ପ୍ରମୁଖ ଖବର
  • ଭୁବନେଶ୍ଵର : ଲୁମ୍ବିନୀ ବିହାର ମା' ମଙ୍ଗଳା ବସ୍ତିରେ ବିଲ୍ ଗେଟ୍‌ସ, ଲୋକମାନଙ୍କୁ ଭେଟି ବିଭିନ୍ନ ମୌଳିକ ସୁବିଧା ସମ୍ପର୍କରେ ପଚାରି ବୁଝିଲେ
  • ||
  • ଭୁବନେଶ୍ଵର : ଓଡ଼ିଶା ଆସୁଛନ୍ତି ମହାମହିମ, ମା' କିଚକେଶ୍ଵରୀଙ୍କ ଦର୍ଶନ ସହ ବିଭିନ୍ନ କାର୍ଯ୍ୟକ୍ରମରେ ଦେବେ ଯୋଗ
  • ||

ଇଂଲଣ୍ଡର ମେଣ୍ଟାଲ୍‌ ହେଲ୍‌ଥ ସେଣ୍ଟରରେ ରୋଗୀଙ୍କୁ ଦୁଷ୍କର୍ମ, ୩୦ ହସ୍ପିଟାଲରୁ ସାମ୍ନାକୁ ଆସିଲା୨୦ ହଜାର ଅଭିଯୋଗ

ଲଣ୍ଡନ,୩୦/୦୧: ଇଂଲଣ୍ଡରେ  ମାନସିକ ରୋଗୀମାନଙ୍କୁ ଦୁଷ୍କର୍ମ  କରାଯାଉଥିବା ଅଭିଯୋଗ ହୋଇଛି ।  ୩୦ ହସ୍ପିଟାଲରେ ୨୦୧୯ରୁ ୨୦୨୩  ଅର୍ଥାତ ୪ ବର୍ଷ ମଧ୍ୟରେ ଏ ନେଇ ୨୦ ହଜାର ଅଭିଯୋଗ ସାମ୍ନାକୁ  ଆସିଲାଣି । କିନ୍ତୁ ଆଶ୍ଚର୍ଯ୍ୟର ବିଷୟ ଏହା ଉପରେ ସରକାର ନୀରବଦ୍ରଷ୍ଟା ସାଜି  କୌଣସି କାର୍ଯ୍ୟାନୁଷ୍ଠାନ ନେଉନାହାନ୍ତି । ଇଂଲଣ୍ଡର ଦୁଇଟି ବଡ଼ ମିଡିଆ ହାଉସ୍‌ ମିଶି ମେଣ୍ଟାଲ୍‌ ହେଲ୍‌ଥ ସେଣ୍ଟରର ରୋଗୀମାନଙ୍କୁ ଦୁଷ୍କର୍ମ ଓ ଯୌନ ଉତ୍ପୀଡ଼ନ ଦିଆଯାଉଥିବା ସଂକ୍ରାନ୍ତ ବଡ଼ ସ୍କାଣ୍ଡାଲ୍‌ର ପ୍ରଘଟ କରିଛନ୍ତି । 

ସ୍କାଏ ନ୍ୟୁଜ୍‌  ଏବଂ ଦ ଇଣ୍ଡିପେଣ୍ଡେଣ୍ଟର ସ୍ୱତନ୍ତ୍ର ରିପୋର୍ଟ  ଅନୁସାରେ ମାମଲା ସେତେବେଳେ ସାମ୍ନାକୁ ଆସିଲା ଯେତେବେଳେ ଜାତୀୟ ସ୍ତରୀୟ ସନ୍ତରଣକାରୀ ଏଲେକ୍ସିସ୍‌ କ୍ୱିନ୍‌  ଇଂଲଣ୍ଡର ସରକାରୀ ସ୍ୱାସ୍ଥ୍ୟ ସେବା  (ଏନ୍‌ଏଚ୍‌ଏସ୍‌) ଓ ମାନସିକ ସ୍ୱାସ୍ଥ୍ୟ କ୍ଷେତ୍ରର ପୋଲ୍‌ ଖୋଲିଦେଲେ । କ୍ୱିନ୍‌ଙ୍କ  କହିବାନୁସାରେ ତାଙ୍କୁ ହସ୍ପିଟାଲରେ ବାରମ୍ବାର ଦୁଷ୍କର୍ମ ଓ ଯୌନ ଶୋଷଣ କରାଯାଉଥିଲା । ଶେଷରେ ଏହି ଘଟଣା ବଢ଼ିବାକୁ ଲାଗିବାରୁ ସେ ହସ୍ପିଟାଲ  ଛାଡ଼ି ପଳାଇଥିଲେ । ଏହାକୁ ନେଇ  ଏବେ ସରକାରଙ୍କ ଚିନ୍ତା ବଢ଼ିଯାଇଛି । 

