ଭୁବନେଶ୍ବର,୪/୧୧ : ସାମ୍ବାଦିକାଙ୍କୁ ମାଡ଼ ମାରିବା ଘଟଣାରେ ଜେଲ ଗଲେ ପ୍ରଯୋଜକ ଟୁଟୁ ନାୟକ । ଏସଡିଜିଏମ୍ କୋର୍ଟରେ ଜାମିନ ଆବେଦନ ଖାରଜ ପରେ ତାଙ୍କୁ ଜେଲ୍ ପଠାଇ ଦିଆଯାଇଛି । ୧୪ଦିନିଆ ବିଚାର ବିଭାଗୀୟ ହାଜତରେ ରହିବେ ପ୍ରଯୋଜକ ଟୁଟୁ ନାୟକ । ଟୁଟୁ ନାୟକଙ୍କ ବିରୋଧରେ ଲାଗିଥିଲା ସଙ୍ଗୀନ ଦଫା ଲାଗିଥିଲା । ଏହାକୁ ଆଧାର କରି ଶନିବାର ଖାରବେଳ ନଗର ଥାନା ପୋଲିସ ତାଙ୍କୁ ଗିରଫ କରିଥିଲା ।
ସୂଚନା ଅନୁଯାୟୀ, ପ୍ରଯୋଜକ ସଞ୍ଜୟ ନାୟକ ଓରଫ ଟୁଟୁ ନାୟକଙ୍କ ବିରୋଧରେ ଜଣେ ମହିଳା ସାମ୍ବାଦିକ ଶୁକ୍ରବାର ଖାରବେଳନଗର ଥାନାର ଦ୍ୱାରସ୍ଥ ହୋଇଥିଲେ । ପ୍ରଯୋଜକଜଣକ ସାମ୍ବାଦିକାଙ୍କୁ ଦୁର୍ବ୍ୟବହାର କରିବା ସହ ତାଙ୍କ ଗାଲକୁ ଚାପୁଡ଼ା ପକାଇଥିବା ଅଭିଯୋଗ ହୋଇଥିଲା । ଏତଲା ମୁତାବକ, ଶ୍ରୀୟା ହଲ୍ରେ ଶୁକ୍ରବାର ଓଡ଼ିଆ ସିନେମା ‘ପ୍ରଥା’ର ପୋଷ୍ଟର ରିଲିଜ ହେଉଥିଲା । ଏଥିରେ ଗଣମାଧ୍ୟମ ପ୍ରତିନିଧିଙ୍କୁ ମଧ୍ୟ ନିମନ୍ତ୍ରଣ କରାଯାଇଥିଲା । ପୋଷ୍ଟର ରିଲିଜ୍ ପରେ ଦେବସ୍ମିତା ହଲ୍ରୁ ବାହାକୁ ଆସି ସିନେମା ହିରୋଙ୍କ ପ୍ରତିକ୍ରିୟା ନେବାକୁ ଅପେକ୍ଷା କରିଥିଲେ । ଏତିକିବେଳେ ଟୁଟୁ ପଛ ପଟୁ ଆସିଲେ । ହଠାତ୍ ତାଙ୍କ ବାମପଟ ଗାଲକୁ ଚାପୁଡ଼ା ମାରିଲେ । ତାଙ୍କ ହାତରୁ ବୁମ୍ ଓ ଫୋନ୍ ଖସି ପଡ଼ିଥିଲା । ସେ ବୁମ୍ ଉଠାଉଥିବା ବେଳେ ଟୁଟୁ ପୁଣି ପିଠିକୁ ମାରିବା ସହ ଅଶୋଭନୀୟ ଆଚରଣ କରିଥିଲେ । ସର୍ବସମ୍ମୁଖରେ ଟୁଟୁଙ୍କ ଏଭଳି ବ୍ୟବହାର ଯୋଗୁ ତାଙ୍କର ମର୍ଯ୍ୟଦା ହାନୀ ହୋଇଥିବା ଏତଲା କପିରେ ଦର୍ଶାଯାଇଥିଲା ।