀ ସେଲସିୟସ୍ ପାଖାପାଖି ରହିଛି । ଦିନ ସାଢ଼େ ୧୧ଟା ସୁଦ୍ଧା ବାଲେଶ୍ୱର, କେନ୍ଦୁଝର ଓ ଭୁବନେଶ୍ୱରରେ ତାତି ୪୦ ଡିଗ୍ରୀ ଟପି ଯାଇଥିଲା । ସବୁଠୁ ବିପଜ୍ଜନକ ଥିଲା ଭୀଷଣରୁ ଅତି ଭୀଷଣ ଗ୍ରୀଷ୍ମପ୍ରବାହ । ଏହାକୁ ସହ୍ୟ କରିବା ଏକପ୍ରକାର ମୁସ୍କିଲ ହୋଇ ପଡୁଥିଲା । ପ୍ରଚଣ୍ଡ ତାତି ସାଙ୍ଗକୁ ଗ୍ରୀଷ୍ମପ୍ରବାହ ଯୋଗୁ ଅଂଶୁଘାତ ଆକ୍ରାନ୍ତଙ୍କ ସଂଖ୍ୟା ବଢ଼ିଚାଲିଛି ।
ସୋମବାର ସୁଦ୍ଧା ରାଜ୍ୟରେ ମୋଟ ୨୫୭ ଜଣ ଅଂଶୁଘାତର ଶିକାର ହୋଇଥିବା ସ୍ୱାସ୍ଥ୍ୟ ବିଭାଗ ସୂଚନା ଦେଇଛି । ସୁନ୍ଦରଗଡ଼ରୁ ସର୍ବାଧିକ ୬୦ ଓ ମୟୂରଭଞ୍ଜରୁ ୪୦ ଜଣ ଅଂଶୁଘାତର ଶିକାର ହୋଇଛନ୍ତି । ବାଲେଶ୍ୱର ଓ ଢେଙ୍କାନାଳ ଜିଲ୍ଲାରୁ ମୋଟ ୨ଜଣଙ୍କର ଅଂଶୁଘାତ ମୃତ୍ୟୁ ହୋଇଥିବା ସରକାରୀ ଭାବେ କୁହାଯାଇଛି ।
ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ଡ. ସୁରେନ୍ଦ୍ରନାଥ ପଶୁପାଳକ କହିଛନ୍ତି, ଆସନ୍ତା ୧୦ ଦିନ ଯାଏ ରାଜ୍ୟର ଅନେକ ସ୍ଥାନରେ ତାପମାତ୍ରା କମିବାର ସମ୍ଭାବନା ନାହିଁ । ପଶ୍ଚିମ ଓ ଦକ୍ଷିଣ ଆଭ୍ୟନ୍ତରରେ ତାତି କ୍ରମଶଃ ବଢ଼ିବ । ଅଧିକାଂଶ ସ୍ଥାନରେ ତାତି ୪୪ ଡିଗ୍ରୀ ଉପରେ ରହିବ । ଭୁବନେଶ୍ୱରରେ ୨ ବା ୪ ତାରିଖରେ ତାତି କ୍ରମଶଃ କମିବ । ଉପକୂଳ ଓ ଏହାର ସଂଲଗ୍ନ ଅଞ୍ଚଳରେ ତାତି କ୍ୱଚିତ୍ କମିପାରେ ବୋଲି ସେ କହିଛନ୍ତି ।
୩୦ ତାରିଖ(ମଙ୍ଗଳବାର)ଭୁବନେଶ୍ୱର ସମେତ ଅନୁଗୁଳ, ତାଳଚେର, ବାରିପଦା, ଝାରସୁଗୁଡ଼ା ଓ ବୌଦ୍ଧରେ ତାତି ୪୪ରୁ ୪୬ ଡିଗ୍ରୀ ରହିବ ବୋଲି ସେ ସତର୍କ କରାଇଛନ୍ତି । ୩୦ ଓ ୧ ତାରିଖ ଦୁଇ ଦିନ ଗ୍ରୀଷ୍ମପ୍ରବାହ ଜାରି ରହିବ । ଏଥିପାଇଁ ରେଡ୍ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ ।
