କଟକ/ ଜଗତସିଂହପୁର ୧୦/୦୯: ଓଟିପିସିଏଲ୍ରେ ଚାକିରି ଦେବା ନାଁରେ ମହାଠକେଇ ଘଟଣାରେ ଦରଘାବଜାର ଥାନା ଓ ଜଗତସିଂହପୁର ଜିଲ୍ଲାର ତିର୍ତ୍ତୋଲ ଏବଂ କୃଷ୍ଣାନନ୍ଦପୁର ଥାନାରେ ଦୁଇଟି ମାମଲା ରୁଜୁ ହୋଇଛି । ସଞ୍ଜୟ ନାୟକ ସମେତ ଗିରଫ ୬ ଠକଙ୍କୁ ଉପରୋକ୍ତ ଦୁଇ ଥାନା ପୁଲିସ ରିମାଣ୍ଡରେ ନେବାକୁ ଯାଉଛି । ଅର୍ଥାତ୍ ସେହି ଅଭିଯୁକ୍ତଙ୍କୁ ଉକ୍ତ ମାମଲାରେ ଯୋଡ଼ିବାକୁ ଯାଉଛି ।
ରାଜ୍ୟର ଅନ୍ୟ ଯେଉଁ ଥାନାରେ ଏମାନଙ୍କ ବିରୋଧରେ ମାମଲା ରୁଜୁ ହୋଇଛି, ସେଗୁଡ଼ିକ ବି ପର୍ଯ୍ୟାୟକ୍ରମେ ଏହି ମାମଲା ସହ ଯୋଡ଼ାଯିବ । ମାମଲା ସଂକ୍ରାନ୍ତ କାଗଜପତ୍ର ସଂଗ୍ରହ ପାଇଁ କମିସନରେଟ୍ ପୁଲିସ ସମ୍ପୃକ୍ତ ଜିଲ୍ଲା ପୁଲିସ ସହିତ ଯୋଗାଯୋଗ କରିଛି । ବ୍ୟାଙ୍କର ଆର୍ଥିକ କାରବାର ସଂକ୍ରାନ୍ତ ତଥ୍ୟ ଦରଘାବଜାର ଥାନା ପୁଲିସର ହସ୍ତଗତ ହୋଇଛି । ୬ଟି ଆକାଉଣ୍ଟ ତଥ୍ୟ ପୁଲିସ ଯାଞ୍ଚ କରୁଛି ।
ଦରଘାବଜାର ବ୍ରାହ୍ମଣ ସାହିର ରାଜକିଶୋର ମିଶ୍ରଙ୍କ ସହିତ ସଞ୍ଜୟ କୁମାର ନାୟକ ପ୍ରଥମେ ଯୋଗାଯୋଗ କରିଥିଲା । ପରେ ରାଜକିଶୋରଙ୍କ ଭାଇ ଅମିୟ ରଞ୍ଜନ ପଣ୍ଡା, ସୌମ୍ୟରଞ୍ଜନ ପଣ୍ଡା, ରଜନିକାନ୍ତ ମିଶ୍ର, ରଞ୍ଜିତ ମହାଳିକ ଓ ଶୁଭମ୍ ସାହୁଙ୍କ ନିକଟରୁ ଓଟିପିସିଏଲରେ ନିଯୁକ୍ତି ଲୋଭ ଦେଖାଇ ୫୩ ଲକ୍ଷ ଟଙ୍କା ଠକି ନେଇଥିବାରୁ ସୋମବାର ଏହି ୬ ଜଣ ପୀଡ଼ିତଙ୍କର ମାଜିଷ୍ଟ୍ରେଟଙ୍କ ପାଖରେ ବୟାନ ରେକର୍ଡ କରାଯିବ । ପରେ ଦରଘାବଜାର ଥାନାକୁ ଆସିଥିବା ଅବଶିଷ୍ଟ ୧୨ ଜଣ ଅଭିଯୋଗକାରୀଙ୍କ ବୟାନ ରେକର୍ଡ କରାଯିବ ବୋଲି ପୁଲିସ ସୂଚନା ଦେଇଛି । ଶନିବାର କୃଷ୍ଣାନନ୍ଦପୁର ଥାନାରେ ବିଶୁନପୁର ଅଞ୍ଚଳର ହେମନ୍ତ କୁମାର ମହାପାତ୍ରଙ୍କ ପକ୍ଷରୁ ଏକ ଏତଲା ଦିଆଯାଇଛି ।
ଅଭିଯୋଗ ମୁତାବକ, ଗତବର୍ଷ ଫେବ୍ରୁଆରୀ ମାସରେ ତାଙ୍କ ବଡ଼ ଭାଇ ସରୋଜ କୁମାର ମହାପାତ୍ରଙ୍କ ପୁଅ ସୁଜିତ କୁମାର ମହାପାତ୍ରଙ୍କୁ ଓଟିପିସିଏଲ୍ରେ ଚାକିରି ମିଳିଯିବ କହି ହେମନ୍ତ କୁମାର ମହାପାତ୍ରଙ୍କ ସହ ଯୋଗାଯୋଗ କରିଥିଲେ ବିଶୁନପୁର ପଞ୍ଚାୟତ ମଣପୁର ଗ୍ରାମର ଦିପାଳିକା ଭଞ୍ଜ ଓ ଦିଲୀପ କୁମାର ମହାନ୍ତି । ଓଟିପିସିଏଲ୍ର ଏଚ୍ଆର୍ ବିଭାଗରେ କାର୍ଯ୍ୟ କରୁଥିବା ସଞ୍ଜୟ କୁମାର ନାୟକ ସହ ପରିଚିତ କରାଇ ଦିଆଯାଇଥିଲା । ପରେ ପରେ ଓଟିପିସିଏଲ୍ରେ ଷ୍ଟୋର୍ କିପର୍ ଚାକିରି ନିମନ୍ତେ ୮ ଲକ୍ଷ ଟଙ୍କାର ପ୍ରସ୍ତାବ ଦିଆଯାଇଥିଲା।
