ରାଞ୍ଚି: ଝାଡ଼ଖଣ୍ଡରେ ରାଜନୈତିକ ଅସ୍ଥିରତା ବୃଦ୍ଧି ପାଇବାରେ ଲାଗିଛି । ଏହାରି ମଧ୍ୟରେ ମହାମେଣ୍ଟର ବିଧାୟକମାନେ ହାଇଦ୍ରାବାଦ ଅଭିମୁଖେ ଯାତ୍ରା ଆରମ୍ଭ କରିଛନ୍ତି । ବିର୍ସା ମୁଣ୍ଡା ଏୟାରପୋର୍ଟରୁ ଦୁଇଟି ଚାଟାର୍ଡ ଫ୍ଲାଇଟ୍ ଯୋଗେ ବିଧାୟକମାନେ ହାଇଦ୍ରାବାଦ ଯାଇଛନ୍ତି । ଜେଏମଏମ ଏବଂ କଂଗ୍ରେସ ଦଳର ବିଧାୟକମାନେ ହାଇଦ୍ରାବାଦ ଯିବାକୁ ଥିବା ବେଳେ ଚମ୍ପାଇ ସୋରେନ୍ ଏବଂ କଂଗ୍ରେସ ବିଧାୟକ ଦଳର ନେତା ଆଲମଗୀରି ଆଲମ ରାଞ୍ଚିରେ ରହିବେ ବୋଲି ଜଣାପଡ଼ିଛି । ବିଧାୟକମାନେ ପ୍ରଥମେ ବସ୍ ଯୋଗେ ରାଞ୍ଚି ଏୟାରପୋର୍ଟ ପରେ ଚାଟାର୍ଡ ଫ୍ଲାଇଟରେ ହାଇଦ୍ରାବାଦ ଯିବା ନେଇ ଜଣାପଡ଼ିଥିଲା ।
ସେହିଭଳି ଏୟାରପୋର୍ଟ ଯିବା ସମୟରେ ରାଜ୍ୟ କଂଗ୍ରେସ ମୁଖ୍ୟ ରାଜେଶ ଠାକୁର କହିଥିଲେ ଯେ, ଆପଣମାନେ ଜାଣିଛନ୍ତି ସେମାନେ କେମିତି ଲୋକ, କେତେବେଳେ କିଛି ବି କରିପାରନ୍ତି । ମୋଟ ୪୩ ବିଧାୟକ ଯାଉଛନ୍ତି । ଏପରିକି ସମସ୍ତ ବିଧାୟକ ହାଇଦ୍ରାବାଦର ବେଗମପେଟ ଯିବେ ବୋଲି ସେ କହିଥିଲେ । ସେପଟେ ରାଜ୍ୟରେ ରାଜନୈତିକ ସଙ୍କଟ ମଧ୍ୟରେ ସରକାର କିଏ ଗଢ଼ିବ ତାକୁ ନେଇ ଚର୍ଚ୍ଚା ଲାଗିରହିଛି ।
#WATCH | Ranchi: Jharkhand Congress president Rajesh Thakur says, "We are going to the airport. You know what kind of people they are, they can do anything anytime. A total of 43 MLAs are going..." pic.twitter.com/stNK8RTkXy
— ANI (@ANI) February 1, 2024
ଏବେ ରାଜ୍ୟରେ ୮୧ ଜଣ ବିଧାୟକ ଅଛନ୍ତି । ବହୁମତ ଲାଗି ୪୧ ବିଧାୟକଙ୍କ ସମର୍ଥନ ଜରୁରି । ଯେଉଁ ଦଳକୁ ୪୧ ଜଣ ବିଧାୟକ ସମର୍ଥନ କରିବେ ସେହି ଦଳ ସରକାର ଗଢ଼ିବ । ବୁଧବାର ଦିନ ଚମ୍ପାଇ ସୋରେନ୍ ୪୩ ଜଣ ବିଧାୟକଙ୍କ ସମର୍ଥନ ଥିବା ନେଇ ରାଜ୍ୟପାଳଙ୍କୁ ଜଣାଇଥିଲେ । ହେଲେ ତାଙ୍କ ପାଖରେ ୪୭ ଜଣ ବିଧାୟକ ରହିଛନ୍ତି । ଜେଏମଏମର ୨୯ ବିଧାୟକ ଥିବା ବେଳେ କଂଗ୍ରେସର ୧୭, ଆରଜେଡିର ଜଣେ ଏବଂ ସିପିଆଇର ଜଣେ ବିଧାୟକ ସାମିଲ ଅଛନ୍ତି ।
ଅନ୍ୟପଟେ ଏନଡିଏ ପାଖରେ ୩୨ ଜଣ ବିଧାୟକ ଅଛନ୍ତି । ସେଥିମଧ୍ୟରୁ ବିଜେପିର ୨୬ ବିଧାୟକ ଥିବା ବେଳେ ଏଜେଏମୟୁର ୩ ଜଣ, ଏନସିପି (ଏପି)ର ଜଣେ ଏବଂ ଦୁଇ ଜଣ ନିର୍ଦ୍ଦଳୀୟ ବିଧାୟକ ସାମିଲ ଅଛନ୍ତି । ଏଭଳି ସ୍ଥିତିରେ ବିହାର ଭଳି ଝାଡ଼ଖଣ୍ଡରେ ସରକାର ଗଢ଼ିବାକୁ ହେଲେ ଏନଡିଏକୁ ଆଉ ୯ ବିଧାୟକଙ୍କ ସମର୍ଥନ ଆବଶ୍ୟକ ।