ମଙ୍ଗଳବାର ଖୋର୍ଦ୍ଧା, ଭଦ୍ରକ, ବାଲେଶ୍ୱର, ମୟୂରଭଞ୍ଜ, କେନ୍ଦୁଝର, ଢେଙ୍କାନାଳ, ବୌଦ୍ଧ, ଅନୁଗୁଳ ଓ କଟକରେ ଅତି ଭୀଷଣ ଗ୍ରୀଷ୍ମପ୍ରବାହ ପାଇଁ ରେଡ୍ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ସେହିଭଳି ସମ୍ବଲପୁର, ଯାଜପୁର, ଜଗତସିଂହପୁର, କେନ୍ଦ୍ରାପଡ଼ା, ବଲାଙ୍ଗୀର, ସୋନପୁର, ମାଲକାନଗିରି, କଳାହାଣ୍ଡି, କନ୍ଧମାଳ, ଗଞ୍ଜାମ, ଗଜପତି, ନୟାଗଡ଼, ନବରଙ୍ଗପୁର, ଦେବଗଡ଼, ନୂଆପଡ଼ା, ସୁନ୍ଦରଗଡ଼, ରାୟଗଡ଼ା ଓ ଝାରସୁଗୁଡ଼ାରେ ଗ୍ରୀଷ୍ମପ୍ରବାହ ବହିବ । ଏ ସବୁ ଜିଲ୍ଲା ପାଇଁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି ।
ଆସନ୍ତା ୧ ତାରିଖରେ ବି ଭଦ୍ରକ, ବାଲେଶ୍ୱର, ମୟୂରଭଞ୍ଜ, ଝାରସୁଗୁଡ଼ା, ସୁନ୍ଦରଗଡ଼ ଓ କେନ୍ଦୁଝରରେ ଅତି ଭୀଷଣ ଗ୍ରୀଷ୍ମପ୍ରବାହ ବହିବ । ଏଥିପାଇଁ ରେଡ୍ ୱାର୍ଣ୍ଣିଂ ଦିଆଯାଇଛି । ଡ. ପଶୁପାଳକ ଆକଳନ ଅନୁସାରେ, ୩୦ରେ ବାଲେଶ୍ୱର, ମୟୂରଭଞ୍ଜ, ଭଦ୍ରକ, କେନ୍ଦୁଝର, ଯାଜପୁର, କେନ୍ଦ୍ରାପଡ଼ା, କଟକ, ଖୋର୍ଦ୍ଧା ଓ ଢେଙ୍କାନାଳରେ ତାତି ୧ରୁ ୨ ଡିଗ୍ରୀ ବଢ଼ିବ । ଏ ସବୁ ଅଞ୍ଚଳରେ ରାଜ୍ୟରେ ସବୁଠୁ ତତଲା ଅଞ୍ଚଳ ପାଲଟିବ । ମେ ୧ ତାରିଖରେ ବି ଏହି ସମସ୍ତ ଜିଲ୍ଲାରେ ପ୍ରଚଣ୍ଡ ତାତି ଅନୁଭୂତ ହେବ । ଗଞ୍ଜାମ, ଗଜପତି, ନୟାଗଡ଼, ଅନୁଗୁଳ ଓ ବୌଦ୍ଧରେ ତାତି ୧ରୁ ୨ ଡିଗ୍ରୀ ବଢ଼ିବ । ମେ ୨ ତାରିଖରେ ଭୁବନେଶ୍ୱର ସମେତ କିଛି ସ୍ଥାନରେ ତାପମାତ୍ରା କମିପାରେ ।
ସୋମବାର ଅନୁଗୁଳରେ ତାତି ୪୪.୩ ଡିଗ୍ରୀ ରହିଛି । ଏଠାରେ ସ୍ୱାଭାବିକଠାରୁ ୪ଡିଗ୍ରୀରୁ ଅଧିକ ତାପମାତ୍ରା ରେକର୍ଡ ହୋଇଛି । ବୌଦ୍ଧରେ ୪୪.୧, ତାଳଚେରରେ ୪୪, ଟିଟିଲାଗଡ଼ରେ ୪୩.୫, ଢେଙ୍କାନାଳରେ ୪୩.୨, ଭବାନୀପାଟଣା, ନୟାଗଡ଼, ମାଲକାନଗିରି, ବଲାଙ୍ଗୀର, କେନ୍ଦୁଝର ଓ ନୂଆପଡ଼ାରେ ତାପମାତ୍ରା ୪୩ ଡିଗ୍ରୀ ରହିଛି । ଝାରସୁଗୁଡ଼ା ଓ ସମ୍ବଲପୁରରେ ୪୨.୯ ଡିଗ୍ରୀ ରେକର୍ଡ ହୋଇଥିଲା ।
