ନୂଆଦିଲ୍ଲୀ ୦୪/୦୨: କର୍କଟ ରୋଗ ଏବଂ ଏହାକୁ ନେଇ ପ୍ରଚଳିତ ଅନ୍ଧବିଶ୍ୱାସ ଓ ଭୁଲ ଧାରଣା ଉପରେ ସଚେତନତା ସୃଷ୍ଟି ଲାଗି ପ୍ରତି ବର୍ଷ ଫେବ୍ରୁଆରୀ ୪ ତାରିଖରେ ବିଶ୍ୱବାସୀ ପାଳନ କରନ୍ତି କର୍କଟ ଦିବସ । ଅନ୍ତର୍ଜାତୀୟ କର୍କଟ ନିୟନ୍ତ୍ରଣ ସଂଘ ବିଶ୍ୱ କର୍କଟ ଦିବସକୁ ‘ବିଶ୍ୱସ୍ତରୀୟ ଐକ୍ୟ ପ୍ରୟାସ’ ଭାବେ ଘୋଷଣା କରିଛି ।
କର୍କଟ ଚିହ୍ନଟ, ପ୍ରାଥମିକ ସ୍ତରରୁ ଏହାର ଚିକିତ୍ସା, କର୍କଟ ରୋଗୀଙ୍କ ଯତ୍ନ ଓ ଭାବନାତ୍ମକ ସମର୍ଥନ ଜରିଆରେ ସମଗ୍ର ବିଶ୍ୱବାସୀଙ୍କୁ ଏକତ୍ର ହୋଇ ଏହି ରୋଗ ସହ ଲଢ଼ିବାକୁ ଅନୁରୋଧ କରିବା ଏହାର ଅର୍ଥ । ୨୦୦୦ ମସିହା, ଫେବ୍ରୁଆରୀ ୪ ତାରିଖରେ ଫ୍ରାନ୍ସର ପ୍ୟାରିସଠାରେ ବିଶ୍ୱ କର୍କଟ ସମ୍ମିଳନୀରେ ଏହି ଦିବସ ପ୍ରତିଷ୍ଠା ହୋଇଥିଲା ।
ସେହିଦିନଠୁ ପ୍ରତି ବର୍ଷ ଭିନ୍ନ ଭିନ୍ନ ବିଷୟ ସହିତ ଏହି ଦିବସ ପାଳନ କରାଯାଉଛି । ୨୦୨୨ରୁ ୨୦୨୪ ପର୍ଯ୍ୟନ୍ତ ଏହି ଦିବସର ବିଷୟ ରହିଛି ‘ଯତ୍ନର ବ୍ୟବଧାନ ବନ୍ଦ କର’ । କର୍କଟ ଏବେ ସମଗ୍ର ବିଶ୍ୱରେ ମୃତ୍ୟୁର ୨ୟ ସବୁଠୁ ମୁଖ୍ୟ କାରଣ ହୋଇଛି । କର୍କଟ ରୋଗ ଏବଂ ଏ ସମ୍ପର୍କିତ ଅସୁସ୍ଥତା ଓ ମୃତ୍ୟୁ ହାରକୁ ହ୍ରାସ କରିବା ଏହି ଦିବସ ପାଳନର ମୁଖ୍ୟ ଉଦ୍ଦେଶ୍ୟ ।
