ଇସ୍ଲାମାବାଦ: ପାକିସ୍ତାନରେ ଆତଙ୍କବାଦୀ ଆକ୍ରମଣ ଲାଗି ଦାୟୀ ତେହରିକ ଏ ତାଲିବାନ ପାକିସ୍ତାନ (ଟିଟିପି)କୁ ଅଲକାଏଦା ଏବଂ ଅନ୍ୟ ଆତଙ୍କୀ ଗୋଷ୍ଠୀ ସହାୟତା କରୁଛନ୍ତି । ଜାତିସଂଘର ଏକ ରିପୋର୍ଟ ଆଧାରରେ ଗଣମାଧ୍ୟରେ ଏହି ଖବର ପ୍ରକାଶ ପାଇଛି । ପାକିସ୍ତାନ ଏବଂ ଆଫଗାନିସ୍ତାନରେ ସକ୍ରିୟ ରହିଛି ଟିଟିପି ଆତଙ୍କବାଦୀ ସଂଗଠନ । ୨୦୦୭ରେ ପ୍ରତିଷ୍ଠା ହୋଇଥିଲା ଟିଟିପି । ପାକିସ୍ତାନୀ ଗଣମାଧ୍ୟମ ଡନ୍‌ ନ୍ୟୁଜରେ ପ୍ରକାଶିତ ଖବର ଅନୁସାରେ, ଟିଟିପିକୁ ଅଲକାଏଦା ସହାୟତା କରୁଥିବା ନେଇ ଟିଟିପି ଉପରେ ନଜର ରଖୁଥିବା ଟିମ୍‌ ଦ୍ବାରା ଜାତିସଂଘ ସୁରକ୍ଷା ପରିଷଦକୁ ଦିଆଯାଥିବା ୩୩ ତମ ରିପୋର୍ଟରେ ଦର୍ଶାଯାଇଛି । 

 ରିପୋର୍ଟରେ ଆହୁରି ଦର୍ଶାଯାଇଛି ଯେ, ଅଲକାଏଦା ଏବଂ ଅନ୍ୟ ସଂଗଠନ କେବଳ ଟିଟିପିକୁ ଅସ୍ତ୍ରଶସ୍ତ୍ର ଦେଉଛନ୍ତି ତାନୁହେଁ ବରଂ ପାକିସ୍ତାନରେ ଆତଙ୍କବାଦୀ ଗତିବିଧି ଜାରି ରଖିବାକୁ ସମର୍ଥନ ମଧ୍ୟ ଦେଉଛନ୍ତି । ନିକଟ ଅତୀତରେ ପାକିସ୍ତାନରେ ବହୁ ବଡ଼ ହମଲା ହୋଇଛି । ଆଉ ଏସବୁ ଆକ୍ରମଣ ପଛରେ ଟିଟିପିର ହାତ ରହିଛି । ହେଲେ ପ୍ରତିବନ୍ଧିତ ଆତଙ୍କବାଦୀ ସଂଗଠନ ଉପରେ ସରକାର ଆଖିଦୃଶିଆ ଆକ୍ସନ ନେଉନାହାନ୍ତି । ଟିଟିପି ଉପରେ କାର୍ଯ୍ୟାନୁଷ୍ଠାନ ହେଉନଥିବାରୁ ପାକିସ୍ତାନ ଏବଂ ଆଫଗାନ ତାଲିବାନ ମଧ୍ୟରେ ତିକ୍ତତା ବୃଦ୍ଧି ପାଇବାରେ ଲାଗିଛି ।

 ସେପଟେ ଟିଟିପି ଉପରେ ଆଫଗାନ ତାଲିବାନ କାର୍ଯ୍ୟାନୁଷ୍ଠାନ ନେଉନଥିବାରୁ ଅନ୍ତର୍ଜାତୀୟ ସୁରକ୍ଷା ପ୍ରତି ବିପଦ ସୃଷ୍ଟି ହେଉଛି ବୋଲି ପାକିସ୍ତାନ ଅଭିଯୋଗ କରିଆସିଛି । ଅନ୍ୟପକ୍ଷରେ ରିପୋର୍ଟରେ ଦର୍ଶାଯାଇଛି ଯେ, ଆଫଗାନ ତାଲିବାନର ନାଲିଆଖି ସତ୍ତ୍ବେ ଟିଟିପି ଆଫଗାନିସ୍ତାନ ମାଟିରୁ ପାକିସ୍ତାନ ଉପରେ ଆକ୍ରମଣ କରୁଛି । ଏପରିକି ତାଲବାନ ସଦସ୍ୟ ଟିଟିପିରେ ସାମିଲ ହେବା ପରେ ଏହାର ଶକ୍ତି ଆହୁରି ବୃଦ୍ଧି ପାଇଛି । ଏହା ବ୍ୟତୀତ ଟିଟିପି ଆତଙ୍କବାଦୀ ଏବଂ ସେମାନଙ୍କ ପରିବାରକୁ ଆଫଗାନ ତାଲିବାନ ନିୟମିତ ସହାୟତା କରୁଛି ବେଲି ମଧ୍ୟ ରିପୋର୍ଟରେ ଦର୍ଶାଯାଇଥିବା ନେଇ ‘ଡନ ନ୍ୟୁଜ’ରେ ଖବର ପ୍ରକାଶ ପାଇଛି ।