ବ୍ରିଟିଶ ଗଣମାଧ୍ୟମରେ ଏହି  ମାମଲାକୁ ‘ନ୍ୟାସନାଲ୍‌ ସେକ୍ସ ସ୍କାଣ୍ଡାଲ’  କୁହାଯାଉଛି । ଜାତୀୟ ସ୍ତରୀୟ  ସନ୍ତରଣକାରୀ କ୍ୱିନ୍‌ ଏକ ପଡ୍‌କାଷ୍ଟରେ  କହିଛନ୍ତି, ମେଣ୍ଟାଲ୍‌ ହେଲ୍‌ଥ ସେଣ୍ଟରରେ  ମୋତେ ଅନେକ ବାର ବଳାତ୍କାର  କରାଯାଇଥିଲା । ଏବେ ସେଠାରୁ  ବାହାରିବା ପରେ ଦୁନିଆକୁ ସତ କଥା  ବତାଉଛି । ମୁଁ ଅଟିଜିମ୍‌ର ଶିକାର ହୋଇ  ସେଠାକୁ ଚିକିତ୍ସା ପାଇଁ ଯାଇଥିଲି।  କ୍ୱିନ୍‌ଙ୍କ ପରେ ଜଣେ ଆଇନ ସ୍ନାତକ ବି  ମୁହଁ ଖୋଲିଛନ୍ତି । ତାଙ୍କ ପରେ ଜଣେ  ମହିଳା ବୟାନ ଦେଇ କହିଛନ୍ତି, ମୁଁ ଏକ  ମେଣ୍ଟାଲ୍‌ ହେଲ୍‌ଥ ସେଣ୍ଟରରେ ଚିକିତ୍ସିତ  ହେଉଥିଲି । ଏହି ୫ ମାସ ମଧ୍ୟରେ ପୁରୁଷ  କର୍ମଚାରୀମାନେ ମୋତେ ଯୌନ ଉତ୍ପୀଡ଼ନ  ଦେଉଥିଲେ । ମୋ ଭଳି ଅନେକ ରୋଗୀ  ସମାନ ନିର୍ଯାତନାର ଶିକାର ହେଉଛନ୍ତି ।  ପ୍ରଥମେ ଭୟରେ ମୁହଁ ଖୋଲି ନ ଥିଲି ।  କ୍ୱିନ୍‌ଙ୍କ ଯୋଗୁ ସାହସ ବାନ୍ଧି ସତ କହିଛି । 

୨୦୧୧ରେ ବ୍ରିଟେନ୍‌ର ସ୍ୱାସ୍ଥ୍ୟ  ବିଭାଗ ସରକାରଙ୍କୁ ଏକ ରିପୋର୍ଟ  ଦେଇଥିଲା । ଏଥିରେ କୁହାଯାଇଥିଲା କି  ପୁରୁଷ ଓ ମହିଳା ରୋଗୀଙ୍କୁ ଏକାଠି  ରଖାଯିବା ଉଚିତ ନୁହେଁ । ଏଥିପାଇଁ  ଆବଶ୍ୟକ ୱାର୍ଡ ଏବଂ କର୍ମଚାରୀ  ରଖାଯିବା ଉଚିତ । ତେବେ ଏହି  ରିପୋର୍ଟ ଉପରେ କୌଣସି ପଦକ୍ଷେପ  ନିଆଯାଇ ନ ଥିଲା । କିନ୍ତୁ ୧୨ ବର୍ଷ  ପରେ ବି ମେଣ୍ଟାଲ୍‌ କେୟାର ସେଣ୍ଟରରେ ଦୁଷ୍କର୍ମ ଓ ଯୌନ ନିର୍ଯାତନା ଜାରି  ରହିଥିଲା । ହଜାର ହଜାର ଅଭିଯୋଗ  ସାମ୍ନାକୁ ଆସୁଥିବା ରିପୋର୍ଟ କହିଛି

ଇଂଲଣ୍ଡର ଦୁଇଟିଯାକ ଗଣମାଧ୍ୟମ  ସଂସ୍ଥା ସରକାରଙ୍କଠାରୁ ୫୦ଟି ମାମଲାରେ  ନିଆଯାଇଥିବା କାର୍ଯ୍ୟାନୁଷ୍ଠାନ ବାବଦରେ ରିପୋର୍ଟ ମାଗିଥିଲେ । କିନ୍ତୁ ସରକାର  ଶୁଣି ନ ଥିଲେ । ସରକାରଙ୍କ ରିପୋର୍ଟରେ ଦୁଷ୍କର୍ମ ଓ ଯୌନ ଉତ୍ପୀଡ଼ନ ଶବ୍ଦ ପରିବର୍ତ୍ତେ ‘ସେକ୍ସୁଆଲ୍‌ ସେଫ୍‌ଟି  ଇନ୍‌ସିଡେଣ୍ଟ‘ ଲେଖାଯାଇଥିଲା ।  ୫୦ରୁ ୩୮ଟି ମାମଲାରେ ଜବାବ  ମିଳିଥିଲା । ବାସ୍ତବ କଥା ହେଉଛି  ୨୦୧୯ରୁ ୨୦୨୩ ମଧ୍ୟରେ ସେକ୍ସୁଆଲ୍‌  ସେଫ୍‌ଟି ଇନ୍ସିଡେଣ୍ଟସର ପ୍ରାୟ ୨୦  ହଜାର ଅଭିଯୋଗ ହୋଇଛି । ୨୦୨୩  ଜାନୁଆରୀରୁ ଅଗଷ୍ଟ ମଧ୍ୟରେ ଏହିଭଳି  ୪ ହଜାର ମାମଲା ସାମ୍ନାକୁ ଆସିଥିଲା ।  

ଉଲ୍ଲେଖଯୋଗ୍ୟ, ମେଣ୍ଟାଲ୍‌ ହେଲ୍‌ଥ  ସେଣ୍ଟରର ପରିଚାଳନା ଦାୟିତ୍ୱ  ଏନ୍‌ଏଚ୍‌ଏସ୍‌ ଅଧୀନରେ ଆସୁଥିବା  ସ୍ୱତନ୍ତ୍ର ଟ୍ରଷ୍ଟ ବୋର୍ଡକୁ ଦିଆଯାଏ ।  କିନ୍ତୁ ୨୦୨୦ରେ ଜାରି ମାର୍ଗଦର୍ଶିକାକୁ  କେହି ଅନୁସରଣ କରିନାହାନ୍ତି ।

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.