ନୂଆଦିଲ୍ଲୀ,୦୩/୦୨: ଦରଦାମ ବୃଦ୍ଧିରେ ଧଇଁସଇଁ ହୋଇଯାଇଥିବା ଜନସାଧାରଣଙ୍କୁ ଆଶ୍ୱସ୍ତି ଦେବା ପାଇଁ କେନ୍ଦ୍ର ସରକାର ‘ଭାରତ’ ବ୍ରାଣ୍ଡକୁ ଆଗକୁ ବଢ଼ାଇବା ପାଇଁ ନିଷ୍ପତ୍ତି ନେଇଛନ୍ତି । ଏହା ଅଧୀନରେ ‘ଭାରତ ରାଇସ୍’କୁ ବଜାରକୁ ଛଡ଼ାଯିବ । ଆସନ୍ତା ସପ୍ତାହରୁ ଏହି ଶସ୍ତା ଚାଉଳର ବିକ୍ରି କିଲୋ ପିଛା ୨୯ ଟଙ୍କା ହିସାବରେ ହେବ । ତା’ସହିତ ସରକାର ଶୁକ୍ରବାର ବ୍ୟବସାୟୀମାନଙ୍କୁ ନିର୍ଦ୍ଦେଶ ଦେଇଛନ୍ତି ଯେ, ସେମାନେ ନିଜର ଷ୍ଟକ୍କୁ ନେଇ ଜଣାନ୍ତୁ, ଯାହାଦ୍ୱାରା ଦରକୁ ନିୟନ୍ତ୍ରଣରେ ରଖାଯାଇପାରିବ ।
କେନ୍ଦ୍ର ଖାଦ୍ୟ ସଚିବ ସଞ୍ଜୀବ ଚୋପ୍ରା ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି ଯେ, ଗତ ବର୍ଷକରେ ଚାଉଳର ଖୁଚୁରା ଏବଂ ପାଇକାରୀ ଦରରେ ପାଖାପାଖି ୧୫% ବୃଦ୍ଧି ଘଟିଛି । ରପ୍ତାନି ଉପରେ କଟକଣା ସତ୍ତେ୍ୱ ଦର ଲଗାତର ବଢ଼ିଚାଲିଛି । ଏଥିପାଇଁ ସରକାର ଦରକୁ ନିୟନ୍ତ୍ରଣରେ ରଖିବା ପାଇଁ ‘ଭାରତ ରାଇସ୍’କୁ ବଜାରକୁ ଆଣିବା ପାଇଁ ନିଷ୍ପତ୍ତି ନେଇଛନ୍ତି । ‘ଭାରତ ରାଇସ୍’କୁ ନାଫେଡ୍ ଏବଂ ଏନ୍ସିସିଏଫ୍ କୋଅପରେଟିଭ୍ ଜରିଆରେ ବଜାରରେ କିଲୋ ପିଛା ୨୯ ଟଙ୍କା ହିସାବରେ ବିକ୍ରି କରାଯିବ । ଏହାବ୍ୟତୀତ ‘ଭାରତ ରାଇସ୍’ କେନ୍ଦ୍ରୀୟ ଭଣ୍ଡାରର ରିଟେଲ ଚେନ୍ରେ ବି ଉପଲବ୍ଧ କରାଯିବ ।
ସଞ୍ଜୀବ ଚୋପ୍ରା ଆହୁରି କହିଛନ୍ତି ଯେ, ‘ଭାରତ ରାଇସ୍’କୁ ଇ-କମର୍ସ ପ୍ଲାଟ୍ଫର୍ମଗୁଡ଼ିକ ଜରିଆରେ ବି ଉପଲବ୍ଧ କରାଯିବ । ଆସନ୍ତା ସପ୍ତାହରୁ ଏହି ବ୍ରାଣ୍ଡ ଚାଉଳ ୫ ଏବଂ ୧୦ କିଲୋ ପ୍ୟାକ୍ରେ ଲୋକଙ୍କୁ ମିଳିବ । ପ୍ରଥମ ପର୍ଯ୍ୟାୟରେ ସରକାର ୫ ଲକ୍ଷ ଟନ୍ ଚାଉଳ ରିଟେଲ ବଜାରରେ ବିକ୍ରି ପାଇଁ ଉପଲବ୍ଧ କରିଛନ୍ତି । ସେ ସ୍ପଷ୍ଟ କରିଛନ୍ତି ଯେ, ଦରଦାମ ବୃଦ୍ଧି ନିୟନ୍ତ୍ରଣକୁ ନ ଆସିବା ପର୍ଯ୍ୟନ୍ତ ସରକାର ରପ୍ତାନି କଟକଣା ଉଠାଇବେ ନାହିଁ । ଚାଉଳ ରପ୍ତାନି ଉପରେ ପ୍ରତିବନ୍ଧ ଜାରି ରହିବ ।
ଦରଦାମ ବୃଦ୍ଧିକୁ ନିୟନ୍ତ୍ରଣ କରିବା ପାଇଁ ସରକାର ‘ଭାରତ ଅଟା’ ଏବଂ ‘ଭାରତ ଡାଲି’ ପୂର୍ବରୁ ବଜାରକୁ ଆଣିସାରିଛନ୍ତି । ଭାରତ ଅଟା କିଲୋ ପିଛା ୨୭.୫୦ ଟଙ୍କା ଏବଂ ଭାରତ ଡାଲି କିଲୋ ପିଛା ୬୦ ଟଙ୍କାରେ ବିକ୍ରି ହେଉଛି । ଖାଦ୍ୟ ସଚିବ କହିଛନ୍ତି ଯେ, ମନ୍ତ୍ରାଳୟର ନୂଆ ନିର୍ଦ୍ଦେଶ ଅନୁସାରେ, ପ୍ରତି ଶୁକ୍ରବାର ଖୁଚୁରା ଏବଂ ପାଇକାରୀ ବ୍ୟବସାୟୀଙ୍କୁ ଚାଉଳ ଷ୍ଟକ୍କୁ ନେଇ ପୋର୍ଟାଲରେ ଜଣାଇବାକୁ ପଡ଼ିବ। ସେ କହିଛନ୍ତି ଯେ, ଚାଉଳ ଉପରେ ମହଜୁଦ ସୀମା ଲଗାଇବା ସହ ସମସ୍ତ ବିକଳ୍ପ ଖୋଲା ଅଛି । ଏହାର ଦର କମାଇବାକୁ ସରକାର ସମସ୍ତ ପଦକ୍ଷେପ ଗ୍ରହଣ କରୁଛନ୍ତି । ଚାଉଳ ବ୍ୟତୀତ ଅନ୍ୟ ସମସ୍ତ ପ୍ରମୁଖ ଖାଦ୍ୟ ସାମଗ୍ରୀ ଦର ନିୟନ୍ତ୍ରଣରେ ଥିବା ଶ୍ରୀ ଚୋପ୍ରା କହିଛନ୍ତି।
