ନୂଆଦିଲ୍ଲୀ,୮।୫: ଇଲୋଟ୍ରୋନିକ୍ସ ଭୋଟିଂ ମେସିନ୍ ବା ଇଭିଏମକୁ ହ୍ୟାକ୍ କରିବାକୁ ନେଇ ଅଢେଇ କୋଟି ଟଙ୍କା ଦାବି କରୁଥିବା ସେନା ଯବାନଙ୍କୁ ଗିରଫ କଲା ପୋଲିସ। ଏହି ମାମଲାର ମହାରାଷ୍ଟ୍ରର ସମ୍ଭାଜିନଗରରେ ଘଟିଛି। ଶିବସେନା ଉଦ୍ଧବ ବାଲାସାହେବ ଠାକରେଙ୍କ ନେତା ଅମ୍ବାଦାସ ଦାନଭେଙ୍କୁ ସେନାର ଯବାନ ଇଭିଏମ୍ ହ୍ୟାକିଂ ପାଇଁ ଏହି ଦାବି କରିଥିଲେ। ଅମ୍ବାଦାସ ଦାନଭେ ଏନେଇ ପୋଲିସ ନିକଟରେ ଅଭିଯୋଗ କରିଥିଲେ, ଏହାପରେ ସେନାର ଯବାନ ମାରୁତି ଧାକନେଙ୍କୁ ଗିରଫ କରାଯାଇଛି। ୪୨ ବର୍ଷୀୟ ମାରୁତି ଧାକନେ କହିଥିଲେ, ସେ ଏକ ଚିପ୍ ଯୋଗେ ଇଭିଏମ୍ ହ୍ୟାକ୍ କରିପାରିବେ।
ତାଙ୍କର କହିବା ଅନୁସାରେ, ଏହି ଚିପ୍ କୌଣସି ଖାସ୍ ପ୍ରାର୍ଥୀଙ୍କୁ ଅଧିକ ଭୋଟ ପାଇବାରେ ସାହାଯ୍ୟ କରିପାରେ। ପୋଲିସ ଗିରଫ କରିବା ପରେ ମାରୁତିକୁ ଯେତେବେଳେ ପଚରା ଉଚରା କରିଥିଲା ଜଣାପଡିଥିଲା ତାଙ୍କୁ କିଛି ଜଣାନାହିଁ। ଋଣରେ ବୁଡିଥିବା କାରଣରୁ ସେ ଏହାକୁ ସୁଝିବାକୁ ଏଭଳି କରିଥିବାର କହିଛି। ଅମ୍ବାଦାସ ଦାନବେ ମହାରାଷ୍ଟ୍ର ବିଧାନ ପରିଷଦର ବିରୋଧି ଦଳ ନେତା। ପୋଲିସ କହିଛି, ଅଭିଯୁକ୍ତ ନିଜର ଋଣ ଟଙ୍କା ଫେରାଇବା ପାଇଁ ଏଭଳି ମିଛା କଥା କହିଥିଲେ।
ପୋଲିସର କହିବା ଅନୁସାରେ, ମଙ୍ଗଳବାର ସନ୍ଧ୍ୟାୟ ୪ଟା ବେଳେ ଅଭିଯୁକ୍ତ ଏକ ବସ୍ ଷ୍ଟାଣ୍ଡ ନିକଟରେ ଥିବା ହୋଟେଲରେ ଅମ୍ବାଦାସଙ୍କ ସାନ ଭାଇ ରାଜେନ୍ଦ୍ର ଦାନଭେଙ୍କୁ ସାକ୍ଷାତ କରିଥିଲା। କଥାବାର୍ତ୍ତା ପରେ ୧.୫ କୋଟି ଟଙ୍କାରେଡିଲ୍ ହୋଇଥିଲା। ଅମ୍ବାଦାସ ଦ୍ବାରା ଦିଆଯାଇଥିବା ସୂଚନା ଆଧାରରେ ସାଧା କପଡାରେ ପୋଲିସର ଏକ ଦଳକୁ ପଠାଯାଇଥିଲା ଓ ଅଭିଯୁକ୍ତକୁ ୧ ଲକ୍ଷ ଟଙ୍କା ନେବା ସମୟରେ ଗିରଫ କରାଯାଇଥିଲା।
