ଲୋଇସିଂହା, ୨୫।୨: ରାଜ୍ୟ ସରକାର ଶନିବାର ୩୪ଟି ନୂଆଁ ଏନ୍ଏସି ଘୋଷଣା କରିଛନ୍ତି । ଏଥିରେ ଲୋଇସିଂହା ବାଦ୍ ପଡ଼ିଛି । ଯାହା ଫଳରେ ସ୍ଥାନୀୟ ଅଧିବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଏନେଇ ରବିବାର ବିଜେପି ଓ ଆଞ୍ଚଳିକ ବିକାଶ ପରିଷଦ ପକ୍ଷରୁ ୧୨ ଘଣ୍ଟିଆ ବନ୍ଦ ଡାକରା ଦେଇଛି । ସମସ୍ତ ଚାରି ଚକିଆ ଯାନବାହାନ ଚଳାଚଳ ବନ୍ଦ ରହିଛି ।
ବିଜେପି ପକ୍ଷରୁ ସ୍ଥାନୀୟ ପଦ୍ମପୁର ଛକରେ ରାସ୍ତା ରୋକ ହୋଇଥିବା ବେଳେ କଲେଜ ଛକଠାରେ ଆଞ୍ଚଳିକ ବିକାଶ ପରିଷଦ ପକ୍ଷରୁ ୨୬ ନମ୍ୱର ଜାତୀୟ ରାଜପଥ ଅବରୋଧ ହୋଇଛି । ଫଳରେ ଉଭୟ ପଟରେ ବହୁ ସଂଖ୍ୟାରେ ଚାରି ଚକିଆ ଯାନବାହାନ ଅଟକି ରହିଛି । ଆଜି ରବିବାର ହୋଇଇବାରୁ ସମସ୍ତ କାର୍ଯ୍ୟାଳୟ ବନ୍ଦ ରହିଥିବା ବେଳେ ଦୋକାନ ବଜାର ଆଂଶିକ ବନ୍ଦ ରହିଛି । ଆଗାମୀ ଦିନରେ ଆନ୍ଦୋଳନ ଆହୁରି ଜୋରଦାର ହେବ ବୋଲି ଚେତାବନୀ ଦେଇଛି ଆଞ୍ଚଳିକ ବିକାଶ ପରିଷଦ । ଶାନ୍ତି ଶୃଙ୍ଖଳା ପାଇଁ ଲୋଇସିଂହା ସହରରେ ବ୍ୟାପକ ପୋଲିସ ମୁତୟନ କରାଯାଇଛି ।
