ନୂଆଦିଲ୍ଲୀ,୧୪।୫: ଆମ୍ ଆଦମୀ ପାର୍ଟିର ରାଜ୍ୟସଭା ସାଂସଦ ଓ ଦିଲ୍ଲୀ ମହିଳା କମିଶନର ପୂର୍ବତନ ଅଧ୍ୟକ୍ଷା ସ୍ବାତୀ ମାଲିଓ୍ବାଲଙ୍କ ସହ ଦୁର୍ବ୍ୟବହାର ଘଟଣାକୁ ନେଇ ନୂଆ ଅପଡେଟ୍। ମାଲିଓ୍ବାଲଙ୍କ ସହ ଦୁର୍ବବ୍ୟବହାର କଥା ସତ ବୋଲି ସ୍ବୀକାର କରିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବଲ। ସେ କହିଛନ୍ତି, ଏହି ମାମଲାରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଆପ୍ ରାଜ୍ୟସଭା ସାଂସଦ ସଞ୍ଜୟ ସିଂହ ମଙ୍ଗଳବାର ଏକ ସାମ୍ବାଦିକ ସମ୍ମିନଳୀରେ କହଛନ୍ତି, ଗତକାଲି ଏକ ନିନ୍ଦନୀୟ ଘଟଣା ଘଟିଛି। ସ୍ବାତୀ ମାଲିଓ୍ବାଲ କେଜ୍ରିଓ୍ବାଲଙ୍କୁ ଭେଟିବାକୁ ତାଙ୍କ ବାସଭବନକୁ ଯାଇଥିଲେ। ଡ୍ରଇଂ ରୁମ୍ରେ ସେ ତାଙ୍କର ଅପେକ୍ଷା କରୁଥିଲେ। ସେତେବେଳେ ମୁଖ୍ୟମନ୍ତ୍ରୀଙ୍କ ପିଏ ବିଭବ କୁମାର ତାଙ୍କୁ ଦୁର୍ବ୍ୟବହାର କରିଥିଲେ। ଏନେଇ ସ୍ବାତୀ ପୋଲିସକୁ ଫୋନ୍ କରି ଅଭିଯୋଗ କରିଥିଲେ। ମୁଖ୍ୟମନ୍ତ୍ରୀ ଏହି ମାମଲାରେ ହସ୍ତକ୍ଷେପ କରିବା ସହ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରିବେ।
ସଞ୍ଜୟ ସିଂହ କହିଛନ୍ତି, ସ୍ବାତୀ ମାଲିଓ୍ବାଲ ଦେଶ ଓ ସମାଜ ପାଇଁ ବଡ କାମ କରିଛନ୍ତି। ସ୍ବାତୀ ଦଳର ପୁରୁଣା ଓ ସିନିୟର ଲିଡରଙ୍କ ଭିତରୁ ଜଣେ। ଆମେ ସବୁ ତାଙ୍କ ସହିତ ଅଛୁ।’ ବିଜେପି ମଧ୍ୟ ମଙ୍ଗଳବାର ଏହି ମାମଲାକୁ ନେଇ ଜୋରଦାର ହଙ୍ଗାମା କରିବା ସହ କେଜ୍ରିଓ୍ବାଲଙ୍କ ଇସ୍ତଫା ଦାବି କରିଥିଲା।