ନୂଆଦିଲ୍ଲୀ, ୨୭/୦୧: ଦିଲ୍ଲୀ ପୋଲିସର ଅତିରିକ୍ତ ପୋଲିସ କମିଶନରଙ୍କ ପୁଅଙ୍କ ମୃତଦେହ ହରିୟାଣାରୁ ମିଳିଛି । ଏସିପିଙ୍କ ପୁଅ ଲକ୍ଷ୍ୟ ଚୌହାନ ଗତ ସୋମବାର ୨ ସାଙ୍ଗଙ୍କ ସହ ଏକ ବିବାହ ଉତ୍ସବରେ ସାମିଲ୍ ହେବାକୁ ହରିୟାଣା ଯାଇ ତା’ପରଦିନ ଫେରି ନଥିଲେ ।
ଦିଲ୍ଲୀ ପୋଲିସରେ ଅତିରିକ୍ତ କମିଶନର ଥିବା ଲକ୍ଷ୍ୟଙ୍କ ବାପା ୟଶପାଲ ସିଂହ ମଙ୍ଗଳବାର ପୁଅ ନିଖୋଜ ନେଇ ଏତଲା ଦେଇଥିଲେ । ଏହା ପରେ ସର୍ଚ୍ଚ ଅପରେସନ୍ ଆରମ୍ଭ କରିଥିଲା ପୋଲିସ । ଶନିବାର ପୋଲିସ ୨୪ ବର୍ଷୀୟ ଲକ୍ଷ୍ୟଙ୍କ ନିଖୋଜ ରହସ୍ୟ ଉପରୁ ପରଦା ଉଠାଇଛି । ମାମଲାରେ ଜଣଙ୍କୁ ଗିରଫ କରିଛି ପୋଲିସ ।
ମୃତକ ଲକ୍ଷ୍ୟ ଜଣ ଜଣେ ଓକିଲ । ସେ ଦିଲ୍ଲୀର ହଜାରୀ କୋର୍ଟରେ ଓକିଲାତି କରୁଥିବା ବେଳେ ଅଭିଯୁକ୍ତ ବିକାଶ ଭରଦ୍ୱାଜ ଯିଏ କି କୋର୍ଟରେ କିରାଣି ଅଛନ୍ତି ତାଙ୍କ ଠାରୁ କିଛି ଟଙ୍କା ନେଇଥିଲେ । ବିକାଶ ବାରମ୍ବାର ଟଙ୍କା ମାଗୁଥିବା ବେଳେ ଦେଇ ନଥିଲା ଲକ୍ଷ୍ୟ । ଯାହାକୁ ନେଇ ୨ ଜଣଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା ।
ଯାହା ଫଳରେ ଲକ୍ଷ୍ୟକୁ ରାସ୍ତାରୁ ହଟାଇବା ଲାଗି ସାଙ୍ଗ ଅଭିଷେକ ସହ ମିଶି ଯୋଜନା କରିଥିଲା ବିକାଶ । ଜାନୁଆରୀ ୨୨ରେ ଲକ୍ଷ୍ୟ ଜଣେ ସମ୍ପର୍କୀୟଙ୍କ ବିବାହରେ ଯୋଗ ଦେବାକୁ ବିକାଶ ଓ ଅଭିଷେକଙ୍କ ସହ ଭିୱାନୀ କାର୍ ନେଇ ଯାଇଥିଲେ ।
ବିଳମ୍ବିତ ରାତିରେ ଭିୱାନୀରୁ ଦିଲ୍ଲୀ ଫେରିବା ବେଳେ ରାସ୍ତାରେ ଅଭିଯୁକ୍ତ ବିକାସ ୱାଶରୁମ୍ ଯାଇଥିଲା । ପାନିପତର ମୁନକ କେନାଲ ନିକଟରେ ୱାଶରୁମ୍ ଯିବା ବେଳେ କାରରୁ ଓହ୍ଲାଇ ଲକ୍ଷ୍ୟକୁ କେନାଲକୁ ଠେଲି ଦେଇଥିଲା ବିକାଶ ।
ପୋଲିସ ଅନୁସାରେ, ଟଙ୍କା ଦେଣନେଣକୁ ନେଇ ବିକାଶ ଓ ଅଭିଷେକ, ଲକ୍ଷ୍ୟକୁ ହତ୍ୟା କରିଛନ୍ତି । କେନାଲକୁ ଠେଲି ଦେଇ ମାରି ଦେଇଛନ୍ତି । ଶନିବାର ପୋଲିସ ଅଭିଷେକଙ୍କୁ ଗିରଫ କରିଥିବା ବେଳେ ମୃତଦେହକୁ ଖୋଜୁଛି ।