କୋରାପୁଟ,୨୯/୦୨: ଶବର ସଂସ୍କୃତିକୁ ସମ୍ମାନ ଦେବା ଏବଂ ଶାବର ଶ୍ରୀକ୍ଷେତ୍ରର ପ୍ରଚାରପ୍ରସାର ପାଇଁ କୋରାପୁଟ ରେଳ ଷ୍ଟେସନର ରୂପ ପରିବର୍ତ୍ତନ କରାଯିବ । କୋରାପୁଟ ଜଗନ୍ନାଥ ମନ୍ଦିର ଢାଞ୍ଚାରେ ଷ୍ଟେସନ୍ର ମୁଖ୍ୟ ଗେଟ୍ ଓ ବିଭିନ୍ନ ପ୍ରବେଶ ପଥ ନିର୍ମାଣ କରାଯିବ । କେନ୍ଦ୍ର ସରକାର ତରଫରୁ ଗତ ୨୬ ତାରିଖରେ ଅମୃତ ଭାରତ ପ୍ରକଳ୍ପ ଅଧୀନରେ ଭର୍ଚୁଆଲ୍ ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାର ଶିଳାନ୍ୟାସ କରି ଏହି ସୂଚନା ଦେଇଛନ୍ତି ।
ସୂଚନା ଅନୁଯାୟୀ, ଏହି ପ୍ରକଳ୍ପ ପାଇଁ ୨୧ କୋଟି ୫୦ ଲକ୍ଷ ଟଙ୍କା ବ୍ୟୟ କରାଯିବ । ଷ୍ଟେସନକୁ ସମ୍ପୂର୍ଣ ଭାବେ ୱାଇଫାଇ ସଂଯୋଗ କରାଯିବ । ଏହି ସେବା ଯାତ୍ରୀଙ୍କ ପାଇଁ ସମ୍ପୂର୍ଣ ମାଗଣା ରହିବ । ଏଥିସହ ସ୍ୱତନ୍ତ୍ର ଯାତ୍ରୀ ପ୍ରତୀକ୍ଷାଳୟ, ଲିଫ୍ଟ, ଏସ୍କାଲେଟର, ଶୌଚାଳୟ, ବଡ଼ ଫୁଟ୍ ଓଭରବ୍ରିଜ୍ ନିର୍ମାଣ କରାଯିବ । ସଫେଇ ଦିଗକୁ ଅଧିକ ଗୁରୁତ୍ୱ ଦିଆଯିବ । ଯାତ୍ରୀ ସୂଚନା ବ୍ୟବସ୍ଥାକୁ ଆହୁରି ଉନ୍ନତ କରାଯିବ । ‘ଏକ ଷ୍ଟେସନ ଏକ ଉତ୍ପାଦ’ ବର୍ଗରେ ଜିଲ୍ଲାର ମିଲେଟ୍ ସାମଗ୍ରୀକୁ ପ୍ରୋତ୍ସାହନ ଦିଆଯିବ । ବ୍ୟବସାୟିକ ବୈଠକ ପାଇଁ ଏକ କୁକେଟିଭ ଲଙ୍ଗ ନିର୍ମାଣ କରାଯିବ । ବିଶେଷକରି ଭିନ୍ନକ୍ଷମ ଯାତ୍ରୀମାନଙ୍କ ପାଇଁ ସ୍ୱତନ୍ତ୍ର ସୁବିଧା କରାଯିବ ।
ଯାତ୍ରୀ ମଳୟ ମହାପାତ୍ର କହିଛନ୍ତି, ଜିଲ୍ଲାର ଏକ ପୁରୁଣା ଷ୍ଟେସନ ଭାବେ ଏହା ପରିଚିତ । ଏହାର ଉନ୍ନତି ଓ ସୌନ୍ଦର୍ଯ୍ୟକରଣ କାର୍ଯ୍ୟ ହାତକୁ ନିଆଯାଇଥିବା ଶୁଣି ଖୁସି ଲାଗିଲା । ସେହିପରି ଶାବର ଶ୍ରୀକ୍ଷେତ୍ର ସଂସ୍କୃତିକୁ ସମ୍ମାନ ଓ ଗୁରୁତ୍ୱ ଦେବା ଜିଲ୍ଲାବାସୀଙ୍କ ପାଇଁ ଗର୍ବର ବିଷୟ । ଷ୍ଟେସନରେ ବିଭିନ୍ନ ସେବା ମିଳିଲେ ଯାତ୍ରୀମାନେ ଆରାମରେ ଯାତ୍ରା କରିପାରିବେ । ଏହା ହେଲେ ଆଗକୁ ଯାତ୍ରୀ ସଂଖ୍ୟା ମଧ୍ୟ ବୃଦ୍ଧି ପାଇବ