ନୂଆଦିଲ୍ଲୀ, ୧୬/୦୯: ଘରୋଇ ଭାରତ ବିପକ୍ଷ ଦ୍ୱିପାକ୍ଷିକ କ୍ରିକେଟ୍ ସିରିଜ ପାଇଁ ରବିବାର ବାଂଲାଦେଶ ଦଳ ଚେନ୍ନାଇରେ ପହଞ୍ଚିଛି । ଅପରାହ୍ଣରେ ବିମାନବନ୍ଦରରେ ପହଞ୍ଚିବା ପରେ ଦଳକୁ କଡ଼ା ସୁରକ୍ଷାରେ ଟିମ୍ ହୋଟେଲକୁ ନିଆଯାଇଥିଲା । ଆଜି ବାଂଲାଦେଶ ଟେଷ୍ଟ ସିରିଜ ପାଇଁ ପ୍ରସ୍ତୁତି ଆରମ୍ଭ କରିବ ।
୧୯ ତାରିଖରୁ ଚେନ୍ନାଇରେ ପ୍ରଥମ ଟେଷ୍ଟ ଆରମ୍ଭ ହେବ । ସେହିପରି ଦ୍ୱିତୀୟ ଟେଷ୍ଟ କାନପୁରରେ ଆସନ୍ତା ୨୭ରୁ ଅକ୍ଟୋବର ୧ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ । ଏହାପରେ ଉଭୟ ଦଳ ମଧ୍ୟରେ ୩ଟି ଟି-ଟ୍ୱେଣ୍ଟି (ଅକ୍ଟୋବର ୬, ୯, ୧୨ତାରିଖ) ଖେଳାଯିବ । ଭାରତ ଗସ୍ତରେ ଆସିବା ପୂର୍ବରୁ ବାଂଲାଦେଶ ଘରୋଇ ପାକିସ୍ତାନ ବିପକ୍ଷରେ ୨ଟି ଟେଷ୍ଟ ଖେଳି ସିରିଜ ମୂଳପୋଛ କରିଥିଲା । ନଜମୁଲ ହୋସେନ ଶାନ୍ତୋଙ୍କ ନେତୃତ୍ୱାଧିନ ଦଳ ପ୍ରଥମ ଥର ପାକିସ୍ତାନ ବିପକ୍ଷରେ ଟେଷ୍ଟ ସିରିଜ ବିଜୟ ହାସଲ କରିଥିଲା ।
ଭାରତ ଗସ୍ତରେ ମଧ୍ୟ ଦଳ ଅନୁରୂପ ପ୍ରଦର୍ଶନ କରିବା ଲକ୍ଷ୍ୟରେ ରହିଛି । ଶାନ୍ତୋ କହିଛନ୍ତି, ଭାରତ ବିପକ୍ଷ ସିରିଜ ଆମ ପାଇଁ ଆହ୍ୱାନପୂର୍ଣ୍ଣ ହେବ । ଭାରତ ଏକ ଶକ୍ତିଶାଳୀ ଦଳ । ଘରୋଇ ମାଟିରେ ସେମାନଙ୍କୁ ହରାଇବା କାଠିକର ପାଠ ହେବ । ତଥାପି ପାକିସ୍ତାନ ବିପକ୍ଷରେ ସିରିଜ ବିଜୟ ଆମ ମନୋବଳ ଦ୍ୱିଗୁଣିତ କରିଛି । ଆମେ ସବୁ ବିଭାଗରେ ଶ୍ରେଷ୍ଠ ପ୍ରଦର୍ଶନ ଦେବାକୁ ପ୍ରସ୍ତୁତ ରହିଛୁ ।
