ଉଦଳା, ୧୨/୦୮ : ଅଧ୍ୟାପକଙ୍କୁ ବିଚ୍ ରାସ୍ତାରେ ଆକ୍ରମଣ। ପଛରୁ ଆସି ଭୁଜାଲିରେ ହାଣିଲେ ୨ ଦୁର୍ବୃତ୍ତ। ହେଲମେଟ୍ ପିନ୍ଧିଥିବା ଯୋଗୁଁ ଅଳ୍ପକେ ବର୍ତ୍ତିଗଲେ ଅଧ୍ୟାପକ। ମୟୁରଭଞ୍ଜ ଜିଲ୍ଲା କପ୍ତିପଦା ଥାନା କୁକୁରଡିମା ଛକ ନିକଟରେ ଏଭଳି ଘଟଣା ଘଟିଛି। 

ସୂଚନାନୁଯାୟୀ, କପ୍ତିପଦା ଥାନା ନୁଦଡିହା ମେଘାସନ ମହାବିଦ୍ୟାଳୟର ଯୁକ୍ତ ୩ ଗଣିତ ବିଭାଗର ଅଧ୍ୟାପକ ରୂପେଶ କୁମାର ମହାପାତ୍ର ତାଙ୍କ ବାଇକ୍ ଯୋଗେ କଲେଜ ଯାଉଥିଲେ। ଏହି ସମୟରେ କୁକୁରଡିମା ଛକ ନିକଟରେ ଦୁଇ ଜଣ ଯୁବକ ପଛ ପାଖରୁ ବାଇକରେ ଆସି ଏକ ବଡ଼ ଭୁଜାଲିରେ ତାଙ୍କ ମୁଣ୍ଡକୁ ହାଣିବାକୁ ଉଦ୍ୟମ କରିଥିଲେ। ଅଧ୍ୟାପକ ହେଲମେଟ ପିନ୍ଧି ଥିବାରୁ ତାଙ୍କ ହେଲମେଟରେ ଭୁଜାଲି ଚୋଟ ବାଜିଥିଲା। ଫଳରେ ସେ ଅଳ୍ପକେ ବର୍ତ୍ତି ଯାଇଥିଲେ। ହେଲେ ଅଧ୍ୟାପକଙ୍କ କାନ୍ଧରେ ଆଘାତ ଲାଗିଥିଲା। ସେ ଘଟଣାସ୍ଥଳରୁ ଖସିଯିବାକୁ ଉଦ୍ୟମ କରିବା ବେଳେ ଦୁର୍ବୃତ୍ତମାନେ ତାଙ୍କୁ ଗୋଡାଇଥିଲେ। ଅଧ୍ୟାପକ ନିକଟସ୍ଥ ଗ୍ରାମ ଭିତରକୁ ପଶିଯିବାରୁ ଦୁର୍ବୃତ୍ତମାନେ ସେଠାରୁ ଫେରାର୍ ହୋଇଯାଇଥିଲେ। 

କେଉଁ କାରଣରୁ ଅଧ୍ୟାପକଙ୍କୁ ଆକ୍ରମଣ କରାଯାଇଛି ତାହାର କାରଣ ଅସ୍ପଷ୍ଟ ରହିଛି। ପୋଲିସ ଏହି ଘଟଣାର ଛାନଭିନ୍ ଚଳାଇଛି। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି।