ନୂଆଦିଲ୍ଲୀ: ବିଶ୍ବରେ ଭାରତୀୟ ଜ୍ଞାନକୗଶଳରେ ବିକଶିତ ଫାଇଟର ଜେଟର ଚାହିଦା ବୃଦ୍ଧି ପାଇବାରେ ଲାଗିଛି । ଏବେ ନାଇଜେରିଆ, ଫିଲିପାଇନ୍ସ, ଆର୍ଜେଣ୍ଟିନିଆ ଏବଂ ଇଜିପ୍ଟ ଭାରତ ଲାଇଟ କମ୍ବାଟ ଏୟାରକ୍ରାଫ୍ଟ ‘ତେଜସ୍’ କ୍ରୟ କରିବାକୁ ଆଗ୍ରହ ପ୍ରକାଶ କରିଛନ୍ତି । ଏନେଇ ଗୁରୁବାର ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ (ହାଲ୍)ର ଅଧ୍ୟକ୍ଷ ଏବଂ ପରିଚାଳନା ନିର୍ଦ୍ଦେଶକ ସିବି ଅନନ୍ଥକ୍ରିଷ୍ଣନ କହିଛନ୍ତି । ଏହି ସବୁ ଦେଶ ଖୁବଶୀଘ୍ର ତେଜସ୍ ଏୟାରକ୍ରାଫ୍ଟ କ୍ରୟ କରିବା ନେଇ ଘୋଷଣା କରିପାରନ୍ତି ବୋଲି ମଧ୍ୟ ସେ କହିଛନ୍ତି । ବିଶେଷ କରି ନାଇଜେରିଆ, ଫିଲିପାଇନ୍ସ ଏବଂ ଇଜିପ୍ଟ ଅଧିକ ଆଗ୍ରହୀ ଅଛନ୍ତି ବୋଲି ଅନନ୍ଥକ୍ରିଷ୍ଣନ କହିଛନ୍ତି ।
ସେପଟେ ଯଦି ଏହି ସବୁ ଦେଶ ତେଜସ୍ ଲାଗି ଅର୍ଡର ଦିଅନ୍ତି ତେବେ ହାଲ୍ ପାଇଁ ଆହ୍ବାନ ସୃଷ୍ଟି ହୋଇପାରେ । କାରଣ ଏହି ଏୟାରକ୍ରାଫ୍ଟର କିଛି ଯନ୍ତ୍ରଂଶ ବ୍ରିଟେନରୁ ଆମଦାନି କରିବାକୁ ପଡ଼େ। ତେବେ ସମୟ ଲାଗିଲେ ବି ଦେଶଗୁଡ଼ିକର ଚାହିଦ ପୂରଣ କରାଯାଇପାରିବ ବୋଲି ହାଲ ନିର୍ଦ୍ଦେଶକ କହିଛନ୍ତି । ଅନ୍ୟପଟେ ଫକ୍ଲାଣ୍ଡସ୍ ଯୁଦ୍ଧ ପରେ ଆର୍ଜେଣ୍ଟିନିଆକୁ କୌଣସି ପ୍ରକାର ସାମରିକ ଯୁଦ୍ଧାସ୍ତ୍ର ରପ୍ତାନି ଉପରେ ରୋକ ଲଗାଇଛି ବ୍ରିଟେନ । ଏଭଳି ସ୍ଥିତିରେ ମଧ୍ୟ ହାଲକୁ ଅନ୍ୟ ଏକ ଆହ୍ବାନର ସାମ୍ନା କରିବାକୁ ପଡ଼ିବ । କାରଣ ତେଜସ୍ ତିଆରି ଲାଗି ବ୍ରିଟେନ୍ରେ ନିର୍ମିତ ଯନ୍ତ୍ରାଂଶର ବ୍ୟବହାର କରିବାକୁ ପଡ଼ୁଛି ।
ଗତ ଜୁଲାଇରେ ଆର୍ଜେଣ୍ଟିନିଆ ପ୍ରତିରକ୍ଷା ମନ୍ତ୍ରୀ ଭାରତ ଗସ୍ତରେ ଆସିଥିବା ବେଳେ ଦୁଇ ଦେଶ ମଧ୍ୟରେ ଔଦ୍ୟୋଗିକ ସମ୍ବନ୍ଧ ବୃଦ୍ଧି କରିବା ଉପରେ ଜୋର ଦେଇଥିଲେ । ସେପଟେ ହେଲିକପ୍ଟର ନିର୍ମାଣ ଲାଗି ଯନ୍ତ୍ରାଂଶ ଏବଂ ଅନ୍ୟ ସେବା ଯୋଗାଇଦେବ ବୋଲି ଆର୍ଜେଣ୍ଟିନିଆ ବାୟୁସେନା ସହ ବୁଝମଣା କରିଥିଲା ହାଲ୍ । ସେହିଭଳି ଫିଲିପାଇନ୍ସ ଏବଂ ଭାରତ ମଧ୍ୟରେ ସାମରିକ ସଂପର୍କ ବୃଦ୍ଧିପାଇବାରେ ଲାଗିଛି । ଜାନୁଆରିରେ ସାମରିକ ସହାୟତା ଲାଗି ୩୭୫ ମିଲିୟନ ଡଲାରର ଡିଲ କରିଥିଲା ଫିଲିପାଇନ୍ସ ।
ଭାରତରେ ବିକଶିତ ତେଜସ୍ ଏକ ସିଙ୍ଗଲ ଇଞ୍ଜିନ ଏୟାର କ୍ରାଫ୍ଟ ହୋଇଥିବା ବେଳେ ପ୍ରତିକୂଳ ବାତାବରଣରେ ମଧ୍ୟ ଶତ୍ରୁର ନାଶ କରିପାରିବ । ଏହାକୁ ବିଶେଷ କରି ବାୟୁ ସେନା ଏବଂ ନୌସେନାରେ ଆକ୍ରମଣ ଲାଗି ଡିଜାଇନ୍ କରାଯାଇଛି । ଏବେ ଭାରତୀୟ ବାୟୁ ସେନା ପାଖରେ ପ୍ରାୟ ୪୦ ତେଜସ୍ ଏୟାରକ୍ରାଫ୍ଟ ରହିଛି । ଫେବୃଆରି ୨୦୨୧ରେ ପ୍ରତିରକ୍ଷା ମନ୍ତ୍ରଣାଳୟ ୪୮୦୦୦ କୋଟି ଟଙ୍କାରେ ୮୩ଟି ତେଜସ୍ ଏମକେ-୧ଏ କ୍ରୟ କରିବାକୁ ହାଲ ସହ ବୁଝମଣା କରିଥିଲା । ହେଲେ ଗତମାସରେ ଅତିରିକ୍ତ ୯୭ ତେଜସ୍ ଜେଟ୍ କ୍ରୟ କରିବା ଲାଗି ମନ୍ତ୍ରଣାଳୟ ପକ୍ଷରୁ ପ୍ରାଥମିକ ଅନୁମତି ପ୍ରଦାନ କରାଯାଇଛି ।
