ନୂଆଦିଲ୍ଲୀ: ଜାତୀୟ ରାଜଧାନୀ ଦିଲ୍ଲୀରେ ରାଜନୈତିକ ହଟଚମଟ ଜାରି ରହିଛି । ଆପ୍ ମୁଖ୍ୟ ଅରବିନ୍ଦ କେଜ୍ରିଓ୍ବାଲ ଉପରାଜ୍ୟପାଳ ଭିକେ ସକ୍ସେନାଙ୍କୁ ଭେଟି ନିଜର ଇସ୍ତଫା ପତ୍ର ଦେଇଛନ୍ତି । ଏହା ପୂର୍ବରୁ ଦିଲ୍ଲୀର ପରବର୍ତ୍ତୀ ମୁଖ୍ୟମନ୍ତ୍ରୀ ଭାବରେ ମନ୍ତ୍ରୀ ଆତିଶୀଙ୍କୁ ବାଛିଛନ୍ତି କେଜ୍ରିଓ୍ବାଲ । ତାଙ୍କ ପରେ ଦିଲ୍ଲୀର ମୁଖ୍ୟମନ୍ତ୍ରୀ ହେବେ ଆତିଶୀ । ତେବେ ଆତିଶୀଙ୍କୁ ନିଜର ଉତ୍ତରାଧିକାରୀ ଭାବରେ କେଜ୍ରିଓ୍ବାଲ ଚୟନ କରିବା ପରେ ଆପ୍ର ରାଜ୍ୟସଭା ସାଂସଦ ସ୍ବାତୀ ମାଲିଓ୍ବାଲଙ୍କ ମନ୍ତବ୍ୟ ଚର୍ଚ୍ଚାର ପ୍ରସଙ୍ଗ ପାଲଟିଛି ।
ଆତିଶୀଙ୍କ ବିରୋଧରେ ମନ୍ତ୍ରବ୍ୟ ଦେଇ ଏବେ ଅଡ଼ୁଆରେ ସ୍ବାତୀ । ସ୍ବାତୀଙ୍କ ଇସ୍ତଫା ଦାବି କରିଛି ତାଙ୍କର ନିଜ ଦଳ ଆମ ଆଦମୀ ପାର୍ଟି (ଆପ୍) । ଆପ୍ ପାଖରୁ ରାଜ୍ୟସଭା ଯାଇଥିବା ସ୍ବାତୀ ମାଲିଓ୍ବାଲର ବିଜେପିର ସ୍କ୍ରିପ୍ଟ ପଢ଼ୁଛନ୍ତି ବୋଲି ଅଭିଯୋଗ କରିଛନ୍ତି ଆପ୍ର ବରିଷ୍ଠ ନେତା ଦିଲ୍ଲୀପ ପାଣ୍ଡେ । ଏହା ସହ ସେ ସ୍ବାତୀଙ୍କ ଇସ୍ତଫା ଦାବି କରିଛନ୍ତି । ଏପରିକି ବିଜେପି ଟିକେଟରୁ ରାଜ୍ୟସଭା ଯିବାକୁ ସ୍ବାତୀ ମାଲିଓ୍ବାଲଙ୍କୁ ପରାମର୍ଶ ଦେଇଛନ୍ତି ଦିଲ୍ଲୀପ ପାଣ୍ଡେ ।
ପୂର୍ବରୁ କେଜ୍ରିଓ୍ବାଲଙ୍କ ପୂର୍ବତନ ସହାୟକ ବିଭବ କୁମାର ତାଙ୍କୁ ମାଡ଼ ମାରିଥିବା ଅଭିଯୋଗ ଆଣି ଚର୍ଚ୍ଚାକୁ ଆସିଥିଲେ ସ୍ବାତୀ ମାଲିଓ୍ବାଲ । ଦିଲ୍ଲୀ ମହିଳା କମିଶନର ପୂର୍ବତନ ଅଧ୍ୟକ୍ଷା ଏବଂ ରାଜ୍ୟସଭା ସାଂସଦ ସ୍ବାତୀ ମାଲିଓ୍ବାଲ ଏବଂ ଆପ ମଧ୍ୟରେ ତୁତୁମେଁମେଁ ଲାଗିରହିଛି । ଏହା ପୂର୍ବରୁ ଆଜି ଆତିଶୀଙ୍କୁ ଦିଲ୍ଲୀର ପରବର୍ତ୍ତୀ ମୁଖ୍ୟମନ୍ତ୍ରୀ ଭାବରେ ଚୟନ କରାଯିବା ପରେ ତାଙ୍କୁ ଜୋରଦାର ଟାର୍ଗେଟ କରିଥିଲେ ସ୍ବାତୀ ମାଲିଓ୍ବାଲ ।
ଦିଲ୍ଲୀ ପାଇଁ ଏହା ଏକ ଅଶୁଭ ଦିନ ବୋଲି କହିଥିଲେ ସ୍ବାତୀ । ସେ ଦାବି କରିଥିଲେ ଯେ, ଆତିଶୀଙ୍କ ପରିବାର ଆତଙ୍କବାଦୀ ଅଫଜଲ ଗୁରୁକୁ ଫାଶୀ ପାଇବାରୁ ରକ୍ଷା କରିବାକୁ ଚେଷ୍ଟା କରିଥିଲେ । ଅଫଜଲ ଗୁରୁକୁ ବଞ୍ଚାଇବାକୁ ଆତିଶୀଙ୍କ ପରିବାର ଲୋକେ ରାଷ୍ଟ୍ରପତିଙ୍କ ନିକଟରେ ‘ଦୟା ନିବେଦନ’ କରିଥିଲେ । ଏକ ଅନଲାଇନ ପୋଷ୍ଟ ମାଧ୍ୟମରେ ଆତିଶୀଙ୍କୁ ‘ଡମି ମୁଖ୍ୟମନ୍ତ୍ରୀ’ କହିବା ସହ ଏବେ ଦିଲ୍ଳୀକୁ ଭଗବାନ ଭରସା ବୋଲି କହିଛନ୍ତି ସ୍ବାତୀ । ସେପଟେ ଦିଲ୍ଲୀର ଶିକ୍ଷା ମନ୍ତ୍ରୀ ଆତିଶୀ ଏନେଇ କୌଣସି ପ୍ରତିକ୍ରିୟା ଦେଇନାହାନ୍ତି।
